ބޮލީވުޑްގެ ހުނަރުވެރި ބަތަލާ ކަންގަނާ ރަނާވަތަށް އަނެއްކައިވެސް ބަޔޮޕިކެއް ލިބިއްޖެއެވެ.
މި ބަޔޮޕިކްގެ ޑައިރެކްޓަރަކީ ޕްރަދީޕް ސަރުކާރުއެވެ. މި ފިލްމަކީ އިންޑިއާގައި ތިއޭޓަރ ތަމްސީލު ކުޅުމުގެ ސަގާފަތް ދިރުވައި އެފަދަ އުފެއްދުންތަކުގައި ވަރުގަދަ އެތައް ރޯލެއް ކުޅެފައިވާ ބެންގާލީ ބަތަލާ ނޯތީ ބިނޯދިނީގެ ވާހަކަ ކިޔަދައިދޭ ބަޔޮގްރަފިކަލް ޑްރާމާ އެކެވެ.
ހަތަރު ނެޝަނަލް އެވޯޑް ހާސިލުކޮށްފައިވާ ކަންގަނާ ދާދިފަހުން ވެސް ވަނި ބަޔޮޕިކެއް ކުޅެފައެވެ. އެއީ "ތަލައިވީ"އެވެ.
ނަމަވެސް ކަންގަނާގެ ކުރިއަށް އޮތް ބަޔޮޕިކާ ގުޅޭގޮތުން އަދި ރަސްމީކޮން އެއްވެސް މައުލޫމާތެއް އާންމެއް ނުކުރެއެވެ.
ކަންގަނާ މިހާރު މަސައްކަތް ކުރަމުންދާ ފިލްމު "އިމަޖެންސީ" ގެ މަސައްކަތް ނިންމާލުމަށް ފަހު އަންނަ އަހަރުގެ ކުރީކޮޅު މި ބައޮޕިކްގެ މަސައްކަތް އޭނާ ފަށާނެކަމަށް ޚަބަރުތައް ބުނެއެވެ. "އިމަޖެންސީ" އަކީ އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ރޯލުން ކަންގަނާ ފެންނާނެ ފިލްމެކެވެ.
ނޯޓީ ބިނޯދިނީގެ ނަމުން މަޝްހޫރުވެ ބެންގާލީ ސިނަމާގައި ނަން ވިދާލި މި ތަރިއަކީ 12 އަހަރުގައި ފިލްމު ކުޅެން ފެށި މީހެކެވެ. ފިލްމު ކުޅެން ހުއްޓާލިފަހުން އޭނާ ވަނީ އޭނާގެ ހަޔާތަށް އޮޓޯބަޔޮގްރަފީއެއް ވެސް ލިޔެފައެވެ. އޭނާ މަރުވެފައި ވަނީ 1941 ގައި އުމުރުން 71 އަހަރުގައެވެ.
