ޔޫރޮޕާ ލީގުގައި ރޭ ނެދަލެންޑްސްގެ ޕީއެސްވީ އެއިންދޯވަން އަތުން 1-0 އިން އަމިއްލަ ދަނޑުގައި މޮޅުވެ، މުބާރާތުގެ ދެ ވަނަ ބުރުގެ ޖާގައެއް އާސެނަލް އިން ކަށަވަރުކޮށްފިއެވެ.
ފުރަތަމަ ހާފުގައި ގެބްރިއެލް ޖީސުސް އަށް އާސެނަލް އަށް ލީޑު ނަގައިދޭން ހުސް ފުރުސަތެއް ލިބުނު ނަމަވެސް، އެޓީމުގެ ފަބިއޯ ވިއޭރާ އޭރިއާ ތެރެއަށް ނަގައިދިން ބޯޅަ ފޮނުވާލެވޭ ގޮތެއް ނުވިއެވެ. އަދި މި ހާފުގައި ވިއޭރާ ފޮނުވާލި ނުރައްކާތެރި ހިލޭޖެހުމެއް ދިޔައީ ގޯލު ދަނޑި ކައިރިން ބޭރަށެވެ.
ދެވަނަ ހާފު ފެށިގެން އިރުކޮޅެއް ތެރޭ އާސެނަލްގެ ބުކަޔޯ ސަކާ އަށް ހުސް ފުރުސަތެއް ލިބުނު ނަމަވެސް، ޕީއެސްވީގެ ކީޕަރު ވޯލްޓާ ބެނިތޭޒް ދިފާއު ކުރިއެވެ. އަދި ރީބައުންސް ވި ބޯޅަ ޖީސުސް އަށް ލިބުނު ނަމަވެސް އޭނާއަށް މާ ރަނގަޅަށް ފޮނުވައެއް ނުލެވުނެވެ. މެޗުގައި އާސެނަލް އިން ޖެހި ހަމައެކަނި ލަނޑު 70 ވަނަ މިނިޓްގައި ޖަހައިދިނީ ގްރޭނިޓް ޒާކާއެވެ.
މި ގުރޫޕްގައި މީގެ ދެ ހަފުތާ ފަހުން މި ދެ ޓީމު ޕީއެސްވީގެ ދަނޑުގައި ކުޅޭ މެޗުން އާސެނަލް ޕޮއިންޓެއް ހޯދިޔަސް، އެ ޓީމަށް ގްރޫޕްގެ އެއް ވަނަ މަގާމު ކަށަވަރުވާނެއެވެ. މި ސީޒަންގައި އާސެނަލް މިހާތަނަށް ކުޅުނު 14 މެޗުގެ ތެރެއިން 13 މެޗުން އެ ޓީމު ވަނީ މޮޅުވެފައެވެ.
