މަގާމާ ހަވާލުވިތާ އެންމެ 6 ހަފްތާފަހުން، އިނގިރޭސި ބޮޑުވަޒީރު ލިޒް ޓްރަސް މަގާމުން އިސްތިއުފާ ދެއްވުމާއި ގުޅިގެން އިނގިރޭސި ތާރީޚުގައި އެންމެ ކުރު މުއްދަތަކަށް ބޮޑުވަޒީރުކަން ކުރެއްވި ބޭފުޅަކަށް ލިޒް ޓްރަސް ވެވަޑައިގެންފިއެވެ.

ލިޒްއަށް ބޮޑުވަޒީރުކަން ކުރުމުގެ ފުރުސަތު ލިބިގެންދިޔައީ އެންމެ 45 ދުވަހުގެ މުއްދަތަަށެވެ. މިގޮތުން، އިނގިރޭސިވިލާތުގެ ކުރީގެ ފޮރިން ސެކެޓްރީ ލިޒް ޓްރަސް ބޮޑުވަޒީރުކަމުގެ މަގާމާ ހަވާލުވެވަޑައިގެންނެވީ ފާއިތުވެދިޔަ ސެޕްޓެމްބަރު މަހުގެ 6 ވަނަ ދުވަހުއެވެ. އެއީ 96 އަހަރުގެ އިނގިރޭސި ރާނީ ކުއީން އެލިޒަބަތު އަވަހާރަ ވުމުގެ 2 ދުވަސް ކުރިންނެވެ.

މަގާމާ ހަވާލުވިތާ މަދު ދުވަސްކޮޅެއްގެ ތެރޭގައި އިސްތިއުފާ ދެއްވަން މަޖުބޫރުވެވަޑައިގެންނެވި އިރު، އޭނާ ބޮޑުވަޒީރުކަމަށް ވަޑައިގެންނެވީ ކުރީގެ ބޮޑުވަޒީރު ބޮރިސް ޖޯންސަންއަށްވެސް މަޖިލިހުގެ މެޖޯރިޓީ ގެއްލި އޭނާ މަގާމުން އިސްތިއުފާ ދެއްވުމާއި ގުޅިގެންނެވެ.

އިނގިރޭސި ތާރީޚުގައި އެންމެ ކުރު މުއްދަތަކަށް ބޮޑުވަޒީރުކަން ކުރައްވާ ބޮޑުވަޒީރަކަށް ލިޒް ޓްރަސް ވެގެން ގޮސްފައިވާއިރު، އޭނާގެ ފަހަތުން ދެން އެންމެ ކުރު މުއްދަތަކަށް އެގައުމުގެ ބޮޑުވަޒީރުކޮށް ކޮށްފައިވަނީ 1963 ވަނަ އަހަރުގެ އޮކްޓޯބަރުމަހު އިނގިރޭސި ބޮޑުވަޒީރުކަމާއި ހަވާލުވެވަޑައިގެންނެވި ސާރ އަލެކް ޑޮގްލަސް އެވެ. އޭނާ ބޮޑުވަޒީރުކަން ކުރައްވާފައިވަނީ އެއް އަހަރާއި އެއް ދުވަހުއެވެ.

އެފަހަރު ޑޮގްލަސްއަށް ބޮޑުވަޒީރުކަން ގެއްލިގެންދިޔައީ 1964 ވަނަ އަަހަރު އޮތް އިންތިޚާބުގައެވެ.

ތިންވަނައަށް އެންމެ ކުރު މުއްދަތަކަށް އިނގިރޭސި ބޮޑުވަޒީރުކަން ކުރެއްވީ 1950 އަހަރުތަކުގެ ތެރެގައި، ކޮންޒަރވޭޓިވް ޕާޓީގެ ފަރާތުން ބޮޑުވަޒީރުކަށް ވަޑައިގެންނެވި ސާރ އެންތެނީ އެދެންސްއެވެ. އޭނާ ބޮޑުވަޒީރުކަން ކުރެއްވީ އެއް އަހަރާއި 279 ދުވަހުއެވެ. 4 ވަނައަށް އެންމެ ކުރު މުއްދަތަކަށް އެގައުމުގައި ބޮޑުވަޒީރުކަން ކުރެއްވީ ގޯޑަން ބްރައުންއެވެ.

ގޯޑްން ބައުންއަކީ އިންތިޚާބުވި ބޮޑު ވަޒީރެއް ނޫނެވެ. އެނާއަށް ބޮޑުވަޒީރުކަން ގެއްލިގެން ދިޔައީ 2010ވަނަ އަހަރުގެ އާންމު އިންތިޚާބުގައި ފަހުން ބޮޑުވަޒީރުކަން ކުރެއްވި ޑޭވިޑް ކެމަރަންއާއި ވާދަކުރައްވާ ބަލިވެގެންނެވެ. ގޯޑަން ބްރައުން އިނގިރޭސި ބޮޑުވަޒީރުކަން ކުރެއްވީ 2 އަހަރާއި 218 ދުވަހުއެވެ.

ލިޒް ޓްރަސް އިނގިރޭސި ބޮޑުވަޒީރުކަމާއި ހަވާލުވެވަޑައިގެންނެވީ، އިނދަޖެހެމުންދާ އެގައުމުގެ އިގްތިސާދުން އަލުން ކޮޅަށް ޖައްސަވާނެކަމުގެ ވައުދާ އެކީއެވެ. މި ގޮތުން އާންމު ޚިދުމަތްތަކަށް ކުރާންޖެހުނު ބޮޑެތި ހޭދަތަކަށް ދައުލަތުގެ މާލިއްޔަތަށް އާމްދަނީ އިތުރު ކުރުމަށްޓަކާ، ކުރީގެ ބޮޑުވަޒީރުގެ ވެރިކަމުގައި ޓެކްސް ބޮޑުކޮށް، ގެނެސްފައިވާ ބަދަލުތައް އުވާލާ ޓެކްސް ކުޑަކުރައްވާނެކަމަށް، ބޮޑުވަޒީރުކަމަށް ވަޑައިގަތުމަށް އަމިއްލަފުޅު ޕާޓީގެ އެތެރޭގައި ކުރެއްވި ކެމްޕޭންގައި ލިޒް ޓަރަސް ވަނީ ވިދާޅުވެފައެވެ. އޭގެ އެންމެ ބޮޑު އަމާޒެއްކަމަށް ވިދާޅުވަމުން ގެންދެވީ އިނގިރޭސިވިލާތުގެ އިގްތިސާދުގެ ދުވެލި ބާރު ކުރެއްވުމެވެ.

އެހެންނަމަވެސް ބޮޑުވަޒީރުކަމާއި ހަވާލުވެ ވަޑައިގަތުމަށްފަހު ޓެކްސް ކުޑަކުރެއްވުމުގެ ނަތީޖާއަކަށް ވެގެން ދިޔައީ ޕައުންޑު އަގުވެއްޓި، އިންޓަރނޭޝަނަލް މަނިޓަރީ ފަންޑުންވެސް އިނގިރޭސި ސަރުކާރުގެ މި ސިޔާސަތުތަކަށް ތާއީދު ނުކުރާނޭކަން ހާމަ ކުރުމެވެ. މަނިޓަރީ ފަންޓުން ބުނެފައިވާ ގޮތުގައި މި ބަދަލުތަކުގެ ސަބަބުން އިނގިރޭސިވިލާތުގައި މުއްސަދިންނާއި ފަގީރުންގެ ތަފާތު ދާނީ ބޮޑުވަމުން ކަމުގައެވެ.