ސިޔާސީ ޕާޓީތަކުން އިންތިޚާބުތަކުގައި ވޯޓު ހޯދާ ނިސްބަތަށް ބަލައިގެން އެ ނިސްބަތުން ޕާޓީތަކަށް ދައުލަތުގެ ބަޖެޓުން ފައިސާ ދޫކުރުމަށް މިނިވަން މުވައްސަސާގެ މެމްބަރުން ތާއީދު ކޮށްފިއެވެ.
ސިޔާސީ ޕާޓީތަކަށް މީހުން ވެއްދުމާއި، ވަކި ކުރުމުގައި އަމަލް ކުރަމުންދާ އުސޫލުތަކާ ގުޅޭގޮތުން ސިޔާސީ ޕާޓީތަކުންނާއި އާންމު ރައްޔިތުންގެ މެދުގައިހުރި ކަންބޮޑުވުންތަކާއި ގުޅޭގޮތުން ކޮމިޓީން ދިރާސާކޮށް މަޖިލިހުގެ ތަޅުމަށް ފޮނުވި އިސްލާހުތަކުގައިވަނީ އިލެކްޝަންސް ކޮމިޝަނުން ފާހަގަ ކުރި ކަންކަމަށް ރިއާޔަތް ކޮށްފައެވެ.
ކޮމިޓީން ފޮނުވި ރިޕޯޓުގައި ފާހަގަ ކުރި ކަންކަމުގެ ތެރޭގައި ސިޔާސީ ޕާޓީތަކުން ސައްޙަ ނޫން ފޯމުތައް ހުށަހަޅާ ސަބަބެއްގެ ގޮތުގައި އިލެކްޝަންސް ކޮމިޝަނުން ފާހަގަ ކޮށްފައިވާ، ޕާޓީތަކަށް ދައުލަތުގެ މާލިއްޔަތުން ފައިސާ ދޭ އުސޫލު ފާހަގަ ކޮށްފައި ވެއެވެ. މިގޮތުން ރިޕޯޓުގައި ފާހަގަ ކޮށްފައިވާ ގޮތުގައި، ޕާޓީތަކަށް ދައުލަތުގެ ބަޖެޓުން މިހާރު ފައިސާ ދޫކުރަމުންދާ އުސޫލަށް ބަދަލުތަކެއް ގެނެސްފިނަމަ، މިމައްސަލައަށް ހައްލެއް ލިބިގެންދާނެކަމަށް އިލެކްޝަންސް ކޮމިޝަނުން ގަބޫލުކުރާކަން ފާހަގަ ކޮށްފައި ވެއެވެ.
ކޮމިޓީ ރިޕޯޓުގައި އިތުރަށް ބުނެފައިވަނީ، އިލެކްޝަންއިން ގަބޫލުކުރާ ގޮތުގައި، ޕާޓީތަކަށް ފައިސާ ލިބިދޭންވާނީ އިންތިޚާބުތަކުގައި ވޯޓު ހޯދާ ނިސްބަތުން ކަމުގައެވެ.
ކޮމިޓީގެ ރިޕޯޓުގައި ދީފައިވާ ރިކޮމެންޑޭޝަންއަކީ ގާނޫނަށް ގެންނަން އިލެކްޝަންސް ކޮމިޝަނުން ހުށަހަޅާ އިސްލާހުތައް، އެޓާނީ ޖެނެރަލްގެ ލައާއެކު، ބިލެއްގެ ސިފައިގައި މަޖިލީހަށް ހުށަހެޅުމަށެވެ.
