ރާއްޖެއިން ފާއިތުވެދިޔަ ހަފްތާގައި ކާމިޔާބުކުރި ޔޫއެންގެ އިންސާނީ ހައްގުތަކާބެހޭ ކައުންސިލްގެ ގޮޑި ރާއްޖެއަށް ކާމިޔާބު ކޮށްދީނީ އިންޑިއާއިން ކަމުގައި ކުރީގެ ރައީސް ޔާމިން ވިދާޅުވެއްޖެއެވެ.

މިހާރު ބޮޑު ތިލަދުންމައްޗަށް ކުރައްވަމުން ގެންދަވާ ދަތުރުފުޅުގައި ރޭ ހއ. ދިއްދޫގައި ބޭއްވި ޖަލްސާގައި ވާހަކަ ދައްކަވަމުން ޔާމިން ވިދާޅުވެފައިވަނީ، ދިވެހި ސަރުކާރުން ފަޚުރުވެރިކަމާއެކީ، އަދި ފޮރިން މިނިސްޓަރު ޝާހިދުގެ ޚާރިޖީ ސިޔާސަތު ކާމިޔާބުކަމުން ބައިނަލްއަގުވާމީ އިންސާނީ ހައްގުތަކާބެހޭ ޖަމިއްޔާގެ ކޮންމެވެސް ދިމާލަކުން ގޮޑިއެއް ލިބުނު ވާހަކަ ބުނަމުންދާ ކަމުގައެވެ.

ޔާމިން ވިދާޅުވީ މިހާރު އުޅެންޖެހެނީ އެވާހަކަ އަމިއްލަ ރައްޔިތުންގެ ތެރޭގައި ނުވިއްކިގެން ކަމުގައެވެ. އެހެންނަމަވެސް ބައިނަލްއަގުވާމީ ގޮތުން މިކަންކަން ކުރާނެކަމަށާއި، އެއީ ބައިނަލްއަގުވާމީ ގޮތުން ކުރެވިދާނެ ކަންކަން ކަމުގައެވެ. އަދި ބައިނަލްއަގުވާމީ ގޮތުން މިކަންކަން ކުރާއިރު ރާއްޖޭގެ ވެށި އެމީހުން ދިރާސާ ނުކުރާނެކަމަށް ވިދާޅުވަމުން ޔާމިން ޔާމިން ވިދާޅުވީ މިކަންކަން ކުރަނީ ވަކިވަކި ލޮބީ ގުރޫޕްތަކުގެ ބާރުގަ އަދި ނުފޫޒުގަ ކަމަށެވެ.

އެކަމަކުވެސް އެއާއެކީ ފަޚުރުވެރިކަމާއެކީ ދިވެހި ސަރުކާރުން އެބަ ބުނޭ، ޝާހިދުގެ ޚާރިޖީ ސިޔާސަތުގެ ކާމިޔާބުކަމާއެކީ ބައިނަލްއަގުވާމީ އިންސާނީ ޙައްގުތަކާބެހޭ ޖަމިއްޔާގެ ކޮންމެވެސް ދިމާލަކުން ގޮނޑިއެއް ލިބުނު ވާހަކަ. އެކަމަކު މިއުޅެނީ އެވާހަކަ އަޅުގަޑުމެންގެ އަމިއްލަ ރައްޔިތުންގެ ތެރޭގަ ނުވިއްކިގެން. ދެން ބައިނަލްއަގުވާމީގޮތުން މިކަންކަން ކުރާނެ. ބައިނަލްއަގުވާމީގޮތުން މިކަންކަން ކުރެވިދާނެ. ބައިނަލްއަގުވާމީގޮތުން ކުރާއިރު ރާއްޖޭގެ ވެށި އެމީހުން ދިރާސާއެއް ނުކުރާނެ. އެވަރަކަށް ނުކުރާނެ އެކަމެއް. އެއީ ވަކިވަކި ލޮބީ ގުރޫޕްތަކުގެ ބާރުގަ ނުފޫޒުގަ އެކަންކަން ކުރަނީ. އދ.އިން އަޅުގަޑުމެންނަށް މި ގޮނޑި ލިބުނީ ކީއްވެގެންތޯ؟

ޔޫއެންގެ އިންސާނީ ހައްގުތަކާބެހޭ ކައުންސިލަށް ދިވެހިރާއްޖެގެ އިންތިޚާބުވީ ބޭރުގެ ލޮބީ ގުރޫޕްތަކުގެ އެހީގައިކަމަށް ވިދާޅުވަމުން ޔާމިން ވިދާޅުވެފައި ވެއެވެ.

ޔާމިން އިތުރަށް ވިދާޅުވީ އެ ގޮނޑި ރާއްޖެއަށް ލިބުނީ އިންޑިއާއަށް ވިކި ހުސްވެގެން ކަމަށާއި، އެގޮނޑީގައި ރާއްޖެ ބައިންދާދިނީ އިންޑިއާއިން ކަމަށާއި، ކައުންސިލްގައި ރާއްޖެ އިންނަނީ ގޮނޑިކޮއްކޮއެއްގެ ގޮތުގައި ކަމަށެވެ.

ދިވެހިރާއްޖެ ނޫން ބަޔަކު ނެތީތޯ އެފެންވަރުގެ މަސައްކަތް ކުރާނެ. ނޫން އެހެނެއް ނޫން ދެއްތޯ! އިންޑިއާއަށް ވިކި ހުސްވީމަ، އިންޑިއާގެ މަސައްކަތުން އެ ގޮނޑި ހޯދާދިނީ. ގޮނޑި ކޮއްކޮއެއް އެތާ ބޭންދީ.

ޔާމިން ވިދާޅުވީ މީގެ ކުރިންވެސް ރާއްޖެއިން އިންސާނީ ހައްގުތަކާބެހޭ ކައުންސިލްގެ މެމްބަރުކަން ކޮށްފައިވާ ކަމަށާއި، އެހެންނަމަވެސް އެއީ ޗައިނާއިން ނުވަތަ އިންޑިއާއިން ތާއީދު ކޮށްގެނެއް ނޫން ކަމުގައެވެ. އޭރު އެތަނަށް އައިސްފައިވަނީ އަމިއްލަ މެރިޓުގަ (ފެންވަރުގަ) ކަމަށެވެ.

ޔާމިން ވިދާޅުވީ މިއަދަކު އެހެން ބުނެވޭކަށް ނެތް ކަމުގައެވެ.

އެކަމަކު މިއަދަކު ނެތެއް ނޫންތޯ އެހެން ބުނެވޭކަށް. މިއަދަކު ނެތޭ އެހެން ބުނެވޭކަށް. އެހެންީިމަ ދިވެހިރާއްޖޭގެ ޚާރިޖީ ސިޔާސަތު ހަމަ ޝައްކެއްވެސް ނެތް ވަރަށް ފައްކާ. އެކަމަކު މުޅި ޚާރިޖީ ސިޔާސަތު މިއޮތީ އިންޑިއާއެކީ އެކަނި. އިންޑިއާ ރުހޭ ބަޔަކާ ނޫން ބަޔަކާއެކީ ޚާރިޖީ އެއްވެސް ގުޅުމެއް ނުބޭއްވޭނެ. އަސްކަރީ އެއްވެސް ތަމްރީނެއް އެއްވެސް ކަމެއް ނުކުރެވޭނެ.

ރޭގެ ޖަލްސާގައި ރާއްޖޭގެ ޚާރިޖީ ސިޔާސަތަށް ފާޑު ވިދާޅުވަމުން ޔާމިން ވިދާޅުވެފައި ވެއެވެ.

ރާއްޖެއިން ޚާރިޖީ ސިޔާސަތު ދަމަހައްޓަނީ އިންޑިއާއިން ބޭނުންވާ ގޮތަށް އެކަނިކަމަށް ޔާމިން ވިދާޅުވި ނަމަވެސް، އިންޑިއާގެ ސިޔާސަތާއި ޚިލާފަށް ނުވަތަ، އިންޑިއާއިން ނަގާފައިވާ ސްޓޭންޑްތަކާއި ޚިލާފަށް ރާއްޖެއިން ޔޫއެންގެ ގިނަ ރިޒޮލިއުޝަންތަކެއްގައި ފާއިތުވެދިޔަ ތަނުގައި ވޯޓު ލާފައިވާކަން ފާހަގަ ކޮށްލެވެއެވެ.

އޭގެ ތެރޭގައި، ރަޝިއާއިން ޔޫކުރެއިންގެ 4 ސަރަހައްދެއް ޔޫއެންގެ ޗާޓަރާއި ޚިލާފަށް އަމިއްލަ ކުރުން ކުށްވެރިކުރުމާއި ދެކޮޅަށް ޔޫއެންގައި ރާއްޖެއިން ވޯޓު ދީފައިވާ އިރު، މި ވޯޓުގައި އިންޑިއާއިން އެއްވެސް ކޮޅަކަށް ވޯޓު ދީފައެއް ނުވެއެވެ. އަދި މީގެ ކުރީގެ ގިނަ ގަރާތަކަށްވެސް އިންޑިއާއި ޚިޔާލުތަފާތުކޮށް ރާއްޖެއިން ވަނީ ވޯޓު ދީފައެވެ.

ރާއްޖެއިން ޔުއެން ހިއުމަންރައިޓްސް ކައުންސިލްގެ ގޮޑި ކާމިޔާބު ކޮށްފައިވަނީ އޭޝިއާ ޕެސިފިކް ސަރަހައްދުން ވާދު ކުރިން 6 ގައުމުގެ ތެރެއިން އެކައުންސިލަށް އިންތިޚާބުކުރި 4 ގައުމުގެ ތެރެއިން ދެވަނައަށް އެންމެ ގިނައިން ވޯޓު ހޯދި ގައުމަކީ ރާއްޖެއެވެ.

ރާއްޖެ ހިމެނޭ އޭޝިއާ ޕެސިފިކް ސަރަހައްދުން ވާދަކުރި 6 ގައުމުގެ ތެރެއިން އެންމެ ގިނައިން ވޯޓު ހޯދާފައިވަނީ ބަންގްލަދޭޝްއިންނެވެ. ވޯޓުލީ 190 ގައުމުގެ ތެރެއިން އެގައުމަށް ލިބިފައިވަނީ 160 ވޯޓެވެ. ދެވަނައަށް އެންމެ ގިނައިން ވޯޓު ލިބުނީ ރާއްޖެއަށެވެ. މިގޮތުން ރާއްޖެއަށް ލިބިފައިވަނީ 154 ވޯޓެވެ. މި ގުރޫފުން ދެން އިންތިޚާބުވި ދެ ގައުމަކީ ވިއެޓްނާމްއާއި ކިރިގިސްތާންއެވެ. ވިއެޓްނާމަށް 145 ވޯޓު ލިބުނުއިރު ކިރިގިސްތާނަށް ލިބުނީ 126 ވޯޓެވެ. މި ސަރަހައްދުން ވާދަކުރި 6 ގައުމުގެ ތެރެއިން 5 ވަނައަށް އެންމެ ގިނަ ވޯޓު ހޯދި ސައުތު ކޮރެއާއަށް 123 ވޯޓު ލިބުނުއިރު އެންމެ ފުލަށް ދިޔަ އަފްއާނިސްތާނަށް ލިބިފައިވަނީ 12 ވޯޓެވެ. ބަހުރެއިން ނަން އަބުރާ ގެންގޮސްފައިވި ނަމަވެސް އެގައުމަށް 1 ވޯޓު ލިބިފައި ވެއެވެ.

2015-2023 ގެ ޔޫއެން ހިއުމަން ރައިސްޓް ކައުސިލްގެ ގޮނޑިއަށް ރާއްޖެ އިންތިޚާބު ވެގެން ގޮސްފައިވާއިރު، މީގެ ކުރިންވެސް ދެ ފަހަރެއްގެމަތިން ރާއްޖެވަނީ މި ކައުންސިލްގެ މެމްބަރުކަން ކޮށްފައެވެ. އެއީ އެންމެ ފުރަތަމަ 2011 އިން 2013 އަށެވެ. ދެވަނަ ފަހަރަށް ރާއްޖެއިން މިކައުންސިލްގެ މެމްބަރުކަން ކޮށްފައިވަނީ 2014 އިން 2016 އަހަރަށެވެ.

އަދި 2013 ވަނަ އަހަރު ރާއްޖެވަނީ އޭޝިއާ ޕެސިފިކް ގުރޫޕުގެ ފަރާތުން މި ކައުންސިލް ނާއިބު ރައީސްކަންވެސް އަދާ ކޮށްފައެވެ.