އިރާނުގައި ސިޔާސީ ކުށްވެރިން ހައްޔަރު ކޮށްފައި ތިބޭ، ވެރިރަށް ތެހެރާންގައި ހުންނަ މަޝްހޫރު އެވިން ޖަލުގައި ހިނގި ހަމަނުޖެހުންތަކެއްގައި އެ ޖަލުގައި ރޯވެ، 3 ގައިދީއަކު މަރުވެ 61 މީހަކަށް އަނިޔާ ވެއްޖެއެވެ.
މި ޖަލުގައި ހަމަނުޖެހުންތައް ހިނގާ އަލިފާނުގެ ހާދިސާއެއް ހިގާފައި މިވަނީ، އިރާނުގެ ފުލުހުންގެ ބެލުމުގެ ދަށުގައި ހުއްޓާ މަރުވި މަހުސާ އަމިނިގެ މަރާއި ގުޅިގެން ފާއިތުވެދިޔަ ސެޕްޓެމްބަރުމަހު އިރާނުގައި ފެށުނު މުޒާހިރާތަކުގައި މިހާތަނަށް އެތައް ސަތޭކަ ބަޔަކު މަރުވެފައި ވަނިކޮށެވެ.
އިރާންގެ ރަސްމީ ނޫސް އޭޖެންސީ IRNA ރިޕޯޓު ކޮށްފައި ވާގޮތުގައި މި ގައިދީން މަރުވެފައިވަނީ ދުމުގެ ސަބަބުންނެވެ. އަދި ނޫސް އޭޖެންސީން ބުނެފައިވަނީ މަރުވި 4 ގައިދީންނަކީވެސް ވައްކަމުގެ މައްސަލަތަކުގައި ޖަލަށް ލާފައިވާ މީހުން ކަމުގައެވެ.
އިރާނުގެ އެވިން ޖަލަކީ، ސިޔާސީ ކުށްވެރިންނާއި، ނޫސްވެރިންނާއި، ދެގައުމުގެ ރައްޔިތުކަން އޮންނަ މީހުންނާއި، އަދި ބޭރު މީހުންވެސް ޖަލަށް ލާފައި ތިބޭ ޖަލެވެ.
IRNA އިން ރިޕޯޓު ކޮށްފައިވާ ގޮތުގައި، މި ހާދިސާގައި އަނިޔާވި މީހުންގެ ތެރެއިން ހޮސްޕިޓަލުގައި އެޑްމިޓް ކުރާން ޖެހިފައިވަނީ އެންމެ 10 މީހުންނަށެވެ.
މީޑީއާތަކުން ރިޕޯޓު ކޮށްފައިވާ ގޮތުގައި މި ޖަލުގައި ރޯވާން މެދުވެރިވީ ގައިދީންނާއި ޖަލު ބަހައްޓާ ފަރާތްތަކާ ދެމެދު ހިނގި ހަމަނުޖެހުންތަކަށް ފަހުއެވެ.
އޮފިޝަލުން ވިދާޅުވެފައިވަނީ ގައިދީން ޖަލުގައި އަލިފާން ރޯ ކޮށްފައިވަނީ ޖަލުގެ ވެއަރހައުސްއެއްގައި ކަމުގައެވެ. ސޯޝަލް މީޑިއާގައި އާންމު ވެގެން ގޮސްފައިވާ ވޯޑިއޯތަކުން، ޖަލުންގައި ރޯވެ އަދި ދުން އަރަމުންދާ މަންޒަރުތައް ފެންނާން ހުރެއެވެ. އަދި މި ސަރަހައްދުން ބަޑީގެ އަޑުތައް އިވެން ހުރިއިރު ސަރުކާރާ ދެކޮޅު ޝުއޫރުގެ އަޑުތައްވެސް އިވިގެން ގޮސްފައި ވެއެވެ.
