ހުޅުމާލޭގައި ގާއިމުކޮށްފައިވާ 7000 ފްލެޓުގެ މަޝްރޫއު ހިންގުމަށް އެޗްޑީސީން ނަގާއިފައިވާ ދަރަނި އަދާކުރުމަށް، އެ މަޝްރޫއިން ލިބޭ ފައިސާގެ އަދަދު ލޯނު އަދާކުރުމަށް ބޭނުންވާ ފައިސާގެ އަދަދާ ނުބައްދަލުވުމުގެ ސަބަބުން އެ ކުންފުންޏަށް ދިމާވެފައިވާ ކޭޝްފްލޯގެ ދަތިކަމަށް ހައްލެއް ހޯދައިދިނުމުގެ ގޮތުން އެކަމަށް މި އަހަރު ކެޕިޓަލް ދޫކުރަން ސަރުކާރަށް ޖެހިފައިވާކަމަށް ފިނޭންސް މިނިސްޓްރީން އާންމު ކޮށްފައިވާ "ފިސްކަން ސްޓްރަޓެޖީ އަންގައިދޭ ބަޔާން 2023-2025″ ގައި ބުނެފިއެވެ.
މި ބަޔާނުގައި ވާގޮތުން، މި އަހަރުގެ މޭ މަހުގެ ނިޔަލަށް އެޗް.ޑީ.ސީއަށް ދައުލަތުގެ ބަޖެޓުން ކެޕިޓަލްގެ ގޮތުގައި 655.8 މިލިއަން ރުފިޔާ ލޯނު ދޫކުރުމަށް ދޫކޮށްފައި ވެއެވެ. އަދި މި އަހަރުގެ ތެރޭގައި އެ ކުންފުންޏަށް ކެޕިޓަލްގެ ގޮތުގައި ޖުމުލަ 1.2 ބިލިއަން ރުފިޔާ ދޫކުރަންޖެހޭނެކަމަށް މިހާރު ލަފާކުރެވޭ ކަމަށްވެސް ބުނެފައި ވެއެވެ. އަދި މިއީ މިއަހަރުގެ ބަޖެޓުގައި ހިމަނާފައި ނުވާ ޚަރަދެއްކަމަށްވެސް މި ބަޔާނުގައި ބުނެފައި ވެއެވެ.
7000 ފްލެޓް އެޅުމަށް ކުރީ ސަރުކާރުން ޗައިނާއިގެ އެގްޒިމް ބޭންކުން ލޯނު ނަގައިގެން އަޅާފައިވާ ފްލެޓްތަކުގައި މިހާރު ގިނަ އާއިލާތަކެއް ދިރިއުޅެން ފަށާފައިވާއިރު، ހިޔާ ފްލެޓުގައި ދިރިއުޅެމުންދާ 6،338 އާއިލާގެ ތެރެއިން 2،345 އާއިލާއިން (%37 އާއިލާއިން) ކުލި ނުދައްކާ ކަމަށާއި، މި ފަރާތްތަކުން ކުލި އަތުލުމަށް އެޗްޑިސީން މިހާތަނަށް މަސައްކަތް ކޮށްފައި ނުވާކަމަށްވެސް ވާރލްޑް ބޭންކުން ވަނީ ބުނެފައެވެ.
މި ރިޕޯޓުގައި ބުނެފައިވާ ގޮތުން ހިޔާ ފްލެޓްތަކުގައި ދިރިއުޅޭ އާއިލާތަކުގެ ތެރެއިން ކުލި ނުދައްކާ އާއިލާތަކަށް ކުލި ދެއްކުމަށް އިތުރު ފުރުސަތު ދީފައިވި ނަމަވެސް، މީގެތެރެއިންވެސް ގިނައީ ކުލި ނުދައްކާ އާއިލާތައް ކަމަށާއި، އަދި މި އާއިލާތަކުން ކުލި އަތުލުމަށް އިތުރު ފުރުސަތު ދިނުމުގެ އިތުރުން ކުލި އަތުލުމަށް އިތުރު މަސައްކަތްތަކެއް އެޗްޑީސީން ކުރަމުންވެސް ނުދާ ކަމުގައެވެ.
ވާރލްޑް ބޭންކުން ނެރެފައިވާ "މޯލްޑިވްސް ޑިވެލޮޕްމަންޓް އަޕްޑޭޓް" ރިޕޯޓުގައި ފާހަގަ ކޮށްފައިވާ ގޮތުން ހިޔާ ފްލެޓްތައް ނުނިންމާ އާއިލާތަކާއި ހަވާލުކުރުމުގެ ނަތީޖާއެއްގެ ގޮތުން، ފްލެޓްތައް ނިންމުމަށް ބޭންކުން ލޯނު ނަގަން ޖެހުމަކީވެސް ފްލެޓްތަކުގައި ދިރިއުޅެމުންދާ ފަރާތްތަކަށް ކުރިމަތިވެފައިވާ މާލީ ގޮންޖެހުމެއް ކަމުގައެވެ.
7000 ފްލެޓްގެ 16 ޓަވަރުގެ މައްޗަށް އެކުލެވޭ ހިޔާ މަޝްރޫއަކީ ރައީސް ޔާމިންގެ ވެރިކަމުގައި، 30،000 އަށްވުރެ ގިނަ އާއިލާއަށް ބޯހިޔާވަހިކަން ހޯދާދީ، މާލެއާއި ރާއްޖޭގެ އެކި ރަށްތަކަށް ކުރިމަތިވެފައިވާ ބޯހިޔާވަހި ކަމުގެ މައްސަލައަށް އެކަށީގެންވާ މިންވަރުގެ ހައްލެއް ހޯދާދީ، މިގޮތުން އުފެދިގެން ގޮސްފައިވާ ޝަކުވާތަކާއި މައްސަލަތަކަށް ތަސައްލީއެއް ހޯދާ ދިނުމުގެ މަގުސަދުގައި ކުރިޔަށް ގެންގޮސްފައިވާ މަޝްރޫޢެކެވެ.
މިގޮތުން މި 7،000 ފްލެޓް އިމާރާތް ކުރެވިފައިވަނީ ދެ ފަރާތަކުން ނަގާފައިވާ ލޯންތަކުން މަޝްރޫއަށް ފައިނޭންސް ކޮށްގެންނެވެ. މީގެ ތެރޭގައި ހިމެނެނީ، އިންޑަސްޓްރިއަލް އެންޑް ކޮމާޝަލް ބޭންކް އޮފް ޗައިނާ ލިމިޓެޑް (އައި.ސީ.ބީ.ސީ) އިން ނަގާފައިވާ 368,900,000 ޑޮލަރުގެ ލޯން ފެސިލިޓީއަކާއި ކްރެޑިޓް ސްއިސް އޭޖީ، ސިން ގަޕޯރ ބްރާންޗް (ސީ.އެސް) އިން ނަގާފައިވާ 65,100,000 ޑޮލަރުގެ ލޯން ފެސިލިޓީއާއި އެކު، ޖުމްލަ 434,000,000 މިލިއަން ޑޮލަރު ލޯންގެ ގޮތުގައި ދިވެހި ސަރުކާރުން ނަގައިގެންނެވެ.
ވާރލްޑް ބޭންކުގެ ރިޕޯޓުގައި ބަޔާން ކޮށްފައިވަނީ މި މަޝްރޫއަކީ ރާއްޖެއަށް ކުރިމަތިވެފައިވާ ބޯހިޔާވަހިކަމުގެ ހައްލު ހޯދުމަށް އެންމެ އެކަށީގެންވާ މޮޑެލްއެއް ނޫން ކަމުގައެވެ.
