ޔޫއެންގެ ޖެނެރަލް އެސެމްބްލީގެ 193 ގައުމުގެ ތެރެއިން 143 ގައުމުގެ ބޮޑު އަޢުލަބިއްޔަތަކާއެކު، ރަޝިއާއިން ޔޫކުރެއިންގެ 4 ސަރަހައްދެއް އަމިއްލަކުރި ކުރުން ކުށްވެރިކޮށް ގަރާރެއް ފާސް ކޮށްފިއެވެ.
ޔޫއެންގެ އާންމު މަޖިލީހުގެ ބޮޑު އަޢުލަބިއްޔަތަކާއެކު ފާސްކުރި މިގަރާރާ ދެކޮޅަށް އެންމެ 5 ގައުމަކުން ވޯޓު ދީފައިވާއިރު، އިންޑިއާ ހިމެނޭގޮތުން 35 ގައުމަކުން އެއްވެސް ކޮޅަކަށް ވޯޓު ދީފައެއް ނުވެއެވެ.
އާންމު މަޖިލީހުން ފާސްކުރި މި ގަރާރުގައި، ބައިނަލްއަގުވާމީ ގާނޫނުތަކާ ޚިލާފަށް ރަޝިއާއިން ޔޫކުރެއިންގެ ހަތަރު ސަރަހައްދަކީ އެގައުމުގެ ސަރަހަދުތައްކަމަށް ކަނޑައެޅިއެޅުން ކުށްވެރި ކުރުމުގެ އިތުރުން ރަޝިއާގެ މި ނިންމުން ބާތިލް ކުރުމަށްވެސް ވަނީ ގޮވާލާފައެވެ.
ޔޫއެން ޖެނެރަލް އެސެމްބްލީން ފާސްކުރި މި ގަރާރުން ދޭހަ ކޮށްދެނީ، 7 މަސްވީ މި ހަގުރާގައި ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތާއި ދުނިޔެ ދެކޮޅު ހަދަމުންދާ މިންވަރެވެ.
އަދި މި ގަރާރު ވެގެން ގޮސްފައިވަނީ ފާއިތުވި ފެބްރުއަރީމަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭންފެށިފަހުން ރަޝިއާގެ އުދުވާން ކުށްވެރިކޮށް އާންމު މަޖިލިހުން ފާސްކޮށްފައިވާ 4 ގަރާރުގެ ތެރެއިން އެންމެ ބޮޑު ތާއީދެއް ލިބިގެން ގޮސްފައިވާ ގަރާކަމުގައިވެސް މެއެވެ.
މި ވޯޓަށްފަހު، ޔޫއެންއަށް ޔޫކުރެއިން ކަނޑައަޅާފައި ހުންނަވާ ދާއިމީ މަންދޫބު ވިދާޅުވެފައިވަނީ، މި ގަރާރަކީ މިއީ ނ"ތާރީޚީ ގަރާރެއް" ކަމުގައެވެ.
އާންމު މަޖިލިހުން ފާސްކުރި މި ގަރާރު ފާސްކުރިއިރު އެއްވެސް ކޮޅަކަށް ވޯޓު ދީފައި ނުވާ 35 ގައުމުގެ ތެރޭގައި އެފްރިކާ ބައްރަށް ނިސްބަތްވާ 19 ގައުމެއް ހިމެނެއެވެ. އޭގެތެރޭގައި ދެކުނު އެފްރިކާވެސް ހިމެނެއެވެ. އަދި ދުނިޔޭގެ އެންމެ އާބާދީ ބޮޑު ދެގައުމު ކަމުގައިވާ އިންޑިއާއާއި ޗައިނާއިން އެއްވެސް ކޮޅަކަށް ވޯޓު ދީފައި ނުވާއިރު، ޕާކިސްތާންއާއި ކިއުބާއިންވެސް އެއްވެސް ކޮޅަކަށް ވޯޓު ދީފައެއް ނުވެއެވެ.
ގަރާރަށް ތާއީދުކޮށް ވޯޓު ދީފައިނުވާ 5 ގައުމުގެ ތެރޭގައި ހިމެނެނީ ރަޝިއާގެ އިތުރުން، ސީރިއާއާއި، އުތުރުކޮރެއާ، ބެލަރޫސްއާއި ނިކަރާގުއާއެވެ.
ޔޫކުރެއިން ހަނގުރާމާގައި، ރަޝިއާއިން ހިފާފައިވާ ޑޮނެސްކް، ލުހާންސްކް، ޚާސަންގެ އިތުރުން ޒެޕޯރިޒިއާ އަކީ ރަޝިއާގެ ސަރަހައްދުތައްކަމަށް ރަސްމީކޮށް ނިންމާފައިވަނީ މި ސަރަހައްދުގައި ޚިޔާލު ހޯދުމުގެ ނަމުގައި، ފާއިތުވި ސެޕްޓެމްބަރުމަހުގެ 23 އިން 27 އަށް، ރަޝިއާއިން ބޭއްވި ފެންނަ ނުފެންނަ ވޯޓަކަށްފަހުއެވެ. ރަޝިއާއިން ބުނެފައިވަނީ މި ސަރަހައްދުތަކުގެ އާންމު ރައްޔިތުން ރަޝިއާއާއި ގުޅެން ބޭނުންތޯ ބެލުމުގެ ނަމުގައި، ނެގި ފެންނަ ނުފެންނަ ވޯޓުގެ ނަތީޖާއިން އެ ސަރަހައްދުތައް އެގައުމާއި ގުޅުމަށް ބޮޑު އައުލަބިއްޔަތެއް ވޯޓު ދީފައިވާކަމުގައެވެ.
އެއަށްފަހު، ފާއިތުވެދިޔަ ސެޕްޓެމްބަރުމަހުގެ 30ވަނަ ދުވަހު ކްރެމްލިންގައި ބޭއްވުނު ރަސްމިއްޔާތެއްގައި، މި ސަރަހައްދުތަކަކީ ރަޝިއާގެ ސަރަހައްދުތަކުގެ ގޮތުގައި ރަސްމީކޮށް ވަނީ ކަނޑައަޅާފައެވެ. މި ރަސްމިއްޔާތުގައި މި ސަރަހައްދުތަކަށް ރަޝިއާއިން އައްޔަންކުރި އިސްވެރިންނާއި ރަޝިއާގެ ރައީސް ޕުޓިން ވަނީ، މި 4 ސަރަހައްދަކީވެސް ރަޝިއާގެ ބައެއްގެ ގޮތުގައި ނިންމުމަށްޓަކާ ލިޔެކިޔުންތަކުގައި ސޮކުރައްވާފައެވެ.
ޔޫކުރެއިންގެ ސަރަހައްދު ތަކަކީ އެގައުމުގެ ބައެއްގެ ގޮތުގައި ރަޝިއާއިން ނިންމުމާއި ގުޅިގެން ޔޫކުރެއިންއިން ބުނެފައިވަނީ މި ނިންމުމާއި ގުޅިގެން ކުރިޔަށްދާ ހަގުރާމައަށް އެއްވެސް ބަދަލެއް ނާންނާނެކަމަށާއި، އަގައުމުގެ ހުރިހާ ސަރަހައްދެއްވެސް އަބުރާ ހޯދުމަށް ހަގުރާމަ ކުރަމުން ދާނޭކަމުގައެވެ. އެމެރިކާއާއި ޔޫރަޕްގެ ގައުމުތަކުން ބުނެފައިވަނީ އެގައުމުތަކުން ދުވަހަކުވެސް މިސަރަހައްދުތައް ރަޝިއާގެ ސަރަހައްދުތަކުގެ ގޮތުގައި ބަލައި ނުގަންނާނޭ ކަމުގައެވެ.
