ބޮލީވުޑްގެ ސުޕަސްޓަރ ޝާހްރުކް ޚާނާއި ސައުތުގެ މަޝްހޫރު ބަތަލާ ނަޔަންތަރާ އެކުގައި ފެނިގެންދާ ފިލްމު "ޖަވާން"ގެ މިހާރު ކުރިޔަށް ދަނީ އެންމެ ފަހުގެ ޝޫޓިންގް ޝެޑިއުލް ކަމަށް ޚަބަރުތައް ބުނެފިއެވެ.
2018 ވަނަ އަހަރު ނެރުނު ޝާހުގެ ފިލްމު "ޒީރޯ" ފްލޮޕް ވުމާއި ގުޅިގެން ފިލްމީ ދާއިރާއިން ބްރޭކެއް ނެގުމަށްފަހު ޝާހު މިހާރު އަނެއްކާވެސް އުޅެމުން އަންނަނީ ފިލްމީ މަސައްކަތުގައި ވަރަށް ބިޒީކޮންނެވެ.
އެގޮތުން އޭނާ އެނބުރި އައުން ފާހަގަ ކުރާ ފިލްމު "ޕަތާން"ގެ މަސައްކަތްތައް ވެސް މިހާރު އަންނަނީ ވަރަށް ބާރު ސްޕީޑުގައި ކުރަމުންނެވެ.
"ޖަވާން" އަކީ ނަޔަންތަރާ ބޮލީވުޑަށް ތައާރަފްވާ ފިލްމެވެ. އަދި މިއީ މި ދެތަރިން އެކުގައި ފެނިގެންދާ ފުރަތަމަ ފިލްމު ވެސް މެއެވެ.
އަތުލީ ކުމާރު ޑައިރެކްޓްކުރާ މި ފިލްމު ނެރޭ ގޮތަށް އޮތީ އަންނަ އަހަރުގެ ޖޫން މަހުގެ 2 ވަނަ ދުވަހުއެވެ. މިއީ އޭނާގެ ފިލްމެއްގައި ޝާހު މަސައްކަތްކުރާ ފުރަތަމަ ފަހަރެވެ.
ޝާހްގެ އަމިއްލަ ޕްރޮޑަކްޝަން ހައުސް ރެޑް ޗިލީސް އެންޓަޓެއިންމެންޓުން އުފައްދާ މި ފިލްމުގެ ޑައިރެކްޓަރަކީ އަތުލީއެވެ. މީގެ ކާސްޓުގައި ޝާހްރުކާއި ނަޔަންތަރާގެ އިތުރުން ސަނާޔާ މަލްހޮތުރާ އަދި ސުނިލް ގްރޯވަރުވެސް ހިމެނެއެވެ.
