ދުނިޔޭގެ އެންމެ ވަރުގަދަ ސޯޝަލް މީޑިއާ ޕްލެޓްފޯމްތަކުގެ ތެރޭގައި ހިމެނޭ ފޭސްބުކްއާއި އިންސްޓަރގްރާމް ހިންގަމުންދާ، އެމެރިކާގެ ޓެކް ކުންފުނި މެޓަ ޕްލެޓްފޯމްސް އިންކް ކުންފުންޏަކީ "ހައްދު ފަހަނައަޅާފައިވާ ޓެރަރިސްޓު" ގުރޫޕެއްކަމަށް ރަޝިއާގެ ފައިނޭންޝަލް މޮނިޓަރިން އޭޖެންސީ ރޮސްފިންމޮނިޓަރިން ކަނޑައަޅައިފިކަމަށް އިންޓަރފެކްސް ނޫސް އޭޖެންސީން ރިޕޯޓު ކޮށްފިއެވެ.
ފާއިތުވި މާރޗްމަހު ރަޝިއާއިން ވަނީ، އެގައުމުގެ ރައީސް ލާޑިމިރު ޕުޓިންއާއި އަދި އެގައުމުގެ ސިފައިންނާމެދު ބައެއް ގައުމުތަކުގައި ނަފްރަތު އުފެއްދުން މެޓަ ކުންފުނިން ހުއްދަ ކޮށްފައިވާކަމަށް ބައެއް މީޑިއާތަކުގައި ރިޕޯޓުކޮށްފައިވާ މައުލޫމާތުތަކަކީ ދެތު މައުލޫމާތުތަކަށް ވެއްޖެނަމަ، މެޓަ ކުންފުނި ރަޝިއާގައި ހިންގުން މަނާކުރާނެކަމުގެ އިންޒާރު އެގައުމުން ދީފިއެވެ.
އަދި މާރޗްމަހު ފަހުކޮޅު ރަޝިއާއިންވަނީ، ޔޫކުރެއިންއިން އެގައުމުން ހިންގަމުންދާ އަސްކަރީ ކެމްޕޭނާއި ގުޅިގެން "ރަސޯފޯބިއާ" (ރަޝިއާ ދެކޮޅަށް ނަފްރަތު އުފެއްދުން) މެޓައިން ހުއްދަ ކޮށްފައިވާކަމަށް ބުނެ ފޭސްބުކްއާއި އިންޓަގްރާމް އެގައުމުގައި މަނާ ކޮށްފައެވެ.
މާރޗްމަހުގެ 10 ވަނަ ދުވަހު މެޓައިން ބުނެފައިވަނީ "ރަޝިއާގެ އިސްތިއުމާރީ ސިފައިންނަށް މަރު" މިފަދަ އިބާރާތްތައް ބޭނުން ކުރުން އެ ޕްލެޓްފޯމުގައި ބޭނުންކުރުން ހުއްދަ ކުރުމަށް ނިންމާފައިވާ ކަމުގައެވެ. އެހެންނަމަވެސް އާންމު ރައްޔިތުންނަށް ސީދާ ނުރައްކާވާފަދަ އިބާރާތްތައް ހުއްދަ ނުކުރާނެ ކަމަށްވެސް ބުނެފައި ވެއެވެ. އެއަށްފަހު މެޓަ ކުންފުނިން ބުނެފައިވަނީ މި އިބާރާތްތައް ހުއްދަ ކުރާނީ ޔޫކުރެއިންގައި ތިބޭ ފަރާތްތަކަށް އެކަނި ކަމުގައެވެ.
މެޓަކުންފުނީގެ ސިއްރު ބައެއް މުޢާމަލާތުތަކާ ހަވާލާދީ ރޮއިޓާރސްއިން މާރޗްމަހު ރިޕޯޓު ކޮށްފައިވާ ގޮތުގައި ރަޝިއާގެ ސިފައިންނާއި ދެކޮޅަށް ނަފްރަތު އުފެދޭ ވާހަކަތައް މި ޕްލެޓްފޯމްތަކުގައި ދެއްކުން ހުއްދަ ކުރެވިފައިވާ ގައުމުތަކުގެ ތެރޭގައި ހިމެނެނީ އަރުމީނިއާ، އާޒަރުބައިޖާން، އެސްޓޯނިއާ، ޖޯޖިއާ، ހަންގޭރީ، ލެޓްވިއާ، ލިތުއޭނިއާ، ޕޮލޭންޑު ރަޝިއާ، ސްލޮވާކިއާގެ އިތުރުން ޔޫކުރެއިންއެވެ.
މިއަހަރުގެ މާރޗްމަހުން ފެށިގެން ފޭސްބުކް އަދި އިންސްޓަގްރާމް ރަޝިއާގެ ވަނީ ބޭނުން ނުކުރެވޭގޮތް ހަދާފައެވެ. އެހެންނަމަވެސް ރަޝިއާ މީހުން ދަނީ އެއަށްފަހު ވީޕީއެން ބޭނުންކޮށްގެން ސޯޝަލް މީޑިއާ އެގައުމުގައި ބޭނުން ކުރަމުންނެވެ.
