ރަޝިއާއިން ހިފާފައިވާ ޔޫކުރެއިންގެ ކްރައިމިއާއާއި ރަޝިއާ ގުޅުވައިދޭ ބްރިޖްގައި ބޮޑު ގޮވުމެއް ގޮވާ، ބްރިޖްގެ ބޮޑުބައި ބިމާއި ހަމަވެއްޖެއެވެ.
ރަޝިއާއި ބުނެފައިވަނީ މި ބްރިޖްގައި ގޮވާފައިވަނީ ތެޔޮ އުފުލާ ލޮރީއެއް ކަމުގައެވެ. ރަޝިއާގެ ރިއާ ޓީވީން ރިޕޯޓު ކޮށްފައިވާ ގޮތުގައި މި ބްރިޖްގައި ބޮޑު ގޮވުމެއް ގޮވުމާއި ގުޅިގެން މި ހަދިސާގެ ޖިނާއީ ތަހުގީގެއް ހިންގުމަށް ރަޝިއާގެ ރައީސް ލާޑިމިރް ޕުޓިންވަނީ އަމުރު ކުރައްވާފައެވެ.
"މިހާތަނަށް ލިބިފައިވާ މައުލޫލާތު ތަކަށް ބަލާއިރު ކްރައިމިއާ ބުރިޖްގެ އެއްބައިގައި ތެޔޮ އުފުލާ ލޮރީއެއް ވަނީ ގޮވާފަ، އެހެންނަމަވެސް ކަނޑުމަގުން ދަތުކުރާ ޗެނަލްތަކަށް ގެއްލުމެއް ލިބިފައެއް ނުވޭ،" ރަޝިއާގެ ރިއާ މީޑިއާއިން ރިޕޯޓު ކޮށްފައި ވެއެވެ.
މި ބުރިޖު ގޮވުމާއި ގުޅިގެން ބްރިޖްގެ ޓެރެފިކް ވަގުތީގޮތުން ވަނީ ހުއްޓާލާފައެވެ.
ރަޝިއާއިން 2014 ވަނަ އަހަރު ޔޫކުރެއިންގެ ކްރައިމިއާ ސަރަހައްދު އެގައުމުގެ ބައެއްގެ ގޮތުގައި ކަނޑައެޅުމަށްފަހު ރަޝިއާއާއި މި ސަރަހައްދު ގުޅުވާލުމުގެ ގޮތުން ޕުޓިންގެ އަމުރަށް ރަޝިއާއިން އަޅާފައިވާ މި ބުރިޖަކީ މިހާރު ހިގަމުންދާ ހަގުރާމާގައި، ރަޝިއާ ސިފައިންނަށް ބޭނުންވާ ސަޕްލައިތައް ފޯރުކޮށްދިނުމަށް ފުޅާ ދާއިރާއެއްގައި ބޭނުން ކުރަމުންދާ މަގެކެވެ.
މި ބުރިޖްގައި ބޮޑު ގޮވުމެއް ގޮވާ ބުރިޖްގެ ބޮޑު ބައެއް ވެއްޓުމާއި ގުޅިގެން ޔޫކުރެއިން ބުނެފައިވަނީ، މިއީ ވައްޓާލަން ޖެހިފައިވާ ބުރިޖެއް ކަމަށާއި، ރަޝިއާއިން ނުހައްގުން ހޯދާފައިވާ ހުރިހާ ތަކެއްޗެއްވެސް އެގައުމަށް އުބުރާ ދޭންޖެހޭނެ ކަމަށާއި، އެހެން ނޫންނަމަ އެތަކެތި ޖެހޭނީ ނައްތާލަން ކަމުގައެވެ.
ރަޝިއާގެ ފޮރިންގ މިނިސްޓްރީން ބުނެފައިވަނީ، ބްރިޖް ގޮވި ހާދިސާގައި ޔޫކުރެއިންގެ ސަރުކާރުން އުފާ ފާޅުކުރުން ދޭހަކޮށްދެނީ އެގައުމުގައި އޮތީ ޓެރަރިސްޓު ސަރުކާރެއްކަމެވެ.
މި ހާދިސާ ތަހުގީގު ކުރުމަށް ރަޝިއާއިން އެކުލަވާލާފައިވާ ކޮމިޓީން ބުނެފައިވަނީ މި ހާދިސާގައި 3 މީހަކު މަރުވެފައި ވާކަމުގައެވެ.
