ހދ. ނޭކުރެންދޫ ގައި އެޅުމަށް ހަމަޖެހިފައިވާ އިންޑަސްޓްރިއަލް ޕްރިޒަންގެ ފޭސް 1 ގެ އެއްބަސްވުމުގައި ސޮއިކޮށްފިއެވެ.
މި އެއްބަސްވުމުގެ ދަށުން މި މަސައްކަތް ހަވާލުކޮށްފައިވަނީ، ޔުނިކް ޗޮއިސް ޕްރައިވެޓް ލިމިޓެޑާއެވެ. މި އެއްބަސްވުމުގައި މިނިސްޓްރީ އޮފް ހޯމް އެފެއަރޒްގެ ފަރާތުން ސޮއި ކުރެއްވީ ޕާމަނަންޓް ސެކްރެޓަރީ އަބްދުއްރަޙްމާން ޞަލާޙް ރަޝީދު. ޔުނިކް ޗޮއިސް ގެ ފަރާތުން ސޮއި ކުރެއްވީ އެކުންފުނީގެ މެނޭޖިން ޑިރެކްޓަރ ރިޔާޒް އަލީއެވެ.
ނޭކުރެންދޫ ޖަލުގެ މަސައްކަތުގެ ފޭސް 1ގެ މަސައްކަތް ހަވާލުކޮށްފައިވަނީ، ޖަލުގެ މަސައްކަތް ނުފެށޭތީ ނޭކުރެންދޫގެ ރައްޔިތުންނާއި އެދާއިރާގެ މެންބަރު މުޙައްމަދު ރަޢީ ކަންބޮޑުވުން ފާޅުކޮށްފައިވަނިކޮށެވެ.
ޖަލުގެ މަސައްކަތް ހަވާލުކުރިނަމަވެސް، ހދ.ނޭކުރެންދޫގައި ސަރުކާރުން ޢިމާރާތްކުރުމަށް ވަޢުދުވި ރިހިބިލިޓޭޝަން ސެންޓަރު ނުވަތަ ޖަލު މި ދައުރުގެ ތެރޭގައި ނުނިމޭނެކަމަށް ހޯމް މިނިސްޓަރ ދާދިފަހުން ވަނީ ވިދާޅުވެފައެވެ.
މި އެއްބަސްވުމުގައި މިނިސްޓްރީ އޮފް ހޯމް އެފެއަރޒްގެ ފަރާތުން ސޮއި ކުރެއްވީ ޕާމަނަންޓް ސެކްރެޓަރީ އަބްދުއްރަޙްމާން ޞަލާޙް ރަޝީދު. ޔުނިކް ޗޮއިސް ގެ ފަރާތުން ސޮއި ކުރެއްވީ އެކުންފުނީގެ މެނޭޖިން ޑިރެކްޓަރ ރިޔާޒް އަލީ. 2/2 pic.twitter.com/aAg1AZdMFd
— Home Ministry, MV (@HomeMinistrymv) October 8, 2022
ނޭކުރެންދޫގައި މިދައުރުގެ ތެރޭގައި ޖަލެއް އަޅާނެކަމަށް ސަރުކާރުން ދިޔައީ ތަކުރާރުކޮށް ބުނަމުންނެވެ. މި މަޝްރޫޢު ލަސްވާތީ މަކުނުދޫ ދާއިރާގެ މެންބަރު މުޙައްމަދު ރާޢީ ވަނީ އެތައް ފަހަރަކު ހޯމް މިނިސްޓަރ ޢިމްރާން މަޖިލީހަށް ހާޒިރުކޮށް ސުވާލުކުރައްވާފައެވެ. އަދި މިނިސްޓަރ ވަނީ ޖަލު އަޅާނެކަމުގެ ޔަޤީންކަންވެސް ދެއްވާގައެވެ. ނަމަވެސް މިހާތަނަށް އެކަމުގެ މަސައްކަތް ނުކުރެވޭތީ ރާޢީ ވަނީ މިނިސްޓަރ ޢިމްރާނަށް ފާޑުވިދާޅުވެ ހިތްޕުޅު ހަމަނުޖެހުންވެސް ފާޅުކުރައްވާފައެވެ.
މިގޮތުން އެ ޖަލްސާގައިވެސް މެންބަރު ރާޢީ ވަނީ ނޭކުރެންދޫ ޖަލުގެ މަސައްކަތް ގޮސްފައިވާ ހިސާބެއް ލިޔުން ޖަވާބު ހޯދުމަށް އެދިފައެވެ. މި ސުވާލުގެ ޖަވާބުގައި މިނިސްޓަރ ވަނީ ވަރަށް ދިގުކޮށް ޖަވާބު ދެއްވާފައެވެ. އެ ޖަވާބުގައި މިނިސްޓަރ ވިދާޅުވީ، އަންނަ އަހަރުގެ ނިޔަލަށް ނިންމައިލެވޭނީ ޖަލުގެ ވަށާފާރުގެ މަސައްކަތާއި ޖަލު ކުރެހުމުގެ މަސައްކަތް އެކަނިކަމަށެވެ. މިނިސްޓަރ ވިދާޅުވީ ޖަލުގެ މަސައްކަތް ލަސްވާ އެއް ސަބަބަކީ އެ މަސައްކަތަށް ސަރުކާރުގެ ބަޖެޓުގައި ހިމެނި ފައިސާގެ އަދަދު މަދުވުމުންނެވެ. މިއަހަރުގެ ބަޖެޓުގައި އެ މަސައްކަތަށް ކަނޑައަޅާފައި އޮތީ 10 މިލިޔަން ރުފިޔާ ކަމަށާއި އަންނަ އަހަރަށް ވެސް ހިމަނާނީ 10 މިލިޔަން ރުފިޔާކަމަށާއި، މި ދައުރުގައި ނޭކުރެންދޫ ޖަލުގެ މަސައްކަތް ނުނިމުނަސް އެއީ ޖަލުގެ ހާލަތު ރަނގަޅުކުރަން ކޮންމެހެން ކުރިއަށް ގެންދަން ޖެހޭ މަޝްރޫއަކަށް ވާތީ ކުރިއަށް އޮތް ދައުރުގައި ވެސް އެ މަސައްކަތް ހުއްޓާނުލައި ކުރިއަށް ގެންގޮސް ނިންމާނެ ކަމަށް ގަބޫލުކުރައްވާ ކަމަށް މިނިސްޓަރ ވިދާޅުވިއެވެ.
މި ފައިސާއިން 2023 ވަަނަ އަހަރުގެ ނިޔަލަށް ނިންމައިލެވޭނެ ކަމަށް އެސްޓިމޭޓްކުރެވެނީ ޖަލުގެ ވަށާ ފާރާއި އަދި ޖަލުގެ ކޮންސެޕްޓާއި ތަފްސީލުކޮށް ކުރެހުމުގެ މަސައްކަތްތައް.
– މިނިސްޓަރ ޢިމްރާން ވިދާޅުވިއެވެ.
ހދ. ނޭކުރަންދޫގައި ޖަލެއް ހެދުމަށް 2020ވަނަ އަހަރުގެ ބަޖެޓުންވަނީ 4.17 މިލިޔަން ރުފިޔާ ހިމަނާ ފައެވެ. ކޯވިޑް-19 އާއި ގުޅިގެން މަސައްކަތް ހުއްޓިފައިވީނަމަވެސް އަލުން އެމަސައްކަތް ފެށުމަށްޓަކައި މަސައްކަތްކުރެވެމުްނދިޔަކަމަށް ހޯމް މިނިސްޓަރ އިމްރާން ކުރިންވަނީ ވިދާޅުވެފައެވެ.
ނޭކުރެންދޫގައި ޖަލެއް ހެދުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ރިޔާސީ ވައުދުފުޅަކަށް ވުމާއެކު އެޖަލު ވެގެންދާނީ އެތަނުގައި ރިހިބިލިޓޭޝަން ފަރުވާދެވި، ބައެއް ކަހަލަ ކުށްކޮށްފައިވާ ޤައިދީން އަލުން އަވަހަށް މުޖުތަމައަށް ނެރެވޭފަދަ އިންތިޒާމު ތަކާއެކު ހަދާ ޖަލަކަށް ވާނެކަމަށް ހޯމް މިނިސްޓަރ ވަނީ މީގެ ކުރިންވެސް އެކި ފަހަރު މަތީން ވިދާޅުވެފައެވެ.
