ދުނިޔޭގަ ދެވޭ ސުލްހައިގެ އެންމެ ޝަރަފްވެރި އިނާމް ކަމުގައިވާ، "ނޯބެލް ޕީސް ޕްރައިޒް" ބެލަރޫސް ހިއުމަން ރައިޓްސް އެކްޓިވިސްޓެއް ކަމަށްވާ އޭލްސް ބިއަލިއާސްކީ އަށާއި ރަޝިއާ އަދި ޔޫކުރެއިންއަށް ނިސްބަތްވާ، އިންސާނީ ހައްގުތަކަށް މަސައްކަތް ކުރާ ދެ ޖަމިއްޔާއަކުން ކާމިޔާބު ކޮށްފައިވާކަން ނޯބެލް ޕީސް ޕަރައިޒް ކޮމިޓީން އިއުލާން ކޮށްފިއެވެ.
އޭލްސް ބިއަލިއާސްއަށް މި އިނާމް އެވާޑް ކޮށްފައިވަނީ ބެލަރޫސްގެ އިންސާނީ ހައްގުތަކަށް ވަކާލާތު ކުރުމަށް އޭނާ ކޮށްފައިވާ މަސައްކަތްތަކުގެ އަގު ވަޒަން ކުރުމުގެ ގޮތުންނެވެ. ބެލަރޫސްގެ ސަރުކާރުންވަނީ 2020 ވަނަ އަހަރުން ފެށިގެން، އެއްވެސް ޝަރީއަތަކާނުލާ އޭލާ ޖަލުގައި ބަންދުކޮށްފައެވެ. އަދި އޭނާއަކީ، ބެލަރޫސްގެ މުވައްސަސާތަކުން، ސިޔާސީ ކުށްވެރިންނާއި ދެކޮޅަށް ހިންގާފައިވާ އިންސާނިއްޔަތާއި ޚިލާފް ޖަރީމާތައް އެއްކޮށް ރައްކާކުރަމުންދާ ޖަމިއްޔާއެއް ކަމުގައިވާ "ވިއަސްނާ"ގެ ފައުންޑަރއެވެ.
އޭނާގެ އިތުރުން މިއަހަރުގެ ނޯބެލް ސުލްހައިގެ އިނާމް ހާސިލްކޮށްފައިވާ އަނެއް ދެ ފަރާތަކީ ރަޝިއާގެ އިންސާނީ ހައްގުތަކަށް ވަކާލާތުކުރާ ޖަމިއްޔާއެއް ކަމުގައިވާ މެމޯރިއަލް އާއި، ޔޫކުރެއިންގެ އިހްސާނީ ހައްގުތަކަަށް މަސައްކަތްކުރާ ޖަމިއްޔާއެއް ކަމުގައިވާ ދަ ސެންޓަރ ފޯރ ސިވިލް ލިބަރޓީސްއެވެ.
މި ދެ ޖަމިއްޔާއަށްވެސް މި އިނާމް ލިބިފައިވަނީ ހަގުރާމައިގެ ޖަރީމާތަކާއި، އިންސާނީ ހައްގުތަކާއި ޚިލާފަށް ހިންގަމުންދާ ޖަރީމާތަކާއި އަދި ބާރުގެ ބޭނުން ނަހަމަ ގޮތުގައި ކުރުމަށް ހިންގަމުންދާ އަމަލުތައް ޑޮކިއުމަޓް ކުރުމަށް (އެއްކޮށް، ލިޔެކިޔުތަކުގައި އެކުލަވާލުމަށް) މި ފަރާތްތަކުން ކުރަމުންދާ މަސައްކަތްތަކުގެ އަގު ވަޒަން ކުރުމުގެ ގޮތުންނެވެ.
މި ފަރާތްތަކުން މިއަހަރުގެ ނޯބެލް ސުލްހައިގެ އިނާމް ކާމިޔާބު ކޮށްފައިވާކަން އިއުލާން ކޮށްފައިވަނީ ނޯވޭގެ ވެރިރަށް އޮސްލޯގައެވެ.
މީގެ ކުރިން ނޯބެލް ސުލްހައިގެ އިނާމް ހާސިލް ކޮށްފައިވާ ފަރާތްތަކުގެ ތެރޭގައި، އެމެރިކާގެ ކުރީގެ ރައީސް ބަރަކް އޮބާމާ (2009 ގައި) އާއި، މަލާލާ ޔޫސަފްޒައި (2014 ގައި) ހިމެނެއެވެ.
ނޯބެލް ސުލްހައިގެ އިނާމަކީ 900،000 އެމެރިކާ ޑޮލަރިގެ އަގުހުރި އިނާމެކެވެ. މިއަހަރުގެ މި އިނާމް 3 ފަރާތަކަށް ލިބުމާއި ގުޅިގެން މި ފައިސާ ހިއްސާ ކުރާނީ މި ތިން ފަރާތުންނެވެ. އަދި މި ފަރާތްތަކާއި މި އިނާމް ހަވާލުކުރުމަށް ހަމެޖެހިފައިވަނީ އަންނަ ޑިސެމްބަރުމަހުގެ 10 ވަނަ ދުވަހުއެވެ. އެއީ މި އިނާމް ނިސްބަތްވާ އަލްފްރެޑް ނޯބެލް ދުނިޔެ ދޫކުރި ދުވަހެވެ.
މި އެވާރޑް ނިސްބަތްވާ، ޑައިނަމައިޓް ހޯދި ސުވިޑްންގެ އަލްފްރެޑް ނޯބަލް ވަނީ 1895 ވަނަ އަހަރު، އޭނާގެ މިލްކިއްޔާތުގެ ބޮޑުބައި ބޭނުންކޮށްގެން އިންސާނިއްޔަތަށް އެހީތެރިވެދޭ ފަރާތްތަކަށް ޚާއްސަކޮށް ފަންޑެއް އުފައްދާފައެވެ.
އަދުގެ ދުނިޔޭގައި މި އިނާމް ދެވެމުންދަނީ އާ ހޯދުންތަކާއި ދުނިޔެއަށް އާދަޔާ ޚިލާފް ޚިދުމަތްތައް ކޮށްދޭ ފަރާތްތަކުގެ ޚިދުމަތްތަކުގެ އަގު ވަޒަން ކުރުމުގެ ގޮތުންނެވެ.
