އަންނަ މަހު 20 ވަނަ ދުވަހު ގަތަރުގައި ފަށާ ފީފާ ވޯލްޑް ކަޕަކީ އޭނާ ފެންނާނެ ފަހު ވޯލްޑް ކަޕް ކަމަށް އާޖެންޓީނާގެ ކެޕްޓަން، ލިއޮނަލް މެސީ ބުނެފިއެވެ.
އާޖެންޓީނާގެ ނޫސްވެރިޔާ، ސެބަސްޓިއަން ވިނޯލޯ އަށް ދިން އިންޓަވިއުއެއްގައި މިހާރު ހުރި އެންމެ މޮޅު އެއްކުޅުންތެރިޔާ ކަމަށްވާ މެސީ ބުނެފައިވަނީ މިއަހަރުގެ ވޯލްޑް ކަޕަކީ އޭނާ ފެނިގެންދާނެ ފަހު ވޯލްޑް ކަޕް ކަމަށާއި މިއީ ބައިނަލް އަގްވާމީ މުބާރާތަކުން ފެނިގެންދާނެ ފަހު ފަހަރު ކަމަށް ބުނަން އުނދަގޫ ކަމަށެވެ.
"މިއީ އަހަރެން ފެންނާނެ ފަހު ވޯލްޑް ކަޕް ކަން ޔަގީން. އަހަރެން މިއަންނަނީ ވޯލްޑް ކަޕަށް ދުވަސް ވެސް ގުނަމުން. ހަގީގަތުގައި ވަރަށް އުނދަގޫ މިއީ ފަހު ވޯލްޑް ކަޕޭ ބުނަން،" މެސީ ބުންޏެވެ.
މެސީ ވަނީ ހަތަރު ވޯލްޑް ކަޕެއްގައި އާޖެންޓީނާ ތަމްސީލްކޮށްދީފައެވެ. އުމުރުން 35 އަހަރުގެ މެސީ ވަނީ ވާރލްޑްގައި 19 މެޗް މިހާތަނަށް ކުޅެ 6 ލަނޑު ޖަހާފައެވެ. އޭނާއަށް މިމުބާރާތުގައި ހޯދިފައިވާ އެންމެ ބޮޑު ކާމިޔާބީއަކީ 2014 ވަނަ އަހަރުގެ މުބާރާތުގައި ފައިނަލްގައި ކުޅުމެވެ. އެފަހަރުގެ ފައިނަލްގައި އާޖެންޓީނާވަނީ ޖަރުމަނުވިލާތް އަތުން ބަލިވެފައެވެ.
މެސީ ހާމަކުރިގޮތުގައި ވާރލްޑް ކަޕަށް ވަރަށް ބޮޑަށް އިންތިޒާރު ކުރެވެންދާކަމަށެެވެ. އަދި މިމުބާރާތް އަވަހައް އަންނަން ބޭނުންވާކަމަށްވެސް އޭނާ ހާމަކޮށްފައިވެއެވެ. މެސީ ހާމަކުރިގޮތުގައި ވާރލްޑް ކަޕެއްގައި ކޮންމެ ގޮތަކަށްވެސް ނަތީޖާ ހިނގައިދާނެކަމަށެވެ. ހުރިހާ މެޗަކީވެސް ވަރަށް އުނދަގޫ މެޗްތަކެއް ކަމަށްވެސް އޭނާ ހާމަކުރިއެވެ.
ގައުމީ ޓީމަށް ކުޅެމުން މެސީ އަށް ވަނީ ތިން ކާމިޔާބީ އެއް ލިބިފަ އެެވެ. އެއީ 2008 ވަނަ އަހަރުގެ ބެއިޖިން އޮލިމްޕިކްސްގެ ފުޓްބޯޅަ އިވެންޓްގެ ރަން މެޑަލާއި 2019 ވަނަ އަހަރުގެ ކޮޕަ އެމެރިކާގެ އިތުރުން ދެކުނު އެމެރިކާ އާއި ޔޫރަޕްގެ ޗެމްޕިއަނުންގެ މެދުގައި ކުޅުނު ފައިނަަލިސިމާ ޓްރޮފީއެވެ.
މެސީ އެންމެ ފުރަތަމަ ވޯލްޑް ކަޕެއްގައި ކުޅުނީ 2006 ވަނަ އަހަރު ޖަރުމަނުގައި ބޭއްވި މުބާރާތުގައެވެ. އޭގެ ފަހުން، 2010 ވަނަ އަހަރު ދެކުނު އެފްރިކާގައި ބޭއްވި ވޯލްޑް ކަޕާއި 2014 ވަނަ އަހަރު ބްރެޒިލްގައި ބޭއްވި ވޯލްޑް ކަޕްގެ އިތުރުން 2018 ވަނަ އަހަރު ރަޝިއާގައި ކުރިއަށްދިޔަ ވޯލްޑް ކަޕްގައި މެސީ ކުޅުނެވެ. މީގެ ތެރެއިން 2014 ވަނަ އަހަރުގެ ފައިނަލްގައި އާޖެންޓީނާ ބަލިވީ އިތުރު ވަގުތުގައި 1-0 އިން ޖަރުމަނު އަތުންނެވެ.
މެސީގެ ކާމިޔާބު ކެރިއަރު ފުރިހަަމަ ކުރަން މަދުވާ ޓްރޮފީ އަކީ ވޯލްޑް ކަޕްއެވެ. އެހެންވެ، މި ފަހަރުގެ ވޯލްޑް ކަޕް ހޯދަން ހުރިހާ ގޮތަކުން އާޖެންޓީނާ އިން މަސައްކަތް ކުރާނެއެވެ.
