ރައްޔިތުންގެ މަޖިލިހުގެ އިދާރާއިން 2020 ވަނަ އަހަރު 321،084 (ތިންލައްކަ އެކާވީސް ހާސް އަށްޑިހަ ހަތަރެއް) ރުފިޔާގެ ހަރުމުދާ ހޯދުމަށް ރިކަރަންޓް ކޯޑުތަކުން ޚަރަދު ކޮށްފައިވާ ކަމަށާއި، މިއީ ދައުލަތުގެ މާލިއްޔަތު ގަވާއިދުގެ 4.03 ވަނަ މާއްދާއާއި ޚިލާފަށް ކޮށްފައިވާ ޚަރަދުތަކެއް ކަމަށް އޮޑިޓް ރިޕޯޓްގައި ބުނެފިއެވެ.
އޮޑިޓަރ ޖެނެރަލް އޮފީހުން ނެރުނު ރައްޔިތުންގެ މަޖިލީހުގެ 2020ވަނަ އަހަރުގެ މާލީ ބަޔާންތަކުގެ އޮޑިޓް ރިޕޯޓުގައި މާލިއްޔަތު ގަވާއިދާއި ޚިލާފަށް ކޮށްފައިވާ ބޮޑެތި ޚަރަދުތަކެއް ވަނީ ފާހަގަކޮށްފައެވެ.
މަޖިލިސް އިދާރާގެ 2020 ވަނަ އަހަރުގެ އޮޑިޓް ރިޕޯޓުގައި ވާގޮތުން ދައުލަތުގެ ހިސާބުތައް ބަލަހައްޓާ ސެޕް ސިސްޓަމްގައިވެސް، މި މުދާތައް، ހަރުމުދަލުގެ ގޮތުގައި ރިކޯޑް ކޮށްފައި ނުވާކަން ފާހަގަ ކޮށްފައި ވެއެވެ. އަދި މީގެ އިތުރުން މާލީ ބަޔާންތަކުގައި ރިކަރަންޓް ޚަރަދުގެ ގޮތުގައި އަދަދު އިތުރުކަމަށް ދެއްކުމާއި، ކެޕިޓަލް ކޯޑުގެ ޚަރަދުން މި އަދަދު ދަށްވެފައިވާކަންވެސް ރިޕޯޓުގައި ފާހަގަ ކޮށްފައި ވެއެވެ.
އޮޑިޓް ރިޕޯޓުގައި ފާހަގަ ކޮށްފައިވާ ގޮތުގައި މަޖިލިސް އިދާރާއިން ބަޖެޓް ކޯޑު ނޫން ކޯޑުތަކުން ޚަރަދު ކުރުމުން، ބައެއް ޚަރަދު ކޯޑުތަކަށް ބަޖެޓް ކޮށްފައިވާ ވަރަށްވުރެ އިތުރަށް ޚަރަދުކުރެވި، ކޯޑުތަކުން ޚަރަދުކުރުމަށް ބަޖެޓް ކޮށްފައިވާ ކަންކަމަށް އެ ކޯޑުތަކުގައި ފައިސާ ނުހުންނާނެކަމަށް ފާހަގަ ކޮށްފައި ވެއެވެ.
މީގެ އިތުރުން އޮޑިޓް ރިޕޯޓުގައި ވަނީ، ފާއިތިވެދިޔަ އަހަރުތަކުގެ އޮޑިޓް ރިޕޯޓުތަކުގައި ފާހަގަ ކޮށްފައިވާ ކަންތައްތަކުގެ ތެރެއިން 31 ޑިސެމްބަރު 2020ގެ ނިޔަލަށް އިސްލާހީ ފިޔވަޅު އަޅާފައިނުވާ މައްސަލަތައްވެސް ފާހަގަ ކޮށްފައި ވެއެވެ.
މީގެ އިތުރުންވެސް އޮޑިޓް ރިޕޯޓުގައިވަނީ ރައްޔިތުންގެ މަޖިލީހުގެ އިމާރާތާއި އެއިމާރާތް ވަށައިގެންވާ އެހެނިހެން ތަންތަން ހިމެނޭގޮތަށް ކުރަންހުރި ބޮޑެތި މަރާމާތުތަކާއި، އެ އިމާރާތުގެ ސަލާމަތާއި ރައްކާތެރިކަމަށްޓަކައި ކުރަންހުރި މަސައްކަތްތައް ކުރުމަށް ދާއުލަތުގެ ޙިއްސާ އޮންނަ ކުންފުންޏަކާއިއެކު ވެފައިވާ އެއްބަސްވުމާ ގުޅިގެން ފާހަގަކުރެވުނު ކަންތައްތައްވެސް ފާހަގަކޮށްފައެވެ.
އެގޮތުން ދައުލަތުގެ މާލިއްޔަތުގެ ގަވާއިދުގެ 10.28 ވަނަ މާއްދާގައި، ޕްރޮކިއުމަންޓުގެ ކަމެއް ކުރަން ފެށުމުގެ ކުރިން އެކަމަކަށް ބޭނުންވާ ހުރިހާ މަޢުލޫމާތެއް ތަފުސީލުކޮށް އެނގެން އޮންނާނެގޮތަށް ލިޔުން ތައްޔާރު ކުރަން ވާނެކަމަށް ބަަޔާންކޮށްފައި ވީނަމަވެސް، ރައްޔިތުންގެ މަޖިލީހުގެ އިމާރާތުގައި ކުރަންހުރި ބޮޑެތި މަރާމާތުތައް ކުރުމަށް 9,903,050 (ނުވަ މިލިއަން ނުވަ ލައްކަ ތިން ހާސް ފަންސާސް) ރުފިޔާއަށް، އެ މަސައްކަތް ކޮށްދޭ ފަރާތާ ހަވާލުކުރުމުގެ ކުރިން ބީއޯ.ކިޔުއާއި ކުރެހުން އަދި ސްޕެސިފިކޭޝަން ތައްޔާރުކޮށްފައި ނުވާކަން ވަނީ ފާހަގަކޮށްފައެވެ.
އަދި މިމަސައްކަތް ކޮށްފައިވަނީ މާލިއްޔަތު ގަވާއިދުގައި ބުނެފައިވާ ގޮތާއި ޚިލާފަށް ބިޑްކުރުމަކާއި ނުލައި ފިނޭންސް މިނިސްޓްރީގެ ޚާއްސަ ހުއްދައެއްގެ ދަށުންކަމަށް ވަނީ ބުނެފައެވެެ. މިމަސައްކަތް ކޮށްފައިވާ ގޮތުގެ ތަފްސީލް އޮޑިޓް ރިޕޯޓުގައި ވަނީ ފާހަގަކޮށްފައެވެ.
މި ރިޕޯޓުގައި ވާގޮތުން މަޖިލިސް އިދާރާއިން ވަނީ، މާލިއްޔަތު ގަވާއިދާ ޚިލާފަށް، މަސައްކަތް ކަތް ނިމުނުތާ 6 މަސްދުވަހުގެ ތެރޭގައި އެފަރާތަށް ރިޓެންޝަން ފައިސާވެސް ދޫކޮށްފައެވެ. ދައުލަތުގެ މާލިއްޔަތު ގަވާއިދުގައި ވާގޮތުން ބީލަމުގެ ޖުމްލަ 2.5 މިލިއަނަށްވުރެ ބޮޑުނަމަ ރިޓެންޝަންގެ ފައިސާ އަބުރާ ދޭންވާނީ މަސައްކަތް ނިމޭތާ 12 މަސްދުވަސް ވުމަށްފަހުގައެވެ.
