ޤަވާއިދާއި ޚިލާފަށް އެއްގަމު އުޅަނދު ރަޖިސްޓްރީކޮށްފައިވާ މައްސަލާގައި ފިޔަވަޅު އަޅާނެކަމަށް ޓްރާންސްޕޯޓް މިނިސްތަރ އައިޝަތު ނަހުލާ ވިދާޅުވެއްޖެއެވެ.
100 އެއްހާ އުޅަނދު ޤަވާއިދާއި ޚިލާފަށް ރަޖިސްޓްރީކޮށްފައިވާ މައްސަލާގައި ރަޖިސްޓްރީ ބާޠިލުކޮށްފައިވެއެވެ. އެކަމާއި ގުލިގެން ނަހުލާ ވިދާޅުވީ ޓްރާންސްޕޯޓް މިނިސްޓްރީގެ މަސައްކަތްތައް ހަރުދަނާ ކުރުމަށް ކުރަމުންދާ މަސައްކަތްތަކުގެ ތެރެއިންނާއި ހަދަމުންދާ އޯޑިޓް ތެރެއިން އޮޅުވާލައިގެން ރަޖިސްޓަރކޮށްފައިވާ އުޅަނދުތައް ފެންނަމުންދާކަން ފާހަގަކުރެވޭކަމަށެވެ.
ޒީރޯ ޓޮލަރެންސް ޓު ކޮރަޕްޝަނަކީ، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ވައުދުފުޅެއްކަން ފާހަގަކުރައްވާ މިނިސްޓަރ ވިދާޅުވީ ކޮރަޕްޝަން ހުއްޓުވުމަށް އަޅަންޖެހޭ ކޮންމެ ފިޔަވަޅެއް ވަކި މީހަކަށް ބެލުމެއްނެތި އަޅާނެ ކަމަށެވެ. އަދި އެފަދަކަންކަން ޤަވާއިދުގެ ތެރެއިން ކުރުމަށްޓަކައި އެއްވެސް ފަސްޖެހުމެއްނެތި މަސައްކަތްކުރާނެ ކަމަށް ނަހުލާ ވިދާޅުވިއެވެ.
އަދި، މިކަންތައްތައް ހަމަމަގަށް އެޅުމުގައި އެއްވެސް ފަސްޖެހުމެއްނެތި މަސައްކަތްކުރާނެ ކަމުގެ ޔަގީންކަން އަރުވަން.
— Aishath Nahula (@aishath_nahula) October 6, 2022
މާލޭގައި އެއް ގަރާޖަކަށް އެތައް ސަތޭކަ އުޅަނދެއް ރަޖިސްޓްރީކޮށްފައިވާ މައްސަލަތަކެއްވެސް ވަނީ ފެންމަތިވެފައެވެ. ނަމަވެސް މިހާރު އެފަދަ އެއްވެސް ކަމެއް ނުހިނގާނެކަމަށް ޓްރާންސްޕޯޓް މިނިސްޓްރީން ވަނީ ބުނެފައެވެ.
