ރައްޔިތުންގެ މަޖިލީހުގެ އިމާރާތުގައި ކުރަންހުރި ބޮޑެތި މަރާމާތުކުރުމަށް ނުވަމިލިޔަން ރުފިޔާ ޚަރަދުކޮށްފައިވަނީ މާލިއްޔަތު ގަވާއިދާއި ޚިލާފަށް ކަމަށް އޮޑިޓް ރިޕޯޓްގައި ބުނެފިއެވެ.

އޮޑިޓަރ ޖެނެރަލް އޮފީހުން ނެރުނު ރައްޔިތުންގެ މަޖިލީހުގެ 2020ވަނަ އަހަރުގެ މާލީ ބަޔާންތަކުގެ އޮޑިޓް ރިޕޯޓުގައި މާލިއްޔަތު ގަވާއިދާއި ޚިލާފަށް ކޮށްފައިވާ ބޮޑެތި ޚަރަދުތަކެއް ވަނީ ފާހަގަކޮށްފައެވެ.

ރިޕޯޓުގައި ރައްޔިތުންގެ މަޖިލީހުގެ އިމާރާތާއި އެއިމާރާތް ވަށައިގެންވާ އެހެނިހެން ތަންތަން ހިމެނޭގޮތަށް ކުރަންހުރި ބޮޑެތި މަރާމާތުތަކާއި، އެ އިމާރާތުގެ ސަލާމަތާއި ރައްކާތެރިކަމަށްޓަކައި ކުރަންހުރި މަސައްކަތްތައް ކުރުމަށް ދާއުލަތުގެ ޙިއްސާ އޮންނަ ކުންފުންޏަކާއިއެކު ވެފައިވާ އެއްބަސްވުމާ ގުޅިގެން ފާހަގަކުރެވުނު ކަންތައްތައް ވަނީ ފާހަގަކޮށްފައެވެ.

އެގޮތުން ދައުލަތުގެ މާލިއްޔަތުގެ ގަވާއިދުގެ 10.28 ވަނަ މާއްދާގައި، ޕްރޮކިއުމަންޓުގެ ކަމެއް ކުރަން ފެށުމުގެ ކުރިން އެކަމަކަށް ބޭނުންވާ ހުރިހާ މަޢުލޫމާތެއް ތަފުސީލުކޮށް އެނގެން އޮންނާނެގޮތަށް ލިޔުން ތައްޔާރު ކުރަން ވާނެކަމަށް ބަަޔާންކޮށްފައި ވީނަމަވެސް، ރައްޔިތުންގެ މަޖިލީހުގެ އިމާރާތުގައި ކުރަންހުރި ބޮޑެތި މަރާމާތުތައް ކުރުމަށް 9,903,050 (ނުވަ މިލިއަން ނުވަ ލައްކަ ތިން ހާސް ފަންސާސް) ރުފިޔާއަށް، އެ މަސައްކަތް ކޮށްދޭ ފަރާތާ ހަވާލުކުރުމުގެ ކުރިން ބީއޯ.ކިޔުއާއި ކުރެހުން އަދި ސްޕެސިފިކޭޝަން ތައްޔާރުކޮށްފައި ނުވާކަން ވަނީ ފާހަގަކޮށްފައެވެ.

އަދި މިމަސައްކަތް ކޮށްފައިވަނީ މާލިއްޔަތު ގަވާއިދުގައި ބުނެފައިވާ ގޮތާއި، ޚިލާފަށް ބިޑްކުރުމަކާއި ނުލައި ފިނޭންސް މިނިސްޓްރީގެ ޚާއްސަ ހުއްދައެއްގެ ދަށުންކަމަށް ވަނީ ބުނެފައެވެެ. މިމަސައްކަތް ކޮށްފައިވާ ގޮތުގެ ތަފްސީލް އޮޑިޓް ރިޕޯޓުގައި ވަނީ ފާހަގަކޮށްފައެވެ.

މަޖިލީހުގެ އިމާރާތުގައި ހުރި ބޮޑެތި މަރާމާތުތައް ކުރުމަށް ބީއޯ.ކިޔުއެއް ނުވަތަ ކޮސްޓިން އަދި ސްޕެސިފިކޭޝަން ތައްޔާރުކޮށްފައި ނުވުމާއި މަސައްކަތަކީ ކުރު މުއްދަތެއްގައި ކުރާ މަސައްކަތެއް ނަމަވެސް، މިފަދަ މަަސައްކަތް ކޮށްދޭނެ އެހެން ފަރާތަކުން/ފަރާތްތަކުން މިފަދަ މަަސއްކަތެއް ކުރާނެ އަންދާޒާ އަގެއް ހޯދާފައި ނުވުމުން، މިމަސައްކަތް ކޮށްދިނުމަށް ހޯދާފައިވާ އަގަކީ ވާދަވެރި އެންމެ އެކަށޭނެ އަގެއްކަން ކަށަވަރު ކުރެވެން ނެތްކަމަށްވެސް ރިޕޯޓުގައި ބުނެފައިވެއެވެ.

މާލިއްޔަތު ގަވާއިދުގައި ބަޔާންކޮށްފައިވަނީ، ބީލަމުގެ ޖުމްލަ އަގު ދެމިލިޔަން ފަސްލައްކަ ރުފިޔާއަށްވުރެ ބޮޑުނަމަ، ރިޓެންޝަން ފައިސާ އަނބުރާ ދޭންވާނީ، މަސައްކަތް ނިމޭތާ 12 މަސްވުމުންކަމަށެވެ. ނަމަވެސް މަސައްކަތް ނިމުނުތާ 6 މަސް ދުވަހުގެ ތެރޭގައި އެފަރާތަށް ރިޓެންޝަން ފައިސާ އަނބުރާ ދީފައިވާކަންވެސް ރިޕޯޓުގައި ވަނީ ފާހަގަކޮށްފައެވެ. މިގޮތަށް އަމަލުކޮށްފައި ވުމުން ފެންވަރު ދަށްކޮށް ކޮށްފައިވާ މަސައްކަތް އެފަރާތް ލައްވައި އަލުން ކުރުވުމާއި، އެފަދަ މަސައްކަތަށް އެފަރާތް ޒިންމާކުރުވުމަކީ ދަތިކަމެއްކަން ވަނީ ފާހަގަކޮށްފައެވެ.

އޮޑިޓް ރިޕޯޓުގައި ވަނީ މަޖިލީހުން ކުރާ މިފަދަ ޚަރަދުތައް ކުރުމުގައި މާލިއްޔަތު ގަވާއިދާއި އެއްގޮތަށް އަމަލު ކުރުމަށް ދަންނަވާފައެވެ. އެގޮތުން ޕްރޮކިއުމަންޓް ކަމެއް ކުރަން ފެށުމުގެ ކުރިން އެކަމަށް ބޭނުންވާ ހުރިހާ މައުލޫމާތެއް ތަފްސީލުކޮށް ލިޔުމުން އެގެން އޮންނާނެ ގޮތަށް ތައްޔާރު ކުރުމަށް ވަނީ ދަންނަވާފައެވެ. އަދި ބީލަމުގެ އަގު ފަސް މިލިޔަން ރުފިޔާއަށްވުރެ ބޮޑުނަމަ، ބީލަމުގެ މަސައްކަތް ނިމޭތާ 12 މަސް ވުމުން ނޫނީ ރިޓެންޝަން ފައިސާ އަނބުރާ ނުދިނުމަށްވެސް ވަނީ ލަފާދީފައެވެ.