ގަހެއް ކަނޑާތީ ކަންބޮޑުވާ މީހުން، ލިވާތުގެ މައްސަލަތަކުގައި ކަންބޮޑުވުމެއް ނެތުމުން އަޖައިބުވާކަމެއް ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ޝައިކު ޒައިދު މިހެން ވިދާޅުވީ އަމީނީ މަގު ހެދުމަށްޓަކައި އާރުޑީސީން އެމަގުގައި ހުރި ގަސްތައް ކަނޑާ މައްސަލާގައި އެމްޑީޕީގެ ރައީސް މުހައްމަދު ނަޝީދު ކޯޓަށް ވަޑައިގެންނެވުމުން އެކަމަށް ފާޑުވިދާޅުވެ ކުރެއްވި ޓުވީޓެއްގައެވެ. ރައީސް ނަޝީދުގެ ފަރާތްޕުޅުން އިއްޔެ ވަނީ އަމީނީ މަގުގެ ގަސް ކެނޑުން ހުއްޓުވުމުގެ ވަގުތީ އަމުރަކަށްވެސް އެދިފައެވެ.
މިމައްސަލާގައި ޝައިޚު ޒައިދު ވިދާޅުވީ ގަސްތައް ކެނޑާތީ ލޮލަލަށް ނިދި ނައިސްގެން އުޅުއްވާ ބޭފުޅުން ދީނުގައި ހަރާމް ކުރައްވާފައިވާ ލިވާތުފަދަ ކަންކަމަށް އަރައި ގަންނަ މީހުންގެ މައްސަލަތައް ނުބެލޭތީ ކަންބޮޑުވުން ފާޅުކުރާތަނެއް ނުފެންނަ ކަމަށެވެ. އަދި މިމައްސަލަތަކުގައި ދައުލަތުގެ މުއައްސަސާތައް ގުޅިގެން އެފަދަ މުޖުރިމުން ސަލާމަތްކުރުމަށް ކުރާ މަސައްކަތަކީވެސް މައްސަލައަކަށް ނުވާކަމަށް ޒައިދު ވިދާޅުވިއެވެ.
އަމީނީ މަގުން ގަހެއް ކަނޑާތީތޯ ކަންބޮޑުވެ ދެލޮލަށް ނިދި ނައިސްގެން އުޅުއްވާ ބޭފުޅުންނަށް ލިވާތުގެ މައްސަލަތަކުގައި އެކަށީގެންވާ ފިޔަވަޅު ނޭޅުމަކީ މައްސަލައަކަށް ނުވޭ! ދައުލަތުގެ މުއައްސަސާތައް ގުޅިގެން އެފަދަ މުޖުރިމުން ސަލާމަތްކުރުން މައްސަލައަކަށް ނުވޭ! އަޖާއިބެންނޫންތޯ!
– ޝައިޚު އަލީ ޒައިދު ވިދާޅުވިއެވެ.
ރާއްޖޭގެ ހައި ޕްރޮފައިލް ސިޔާސީ މީހުންނާއި ވިޔަފާރި ވެރިންނާއި ފުލުހުންނާއި ސިފައިންނާއި ރިސޯޓް މުވައްޒަފުންނާއެކު އަލަމްގީރު އެއްޖިންސުން ގުޅުން ހިންގި މައްސަލަ ފެންމަތިވީ މި އަހަރުގެ ޖޫން މަހުގެ 24 ވަނަ ދުވަހުއެވެ. އެ މައްސަލައިގައި އެއް ޖިންސުން ގުޅުން ހިންގިކަން ސާބިތުވެ ރައީސް ނަޝީދުގެ ކޮއްކޮ ނާޒިމަށް ކްރިމިނަލް ކޯޓުން އިއްވާފައިވަނީ ތިން މަހާއި 26 ދުވަހުގެ ގޭބަންދު ހުކުމެކެވެ.
މިމައްސަލާއި ގިނަ ބައެއްގެ ފާޑުކިޔުން އަމާޒުވަމުންދާއިރު މިއީ ސީދާ ރައީސް ނަޝީދުގެ ކޮއްކޮއަށް ވުމުން ހަދާދީފައިވާ ރަނގަޅު ގޮތެއްކަމަސް ގިނަ ބަޔަކު ދަނީ ބުނަމުންނެވެ.
