ގދ.މަޑަވެލީ ޓީއެސް ލައިން ދޯނިން އިއްޔެ 57.15 ޓަނުގެ މަސް މިފްކޯއަށް ކިރުވައި އެއް ދުވަހުގެ ތެރޭގައި އެންމެ ގިނަ މަސް ކިރުވުމުގެ ރެކޯޑް އާ ކޮށްފިއެވެ.
މޯލްޑިވްސް ފިޝަރީޒް ކޮމްޕެނީ ލިމިޓެޑް (މިފްކޯ)ގެ ސީއީއޯ އިސްމާއީލް ފައުޒީ ކުރެއްވި ޓްވީޓެއްގައި ދެކުނުގެ މޫސުން އެންމެ ރަގަޅަށް ތަން ނުދިންކަމުގައިވިޔަސް އިއްޔެ މަހަށް ނިކުތް ޓީއެސް ލައިން ދޯނިން ވަނީ 57.152 ޓަނު މަސް ކޫއްޑޫއަށްކިރުވައި، އެއްދުވަހެއްގެ ދޮށީގެ މަސްވެެރިކަމުގެ ރިކޯޑެއް ހަދާފައި ކަމަށެވެ.
އޭނާ ފާހަގަކުރެއްވި ގޮތުގައި އެ ދޯނިން މިހާ ގިނަ އަދަދެއްގެ މަސް ކިރުވީ ދެކުނުގެ މޫސުން އެންމެ ރަނގަޅު ނޫން ދުވަސްވަރެއްގަ އެވެ. އަދި މި ދޯނިން ކިރުވި މަަށް ލިބުނު އާމްދަނީއަކީ 971،584 ރުފިޔާއެވެ.
ދޯނީގެ ފަޅުވެރިންނާއި ކެޔޮޅު ކުރެއްވި ހިތްވަރަށް އައްސަރިބަހާއި ސާބަސް ދަންނަވަން.
– އިސްމާއިލް ވިދާޅުވިއެވެ.
އޭނާ ވިދާޅުވީ "ޓީއެސް ލައިން" އަކީ އެންމެ ގިނަ އަދަދަކަށް މިފްކޯ އަށް މިދިޔަ އަހަރު މަސްކިރުވި ދޯނި ވެސް ކަމަށެވެ. އެއީ 1095.805 ޓަނުގެ މަސް ކަމަށް އިސްމާއިލް ވިދާޅުވިއެވެ. ކޫއްޑު އަށް އެއް ދުވަހެއްގައި އެންމެ ގިނަ އަދަދަކަށް މަސް ކިރުވި ކަމުގެ ރެކޯޑެއް ހެދި ނަމަވެސް ކެޕޭސިޓީ ނެތުމުގެ ސަބަބުން ސަރުކާރުގެ މަސް ކުންފުންޏަށް މަސް ނުކިރުވޭ މައްސަލަ އަށް ހައްލެއް ނުލިބެ އެވެ. މި ސަރުކާރުގެ މިދިޔަ ހަތަރު އަހަރެއްހާ ދުވަހު ވެސް އެ ކަމަށް އަދި ބަދަލެއް ނުގެނެވުނެވެ.
މިފްކޯއަށް މިހާރު ގިނަ އަދަދެއްގެ މަސް ދޯނިތައް މަސް ކިރުވަމުން ދާތީ މަސް ކިރުވުމުގެ މަސައްކަތް އަވަސްކޮށް، މަސްވެރިން ކިއުގައި ހޭދަކުރާ ވަގުތު ކުޑަ ކުރުމަށްދަނީ މަސައްކަތް ކުރަމުންނެވެ. އިސްމާއިލް ވިދާޅުވީ ހުކުރު ދުވަހުވެސް މިހާރު މަސް ކިރުވުމުގެ މަސައްކަތް ކުރަމުންދާ ކަމަށެވެ.
