ބޮލީވުޑްގެ ބައެއް ފިލްމު ތަކުން ފެނިފައިވާ ޕާކިސްތާނުގެ މަޝްހޫރު އެކްޓަރު ފަވާދު ޚާން ބަރުދަން އިތުރުކުރަން އުޅުމުގެ ތެރޭގައި ކިޑްނީގެ މައްސަލަ ތަކާ ކުރިމަތިވެ ފަރުވާދޭން ޖެހުނު ކަމަށް އޭނާ ބުނެފިއެވެ.
އޭނާގެ ކުރިއަށް އޮތް ފިލްމް "ދަ ލެޖެންޑް އޮފް މައުލާ ޖެޓް" ގެ ރޯލަށް މީހާގެ ބަރުދަން އިތުރުކޮށް ހަށިގަނޑު ވަރުގަދަ ކުރަން އުޅުމުގެ ތެރޭގައި އޭނާ ވަނީ ކިޑްނީގެ މައްސަލަތައް ދިމާވެ 10 ދުވަސް ވަންދެން ހޮސްޕިޓަލުގައި އެޑްމިޓް ކޮށްފައެވެ.
View this post on Instagram
ބިލާލް ލަޝާރީ ޑައިރެކްޓްކޮށް އަންނަ މަހުގެ 13 ގައި ރިލީޒްކުރާ ޕާކިސްތާނުގެ އެކްޝަން ފިލްމު، "ދަ ލެޖެންޑް އޮފް މައުލާ ޖެޓް" ގައި ފަވާދު ފެންނާނީ "ފައިޓާ" އެއްގެ ރޯލުންނެވެ. ބަރުދަނުގައި 75 ކިލޯ ހުންނަ ފަވާދު މި ފިލްމަށް އޭނާގެ ބަރުދަން 100 ކިލޯއަށް ހަމަކުރަން ޖެހުނެވެ.
ބަރުދަން އިތުރު ކުރުމުގެ ތެރޭގައި އޭނާއަށް އެކަމުގެ ނޭދެވޭ އަސަރު ފެނުނީއެވެ. އަދި އޭނާގެ ކިޑްނީގައި މައްސަލަ ޖެހި އެޑްމިޓް ކުރަން ޖެހުނީއެވެ. އޭނާ ބުނި ގޮތުގައި ބަރުދަން އިތުރުކުރަން އުޅުމަކީ އޭނާ ކުރި ރަނގަޅުކަމެއް ނޫނެވެ. އެކަހަލަ ރޯލު ނެގުމަށް އޭނާ، ތަރިންނަށް ހިތްވަރު ނުދޭނެ ކަމަށް ވެސް ބުންޏެެވެ.
"ދަ ލެޖެންޑް އޮފް މައުލާ ޖެޓް" އަކީ ޕާކިސްތާނުގެ އެންމެ އަގު ބޮޑުއެއް ފިލްމު ކަމަށް ޚަބަރުތައް ބުނެއެވެ. މި ފިލްމުގައި ފަވާދުގެ އިތުރުން މާހިރާ ޚާން، ހަމްޒާ އަލީ، ހުމައިމާ މާލިކް އަދި ފާރިސް ޝާފީ ފަދަ ޕާކިސްތާނުގެ ނަން މަޝްހޫރު ތަރިން ފެނިގެންދާނެއެވެ.
