ބޮލީވުޑްގެ ވަރުގަދަ ދެތަރިން ކަމުގައިވާ ރިތިކް ރޯޝަނާއި ސައިފް އަލީ ޚާން އެކުގައި ފެނިގެންދާ ފިލްމު "ވިކްރަމް ވޭދާ" އަކީ މި އަހަރުގެ އެންމެ އުންމީދީއެއް ފިލްމެވެ.
ފިލްމު ބަލަން ކެތްމަދުވެފައިވާ ބެލުން ތެރިންގެ އިންތިޒާރަށް ނިމުން އަންނަނީ މިމަހުގެ 30 ގައެވެ. ފިލްމަކީ ވަރުގަދަ އެކްޝަން ފިލްމެކެވެ.
މި ފިލްމުގައި ރިތިކް ފެނިގެންދާނީ ގޭންގްސްޓާރެއްގެ ގޮތުގައެވެ. އަދި ސައިފް ފެނިގެންދާނީ ފުލުހެއްގެ ރޯލުންނެވެ. އަދި ފިލްމުގައި ދެމީހުންގެ ވަރުގަދަ ކުރިމަތި ލުންތައް ވެެސް ދައްކުވައި ދޭނެއެވެ. މި ދެތަރިންގެ އިތުރުން ރާދިކާ އާޕްތޭ ވެސް ފިލްމުގައި މުހިންމު ރޯލަކުން ފެނިގެންދާނެއެވެ.
މިއީ މިއަހަރުގެ ވަރަށް އުންމީދީ އަދި ގިނަބަޔަކު އިންތިޒާރު ކުރަމުންއަންނަ ފިލްމެކެވެ. މި ފިލްމަކީ ދެތަރިން އެކުގައި ކުޅޭ ދެވަނަ ފިލްމެވެ. މީގެ ކުރިން މި ދެތަރިން ވަނީ އެކުގައި 2002 ވަނަ އަހަރު "ނަ ތުމް ޖާނޯ ނަ ހަމް" އިން ފެނިގެން ގޮސްފައެވެ.
މިއީ ހަމަ މިނަމުގައި 2017 ގައި ގެނެސްދިން ތަމަޅަ ފިލްމުގެ އަސްލަކަށް ބަލައިގެން ހަދާފައިވާ ފިލްމެކެވެ. ހިންދީ ފިލްމު ވެސް ޑައިރެކްޓްކުރަނީ ތަމަޅަ ފިލްމު ވެސް ޑައިރެކްޓްކުރި ޕުޝްކަރް-ގަޔަތުރީއެވެ.
ތަމަޅަ ފިލްމުގައި ވޭދާގެ ރޯލު ވިޖޭ ސެތުޕަތީ ކުޅުނުއިރު، ވިކްރަމްގެ ރޯލު ކުޅުނީ އާރް މާދަވަންއެވެ. މި ފިލްމުގައި ދައްކުވައިދެނީ ފުލުހަކާއި ގެންގްސްޓާރެއްގެ މެދުގައި ހިނގާ ކަންތައްތަކެކެވެ.
