އިސްލާމްދީނުގައި، ސަލާމަތުގެ ސަބަބުތަކުގައި ހިފުކަމީ ޤަޟާޤަދަރަށް އީމާންވުމާއި ފުށުއަރާކަމެއް ނޫންކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.
"ރައްކާތެރިކަމުގެ ފިޔަވަޅުތައް ހަރުދަނާ ކުރުން" މިމައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޡުބާގައި ބަޔާން ކޮށްފައިވާ ގޮތުގައި، ސަބަބުތަކުގައި ހިފުންވަނީ ޤަޟާޤަދަރަށް ފުރިހަމަޔަށް އީމާންވުމުގެ ތެރެއިން ކަމުއަވެ. އަދި މާތްﷲއަށް ވަކީލު ކުރުމުގެ އެންމެ ފުރިހަމަ ގޮތަކީވެސް ސަބަބުތަކުގައި ހިފުންކަމުގައި ޚުތުބާގައި ވިދާޅުވެފައި ވެއެވެ.
މިމަގުން މިސާލު ދައްކަވަމުން ޚުޡުބާގައި ވިދާޅުވި ގޮތުގައި، މާތް ނަބިއްޔާ ހިޖުރަ ކުރައްވައި މަދީނާއަށް ވަޑައިގަތުމަށް ގަސްތު ކުރެއްވި ހިނދު، އެކަލޭގެފާނު ވަނީ ސަލާމަތުގެ ހުރިހާ ސަބަބުތަކެއްގައި ހިތްފަވާފައެވެ.
ސަވާރީ ތައްޔާރު ކުރެއްވިއެވެ. މަގުދައްކާނޭ މީހަކު ހޯއްދެވިއެވެ. މަދީނާއަށް ދެވެން އޮންނަ އާންމު މަގު ދޫކުރައްވާ، އާންމުކޮށް ދަތުރު ނުކުރާ މަގެއް އިޚްތިޔާރު ކުރެއްވިއެވެ. އެކަލޭގެފާނު ހޯދުމަށް ފަޖަތްޕުޅުން އަތުވެދާނެ ބައެއްގެ ލޯތަކަށް ވަންހަނާވެ ވަޑައިގަތުމަށްޓަކާ ތިންދުވަހު ޘައުރު ފަރުބަދައިގެ ހޮހަޅާގައި މަޑު ކުރެއްވިއެވެ.
ކީރިތި ރަސޫލާ އުއްމަތަށް ދަސްކޮށްދެއްވި އަގުހުރި ފިލާވަޅުތަކުން މިސާލު ދައްކަވަމުން، މިއަދު ޚުޡުބާގައި ވިދާޅުވެފައި ވެއެވެ.
ޚުޡުބާގައި ބަޔާންކުރި ގޮތުގައި، ރަސޫލާ އުއްމަތަށް ދަސްކޮށްދެއްވީ، ޤަޟާޤަދަރަށް އީމާންވެ، ސަލާމަތީ ވަސީލަތްތަކުގައި ހިފާ، ރައްކައުތެރިކަމުގެ ފިޔަވަޅުތައް އެޅުމަށްފަހު، ﷲއަށް ވަކީލުކޮށް، އެކަމެއްގައި ކުރިއަށް ދިއުމުގެ މަތިވެރި ފިލާޅުކަމުގައެވެ.
މިއަދުގެ ޚުޡުބާގައި ފާގަ ކޮށްފައިވާ ގޮތުގައި، ސަލާމަތުގެ ސަބަބުތަކާމެދު ވަރަށް ގިނަބަޔަކު މިއަދު ވަނީ އިހުމާލު ވެފައެވެ. މިގޮތުން، ފަހަކަށް އައިސް ގޯތި ގެދޮރު އިމާރާތް ކުރުމަގައި ވަރަށް ބޮޑަށް ފަރުވާ ކުޑަ ކުރާކަން ފާކުރެވޭ ކަމަށާއި، އިމާރާތް ކުރުމުގައި ސަލާމަތީގޮތުން އަޅާންޖެހޭ ފިޔަވަޅުތައް ނޭޅުމުގެ ސަބަބުން ވެއްޓޭ ތަކެތިން ޖެހި މީހުންގެ ފުރާނައަށާއި، ތަކެއްޗަށް ގެއްލުންލިބި، ވަރަށް ހިތާމަވެރި ހާދިސާތައް ހިނގާކަމުގައިވެސް ޚުޡުބާގައި ފާހަގަ ކުރައްވާފައި ވެއެވެ.
އެހެންކަމުން ސަލާމަތީ ސަބަބުތަކުގައި ހިފާ، މުދަލަށާއި، ފުރާނައަށް ލިބިދާނެ ގެއްލުންތަކުން ސަލާމަތްވުމަށް އެދި މާތްﷲގެ ހަޒުރަތުގައި ދުއާ ދެންނެވުމުގައި ދެމި ތިބުމަށް ޚުޡުބާގައި ނަސޭހަތްތެރި ވެފައި ވެއެވެ.
އަދި ކުއްލި ހާދިސާތަކާއި މުސީބާތްތައް ކުރިމަތިވެދާނެކަން ދަނެ، އެފަދަ ކަންކަމުން ރައްކާތެރިވެ ތިބުމަށްޓަކާ އަމަލުކުރާން ޖެހޭގޮތްތައް ދަރިންނަށް ދަސްކޮށްދީ އެކުދީންގެ ނަފްސު އެކަމަށް ހާނުވުމަށްވެސް ޚުޡުބާގައި ނަސޭހަތްތެރި ވެފައި ވެއެވެ.
