އުމުރުން 15 އަހަރުގެ ކުޑަ ކުއްޖަކު ވިހޭ ދަރުފުޅު މަރާލިކަމުގެ ތުހުމަތުގައި، ވިހޭ ކުޑަކުއްޖާގެ މަންމައާއި ދޮންކާފަ 10 އަހަރަށް ޖަލަށްލާން ކުރިމިނަލް ކޯޓުން މިއަދު ހުކުމް ކޮށްފިއެވެ.
ކުޑަކުއްޖާ މެރުމުގެ ދައުވާ ދައުލަތުން ކުރި، މިމައްސަލާގައި ޖަލަށް ލާން ހުކުމް ކޮށްފައިވާ ދެމީހުންނަކީ ކުޑަ ކުއްޖާގެ މަންމަ ށ. ފޭދޫ ވައިމަތީއާގޭ އަޒީޒާ އިބްރާހިމާއި އެ ކުއްޖާގެ ދޮން ކާފަ، އެ ރަށު ބުލޫހެވަން އަބްދުލްޣަފޫރު ގާސިމްއެވެ. އެހެންނަމަވެސް ޝަރީއަތުގައި ދެމީހުންވެސްވަނީ ދައުވާއަށް އިންކާރު ކޮށްފައެވެ.
އެހެންނަމަވެސް ދައުވާ ސާބިތުވާކަމަށް ނިންމާ، ކުރިމިނަލް ކޯޓުން ކޮށްފައިވާ ހުކުމްގައިވަނީ ދެމީހުންވެސް 10 އަހަރާއި 6 މަސްދުވަހަށް ޖަލަށް ލުމުގެ އިތުރުން މަރުގެ ދިޔައިގެ ގޮތުގައި 1,000,000/- (އެއް މިލިއަން) ރުފިޔާ ސިވިލް ކޯޓަށް ދައްކާ ޚަލާސް ކުރުމަށެވެ.
އޭގެ އިތުރުން ކުށުގެ ކައްފާރާއެއްގެ ގޮތުން ވިދިވިދިގެން 60 ދުވަހު ރޯދަ ހިފުމަށްވެސް ހުކުމް ކޮށްފައި ވެއެވެ.
މިމައްސަލާގައި ދައުލަތުން ކޮށްފައިވާ ދައުވާގައި ބުނެފައިވަނީ، 2012 އަހަރުގެ ޖޫން މަހުގެ 25 ވަނަ ދުވަހުގެ ވަގުތެއްގައި ކުއްޖާ ވިހާފައިވާއިރު، ބަލިވެ އިނީއްސުރެ އަންހެން މީހާ ޑޮކްޓަރަށް ދައްކާފައި ނުވާކަމުގައެވެ. އަދި ތުއްތުކުއްޖާގެ ސިއްހަތު ރަގަޅު ގޮތުގައި ދެމެހެއްޓުމަށް ސަމާލަކުން ދީފައި ނުވާއިރު، ބަލިވެ އިންކަންވެސް ސިއްރުކޮށް، ވިހެއުމަށް ހޮސްޕިޓަލަށްވެސް ގެންގޮސްފައި ނުވާކަމަށްވެސް ދައުވާގައި ބަޔާން ކޮށްފައި ވެއެވެ.
ދައުވާގައި ބުނެފައިވަނީ، ތުއްތު ކުއްޖާ އެކަށީގެން ނުވާ މާހައުލެއްގައި ވިހާފައިވާ ކަމަށާއި، އަދި ވިހެއުމަށްފަހު ވަޅުލާފައިވަނީ ށ. ފޭދޫ ވައިމަތީއާގޭ ގިފިލިތެރޭގައި ކަމުގައެވެ.
މިމައްސަލާގައި އެންމެ ފުރަތަމަ ދައުވާ ކޮށްފައިވަނީ 2013ވަނަ އަހަރުއެވެ. އެހެންނަމަވެސް އެ ދައުވާ އަބުރާ ގެންދިއުމަށްފަހު އަލުން ދައުވާ ކޮށްފައިވަނީ 2016ވަނަ އަހަރުއެވެ.
