އިނގިރޭސި ޕްރިމިއާ ލީގުގައި ބްރެންޓްފަޑް ބަލިކޮށް ތާވަލުގެ އެއްވަނައަށް އާސެނަލް އަނެއްކާވެސް ޖެހިލައިފިއެވެ.
ބްރެންޓްފަޑްގެ ދަނޑުގައި ކުޅުނު މި މެޗު އާސެނަލުން ކާމިޔާބުކުރީ 3-0 ގެ ނަތީޖާއަކުންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އާސެނަލުންނެވެ. މެޗުގެ ފުރަތަމަ ލަނޑު 17 ވަނަ މިނެޓްގައި ޖަހާދިނީ ބުކާޔޯ ސާކާ ނަގާދިން ކޯނަރަކުން ވިލިއަމް ސަލީބާއެވެ.
އޭގެ އެގާރަ މިނެޓުފަހުން އާސެނަލްގެ ލީޑު ފުޅާކޮށްދިނީ ބްރެޒިލްގެ ފޯވަޑް ގެބްރިއަލް ޖޭސުސްއެވެ. މިއީ އޭނާ އާސެނަލްއަށް ކާމިޔާބުކޮށްދިން ހަތަރުވަނަ ލަނޑެވެ. ފަހު ލަނޑު މެޗްގެ 49 ވަނަ މިނެޓްގައި ޖަހާދިނީ ޕޯޗުގަލްގެ ފަބިއޯ ވިއެއިރާއެވެ. މިއީ އޭނާ ޕޯޓޯއިން އާސެނަލްއަށް ބަދަލުވިފަހުން ފުރަތަމަ އެގާރައިގާ ހިމެނިގެން ކުޅުނު ފުރަތަމަ މެޗެވެ.
މީގެއިތުރުންވެސް މި މެޗުގައި ލަނޑު ޖަހާނެ ފުރުސަތު އާސެނަލަށް ލިބިގެންދިޔައެވެ. މި މެޗުގައި ބްރެންޓްފަޑްއަށް މާ އެދެވޭ ކުޅުމެއް ދެއްކިފައެއް ނުވެއެވެ. އެޓީމުން ލަނޑެއް ޖެހުމާއި އެންމެ ގާތަށް ދިޔައީ ކުރިއަށް އޮތް ނޭޝަންސް ލީގުގެ މެޗްތަކަށް ނަގާފައިވާ ބްރެންޓްފަޑްގެ ފޯވާޑް އިވާން ޓޯނީއެވެ. މިއީ 1939 ވަނަ އަހަރަށް ފަހު ބްރެންޓްފަޑްގެ ކުޅުންތެރިއަކު އިންގްލޭންޑް ސީނިއަރ ޓީމަށް ނެގި ފުރަތަަމަ ފަހަރެވެ.
މި ކާމިޔާބީއާއެކު އާސެނަލް އަނެއްކާވެސް މިވަނީ ތާވަލްގެ އެއްވަނައަށް އަރާފައެވެ. އެއީ ކުޅުނު 7 މެޗުން ލިބިފައިވާ 18 ޕޮއިންޓާއެކުއެވެ. އަދި ބްރެންޓްފަޑް އުޅެނީ 9 ޕޮއިންޓާއެކު ތާވަލްގެ ނުވަ ވަނައިގައެވެ.
