އިއްޔެގެ ވަގުތެއްގައި މާފުށި ޖަލުގައި ޝަރީއަތް ނިމެންދެން ބަންދުކޮށްފައި ހުއްޓާ ނިޔާވި މ. މުލި، ހުދުފިނިފެންމާގޭ މުހައްމަދު ނަޝީދުގެ މަރުގައި ގިނަ އިހުމާލުވުންތަކެއް ހުރުމުން މަރުގެ ތަހުގީގު ހިންގައި، މަރުގެ ހަގީގަތް ހާމަ ކުރުމަށް އިދިކޮޅު ކޯލިޝަނުން ގޮވާލައިފިއެވެ.
ނަޝީދު ނިޔާވުމާއި ގުޅިގެން ކަރެކްޝަނުން ރޭގެ ވަގުތެއްގައި ބުނީ، އޭނާ ނޭވާ ނުލާތީ އޭނާގެ ގޮޅީގައި ހުންނަ ބަންދު މީހަކު ޕްރިޒަން އޮފިސަރުންނަށް އެންގުމުން، މާފުށީ ޖަލުގެ މެޑިކަލް ސެންޓަރަށް ވަގުތުން ގެންގޮސް އޭނާއަށް ސީޕީއާރް ދީފައިވާ ކަމަށެވެ. ސީޕީއާރަށް ފަހުވެސް އޭނާ ނޭވާ ނުލުމުން، ނިޔާވި ކަމަށް ނިންމީ ހަވީރު 17:26 ގައި ކަމަށް ކަރެކްޝަނުން ވަނީ ބުނެފައެވެ.
ނަޝީދުގެ މަރާއި ގުޅިގެން ޕްރޮގްރެސިވް ކޯލިޝަނުން ނެރުނު ބަޔާނުގައި ބުނެފައިވަނީ ޝަރީއަތް ނިމެންދެން ވާނުވާ ނޭނގޭ ގޮތަށް ބަންދުގައި ބަހައްޓާފައި ހުރި ޤައިދީއަކު ކުއްލި ގޮތަކަށް ނިޔާވި ޚަބަރު އެހީ ނުހަނު އަސަރާއި ހިތާމައާއި އެކުގައި ކަމަށެވެ.
ޕީޕީއެމްއިން ބުނެފައިވަނީ ކުއްލި ގޮތަކަށް ނޭވާ ނުލެވި ޖަލުގައި ނިޔާވި ނަޝީދު ނިޔާވުމުގެ ކުރިން އޭނާގެ ނޭވާއަށް އުނދަގޫ ވާކަން ޖަލުގެ އޮފިސަރުންނާއި ހިއްސާ ކުރުމުންވެސް، އެކަމުގައި ފަރުވާކުޑަކޮށް، އެކަށީގެންވާ ފަރުވާ ދީފައި ނުވާ ކަމާއި އަދި ތަކުރާރުކޮށް އަނިޔާ ކުރާކަމުގެ ޝަކުވާ ނަޝީދުގެ ލޯޔަރުންނަށް ލިބިފައިވާކަމުގެ މަޢުލޫމާތު އެ ކޯލިޝަނަށް ލިބިފައިވާކަމަށެވެ.
އެހެންކަމުން މިމައްސަލަގެ ފުރިހަމަ ތަހުގީގެއްކޮށް، މަރުގެ ހަގީގަތް ހާމަކުކުރުމާއިއެކު އިހުމާލުވި ފަރާތްތައް އިންސާފުގެ ކުރިމައްޗަށް ހާޒިރު ކުރުމަށް ވަނީ ގޮވާލާފައެވެ. އަދި މިމައްސަލަ ސީރިއަސް މައްސަލައެއްގެ ގޮތުގައި ބެލުމަށް ހިއުމަންރައިޓްސް ކޮމިޝަނަށާއި، ދައުލަތުގެ ކަމާއި ގުޅުންހުރި އެންމެހާ އިދާރާތަކަށް އެކޯލުޝަނުން ވަނީ ގޮވާލާފައެވެ.
ނަޝީދު ޝަރީއަތް ނިމެންދެން ބަންދު ކޮށްފައިވަނީ 2020 ވަނަ އަހަރުގެ މާޗް 20 ގައި "އިރުއަލިމަސް" ކިޔާ ދޯންޏެއްގައި ރާއްޖެއަށް 61 ކިލޯ މަސްތުވާތަކެތި އެތެރެކުރިކަމަށް ތުހުމަތު ކުރެވިގެންނެވެ.
