ރަޝިއާއިން ބޭނުންވަނީ ވީހާ އަވަހަކަށް ހަނގުރާމައަށް ނިމުން އައުމަށް ކަމުގައި އެގައުމުގެ ރައީސް ލާޑިމިރު ޕުޓިން ވިދާޅުވެއްޖެއެވެ.
ޕުޓިން މިހެން ވިދާޅުވެފައިވަނީ، SCOގެ ދާއިމީ މެމްބަރުން (އިންޑިއާ، ޗައިނާ، ރަޝިއާ، ޕާކިސްތާން، ކަޒަކިސްތާން، ކިރިގިސްތާން، ތަޖިކިސްތާން އަދި އުޒްބަކިންސްތާން)ގެ މެދުގައި މިހާރު ކުރިޔަށްދާ ރީޖަނަލް ސަމިޓްގައި އިންޑިއާގެ ބޮޑުވަޒީރު ނަރެންދުރަ މޯޑީއާއި ބައްދަލު ކުރައްވާ ވާހަކަ ދައްކަވަމުންނެވެ.
މި ބައްދަކުވުމުގައި މިމޭރުމުން ވާހަކަ ދައްކަވަމުން ޕުޓިން ވަނީ، ކުރިޔަށްދާ ޔޫކުރެއިން ހަނގުރާމައާއި ގުޅޭގޮތުން އިންޑިއާގެ ކަންބޮޑުވުން ހުރިކަން ގަބޫލު ކުރައްވާކަމަށް ވިދާޅުވެފައެވެ.
މީގެ އިތުރުންވެސް މި ސަމިޓްގައި، ފާއިތުވެދިޔަ ހަފްތާގެ ބުދަ ދުވަހު ޗައިނާގެ ރައީސް ޝީ ޖިންގޕިނގްއާއި ބައްދަލުކުރައްވާވެސް ޕުޓިން ވަނީ މި ހަނގުރާމައާއި ގުޅިގެން ހުރި ބޭޖިންގގެ ކަންބޮޑުވުންތައްވެސް ބަލައިގަންނަ ކަމަށް ވިދާޅުވެފައެވެ.
މި ބައްދަލު ކުރެއްވުމުގައި އިންޑިއާގެ ބޮޑުވަޒީރުވަނީ، ދުނިޔެއަށް ކާނާއާއި ހަކަތައިގެ ދަތުކަން ފޯރާފައިވާ މި ދަނޑިވަޅަކީ މިއީ ހަނގުރާމަ ކުރާންވީ ވަގުތެއް ނޫންކަމުގައި ޕުޓިންއަށް ދަންނަވާފައެވެ.
"އަހަރެން ގަބޫލުކުރާ ގޮތުގައި މިއީ ހަނގުރާމައިގެ ޒަމާނެއް ނޫން. އަހަރެންވާނީ މަނިކްފާނާ މިމޭރުުން ފޯނުންވެސް ވާހަކަ ދައްކާފަ،" އުޒަބަކިސްތާނުގައި ކުރިޔަށްދާ SCOގެ ބައްދަލުވުމުގެ ހަވާސާގައި ޕުޓިންއާއި ބައްދަލު ކުރައްވަމުން މޯޑީ ވިދާޅުވެފައި ވެއެވެ.
ފާއިތުވި ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށުމާއެކު އިންޑިއާއިން ފާޅުގައި ރަޝިއާއަށް ފާޑު ކިޔާފައެއް ނުވެއެވެ. އަދި ފަހަކަށް އައިސް އިންޑިއާއިން ވަނީ ރަޝިއާއިން ތެލާއި ބޯޓުދެލި އަދި އެނޫންވެސް ބައެއް ތަކެތި ގަތުން އިތުރު ކޮށްފައެވެ.
ހަނގުރާމައަށް ނިންމުން އަންނަ ޖެހޭކަމަށް ޕުޓިން ވިދާޅުވެފައިވާއިރު، ޔޫކުރެއިން ހަނގުރާމާގައި ރަޝިއާއަށް ދަނީ ބޮޑެތި ނާކާމިޔާބީތަކާއި ކުރިމަތި ވަމުންނެވެ.
