ބޮލީވުޑްގެ ވަރުގަދަ ދެތަރިން ކަމުގައިވާ ރިތިކް ރޯޝަން އާއި ސައިފް އަލީ ޚާން އެކުގައި ފެނިގެންދާ ފިލްމު "ވިކްރަމް ވޭދާ" 100 އަށް ވުރެ ގިނަ ގައުމެއްގައި އެއް ދުވަހެއްގައި ޕްރީމިއާކުރަން ނިންމައިފިއެވެ.
މިއީ ހިންދީ ފިލްމެއް މިހާ ބޮޑުކޮށް، މިހާ ގިނަ ގައުމުތަކެއްގައި އެއްފަހަރާ، ރިލީޒްކުރާ ފުރަތަމަ ފަހަރެވެ. ބޮލީވުޑްގެ ފިލްމުތަކަށް އިނގިރޭސިވިލާތާއި އުތުރު އެމެރިކާ އާއި ނިއުޒިލޭންޑާއި އޮސްޓްރޭލިއާގެ އިތުރުން މެދުއިރުމަތިން އަބަދު ވެސް ބޮޑު މާކެޓެއް އޮވެއެވެ.
HRITHIK – SAIF: 'VIKRAM VEDHA' TO HAVE EXTENSIVE RELEASE OVERSEAS… #VikramVedha will release in a record 100+ countries globally… Stars #HrithikRoshan [as #Vedha] and #SaifAliKhan [as #Vikram]… 30 Sept 2022 release. pic.twitter.com/mtLy76np6J
— taran adarsh (@taran_adarsh) September 15, 2022
މި ފިލްމުގައި ރިތިކް ފެނިގެންދާނީ ގޭންގްސްޓާރެއްގެ ގޮތުގައެވެ. އަދި ސައިފް ފެނިގެންދާނީ ފުލުހެއްގެ ރޯލުންނެވެ. "ވިކްރަމް ވޭދާ" މި މަހުގެ 30 ގައި ޕްރިމިއާކުރާ އިރު، ބޮލީވުޑްގެ ފިލްމުތަކުގެ ފޯރި އެހާ ގަދަ ނޫން ބައެއް ހިސާބުތަކުގައި ވެސް މި ފިލްމު އަޅުވަން ޖެހިފައިވެއެވެ.
މިއީ މި ދެތަރިން އެކުގައި ކުޅޭ ދެވަނަ ފިލްމެވެ. މީގެ ކުރިން މި ދެތަރިން ވަނީ އެކުގައި 2002 ވަނަ އަހަރު "ނަ ތުމް ޖާނޯ ނަ ހަމް" އިން ފެނިގެން ގޮސްފައެވެ.
"ވިކްރަމް ވޭދާ" އަކީ ހަމަ މިނަމުގައި 2017 ގައި ގެނެސްދިން ތަމަޅަ ފިލްމު އަސްލަކަށް ބަލައިގެން ހަދާފައިވާ ފިލްމެކެވެ. ހިންދީ ފިލްމުވެސް ޑައިރެކްޓްކުރީ ތަމަޅަ ފިލްމުވެސް ޑައިރެކްޓްކުރި ޕުޝްކަރް-ގަޔަތުރީއެވެ.
ތަމަޅަ ފިލްމުގައި ވޭދާގެ ރޯލު ވިޖޭ ސެތުޕަތީ ކުޅުނުއިރު، ވިކްރަމްގެ ރޯލު ކުޅުނީ އާރް މާދަވަންއެވެ. މި ފިލްމުގައި ދައްކުވައިދެނީ ފުލުހަކާއި ގެންގްސްޓާރެއްގެ މެދުގައި ހިނގާ ކަންތައްތަކެކެވެ.
