އެއްޖިންސުން ގުޅުން ހިންގި މައްސަލައިގެ ތަހުގީގު ކުރިއަށް ދަނިކޮށް ގާނޫނީ ވަކީލް ނާޒިމް އަބްދުއްސައްތާރުގެ ޕާސްޕޯޓް ހިފެހެއްޓި އަމުރުގެ މުއްދަތު ހަމަވެފައިވާ ކަމަށް އޭނާ ވިދާޅުވެއްޖެއެވެ.
ބައެއް މީޑިއާތަކަށް މައުލޫމާތު ދެމުން ނާޒިމް ވިދާޅުވީ ޕާސްޕޯޓް ހިފަހައްޓަން ނެރުނު އަމުރުގެ މުއްދަތު މިހާރު ހަމަވެފައިވާ ކަމަށާއި އޭނާ ފުރައިގެން ދާން ބޭނުންނަމަ ކޮންމެ ވަގުތަކު ވެސް ފުރައިގެން ދެވިދާނެ ކަމަށެވެ. ނާޒިމް ބުނީ އޭނާގެ ޕާސްޕޯޓް ހިފަހައްޓަން ނެރުނު އަމުރުގެ މުއްދަތު އޮގަސްޓް މަހުގެ 24 ވަނަ ދުވަހު ހަމަވުމުން ޕާސްޕޯޓް ހިފެހެއްޓުމުގެ އަމުރު އާކޮށްފައި ނުވާކަމަށެވެ.
ނާޒިމް މިހެން ވިދާޅުވިއިރު، އޭނާގެ މައްޗަށް އެއްޖިންސުން ގުޅުން ހިންގި ކަމުގެ ކުށް ސާބިތުވެ، މިއަދު ހުކުމް ކުރުމަށް އަޑުއެހުމެއް ވަނީ ތާވަލުކޮށްފަ އެވެ. ހުކުމްކުރާ އަޑުއެހުން އޮންނާނީ މިއަދު ހަވީރު 4:30 ގައެވެ.
ނާޒިމްގެ މައްޗަށް ދައުލަތުން އުފުލާފައި ވަނީ އެއްޖިންސުން ގުޅުން ހިންގުމުގެ ކުށުގެ ދައުވާ އެވެ. މީގެ ކުރިން ބޭއްވި އަޑުއެހުމުގައި އޭނާ ވަނީ ކުށަށް އިއުތިރާފްވެފައެވެ. އޭނާ ވިދާޅުވެފައި ވަނީ ބަންގްލަދޭޝްގެ ރައްޔިތެއް ކަމަށްވާ އެމްޑީ އަލަމްގީރް އާއިއެކު ނަހަމަ ގުޅުންތަކެއް އޮތް ނަމަވެސް ލިވާތު ނުކުރާ ކަމަށެވެ.
ބަންގްލަދޭޝްގެ އަލަމްގިރު ނަމަކަށް ކިޔާ މީހަކާއިއެކު އެއްޖިންސުން ގުޅުން ހިންގި މައްސަލައިގައި ނާޒިމް ހައްޔަރު ކުރީ ޖުލައި 28 ވަނަ ދުވަހު ދުވަހު އެވެ. އޭގެ ދެހަފްތާ ފަހުން އޮގަސްޓް 12 ގައި އޭނާ ވަނީ ފުލުހުންގެ ބަންދުން ދޫކޮށްލާފައެވެ.
