އެމެރިކާގެ ދެކުންފުނި ކަމުގައިވާ، ފިޒާއާއި މޮޑާނާއިން ތައްޔާރުރުކުރަމުންދާ ކޯވިޑް19 ވެކްސިން އެމެރިކާގައި ބޭނުން ކުރަން ފެށޭވަރަށް ކުރިޔަށް އޮތް މަދު ހަފްތާއެއްގެ ތެރޭގައި ތައްޔާރުކޮށް ނިމޭނެ ކަމަށް، އެމެރިކާގެ ހެލްތް އެންޑް ހިއުމަން ސާވިސަސް ސެކެޓްރީ އެލެކްސް އާޒަރު އަންގާރަ ދުވަހު ވިދާޅުވެއްޖެއެވެ.
އެމެރިކާގެ ރަސްމީ އިދާރާތަކުން ރިޕޯޓަރުންނަށް މައުލޫމާތު ދީފައިވާ ގޮތުގައި، ރެގިއުލޭޓަރީ އޮތޯރިޓީތަކުން ހުއްދަ ދޭތާ 24 ގަޑިއިރު ތެރޭގައި އެމެރިކާގެ ރައްޔިތުންނާއި ހަމައަށް ވެކްސިން ފޯރުކޮށް ދިނުމާއި އަދި ރައްޔިތުންނަށް ވެކްސިން ދޭން ފެށުމަށް ވާންޖެހޭ ހުރިހާ ތައްޔާރީތަކެއް މިހާރުވަނީ އެގައުމުގެ ސަރުކާރުން ކޮށް ނިންމާފައެވެ. އަދި، ބުނެފައިވަނީ ކޯވިޑް19 ވެކްސިން އަކީ އާދަޔާ ޚިލާފަށް ގަދަ ފިނީގައި ރައްކާ ކޮށްފައި ބަހައްޓަން ޖެހޭ ވެކްސިނަކަށް ވިނަމަވެސް، ވެކްސިން އާންމު ރައްޔިތުނާ ހަމައަށް ފޯރުކޮށްދިނުމުގައި އެއްވެސް ދައްޗެއް ކުރިމަތި ވެގެން ނުދާނެއެވެ.
"އަހަރުމެންނަށް މިހާވަނީ ކުރިޔަށް އޮތް މަދު ހަފްތާތަކެއްގެ ތެރޭގައި ފުޑް އެންޑް ޑްރަގް އެޑްމިނިސްޓްރޭޝަންގެ ހުއްދައަށް ހުށަހެޅި އަދި ބޭނުންކުރަން ފެށޭވަރަށް، ވަރަށް ކާމިޔާބު ދެވެކްސިނެއް ތައްޔާރު ކުރެވިފަ"، ކޯވިޑް ވެކްސިންގެ ފަރުވާ ދިނުމަށް އެމެރިކާގެ ސަރުކާރުން މިހާރު އެކުލަވާލާފައިވާ 'އޮޕަރޭޝަން ރެޕް ސްޕީޑް ޕްރޮގްރާމްގެ' އެންމެ ފަހުގެ މައުލޫމާތު މީޑިއާތަކާއި ހިއްސާކުރުމަށް ބޭއްވި ޕްރެސް ބްރީފިންގައި އާޒަރު ވިދާޅުވެފައި ވެއެވެ.
އޮފިޝަލުން މައުލޫމާތު ދޭގޮތުގައި، މި ދެވެކްސިންގެ 40 މިލިއަން ޑޯޒް މިއަރު ނިމުމުގެ ކުރިން އާންމުންނަށް ފޯރުކޮށް ދެވޭވަރަށް ތައްޔާރު ކުރެވޭނެއެވެ. މިއިން ކޮންމެ ވެކްސިނެއްގެ ވެސް ދެ ޑޯޒް ކޮންމެ މީހަކުވެސް ޖަހަން ޖެހޭނެއެވެ. އަދި ކޮންމެ ޑޯޒެއްވެސް ޖަހަން ޖެހޭނީ 4 ހަފްތާގެ ދުރުމިނެއްގައެވެ. ޑިސެމްބަރަށް ފަހު، މިދެކުންފުނިން ކޮންމެ މަހަކުވެސް މިއިން ކޮންމެ ވެކްސިނެއްގެވެސް 40 މިލިއަން ޑޯޒު އެމެރިކާގެ ރައްޔިތުންނަށް ފޯރުކޮށްދޭ ވަރަށް ތައްޔާރު ކުރަމުންދާނެއެވެ.
ޚަބަރު ލިބިފައިވާ ގޮތުގައި ފިޒާ ކުންފުނިން ތައްޔާރުކުރާ ވެކްސިން ބޭނުންކުރުމުގެ އެމަޖެންސީ ހުއްދަ ލިބޭތާ 7 ނުވަތަ 10 ދުވަސް ތެރޭގައި މޮޑާނާ ކުންފުނިން ތައްޔާރުކުރާ ވެކްސިން ބޭނުންކުރުމުގެ ހުއްދަ އެކުންފުންޏަށް ދޫކުރެވިގެން ދާނެއެވެ.
އެމެރިކާގެ ކަމާބެހޭ އޮފިޝަލުން ހާމަކުރާ ގޮތުގައި، ކުރިޔަށް އޮތް މަދު ހަފްތާތަކެއްގެ ތެރޭގައި އިތުރު ދެވެކްސިނެއްގެ ޑާޓާތައް ތަހުލީލުތަކުގައި ބޭނުން ކުރެވޭވަރަށް ތައްޔާރުކޮށް ނިމޭނެއެވެ.
އެމެރިކާގެ ކޯވިޑް19 ވެކްސިން ޕްރޮގްރާމްގެ ވެރިޔާ މޮންސެފް ސްލޯއީ ވިދާޅުވާ ގޮތުގައި އެމެރިކާގެ އެއްވެސް ރައްޔިތަކު ކޯވިޑް ވެކްސިނުން މަހުރޫމް ކުރެވިގެން ނުދާނެއެވެ. އެމެރިކާގެ ރަސްމީ އިދާރާތަކާއި އަދި އަމިއްލަ ކުންފުނިތައްވެސް، ކޯވިޑް19 ވެކްސިން އާންމު ރައްޔިތުންނާ ހަމައަށް އަދި އެމެރިކާގެ ހުރިހާ ހިސާބަކަށް ފޯރުކޮށްދިނުމަށް މިހާރު ތައްޔާރުވެފައިވާ ކަމަށްވެސް އޭނާ ވިދާޅުވިއެވެ.
