މިހާރު ވެރިކަން ކުރާ ކޯލިޝަންގައި ވަޒީފާތަކުގެ 10 ޕަސެންޓްވެސް ކޯލިޝަން ޕާޓީތަކާއި ނެތްކަމަށާއި، ވަޒީފާތަކުގެ 90 އިންސައްތަ އޮތީ އެމްޑީޕީއަށް ކަމުގައި ވެރިކަން ކުރާ ކޯލިޝަންގެ މައި ޕާޓީ ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.
ރާއްޖެ ޓީވީގެ ޕްރޮގުރާމުގައި ވާހަކަ ދައްކަވަމުން ޤާސިމް ވިދާޅުވީ ވެރިކަމަށް އަންނަނަށް ކޯލިޝަން ހަދާއިރު ވައުދާ އަހުދުވާކަމަށެވެ. ނަމަވެސް މާޒީގައިވެސް އަދި މިހާރުވެސް އެވައުދުތަކަށް އިހުތިރާމް ނުކުރާކަމަށެވެ. ނަމަވެސް މިވެރިކަމުގައި އެކަން ކޮންމެވެސް ވަރަކަށް ރަނގަޅުކަމަށް ޤާސިމް ވިދާޅުވިއެވެ. އޭނާ ވިދާޅުވީ ކޯލިޝަން ވެރިކަމެއް އޮތުމުންވެސް އެންމެ ބޮޑަށް ފާޑުކިޔަނީ އެމްޑީޕީން ކަމަށެވެ.
ނަމަވެސް ވަޒީރުންގެ މަޖިލީހަށް ބެލި ކަމުގައި ވީނަމަވެސް އަދި ސަރުކާރުގެ ސިޔާސީ އެކި ވަޒީފާތަކަށް ބެލި ކަމުގައި ވީނަމަވެސް ކޯލިޝަނަށް 10 ޕަސެންޓް ވަޒީފާވެސް ދީފައި ނުވާކަމަށެވެ. ސަރުކާރުގެ ސިޔާސީ ވަޒީފާތަކުގެ 90 އިންސައްތަ ހިއްސާ ކުރަނީ އެމްޑީޕީންކަމަށް ޤާސިމް ވިދާޅުވިއެވެ.
ވަޒީފާތަކުގެ 10 ޕަސެންޓްވެސް ނެތް ކޯލިޝަނަށް. އެމްޑީޕީއަށް 90 އިންސައްތަ ވަޒީފާ. ވެރިކަަމަށް އާދެވެނީ ކޯލިޝަން ހަދައިގެން. ވެރިކަމަށް އާދެވުނީމާ އެކަމެއް ހަދާނެއްނުވޭ. ވެރިކަން ލިބުނީމާ ވައުދާ އަހުދުވެސް ހަދާން ނުހުރޭ. މިސަރުކާރު އެކަމު ތަންކޮޅެއް ސަހަލު.
– ޤާސިމް ވިދާޅުވިއެވެ.
ޤާސިމް ވިދާޅުވީ މަލްޓިޕާޓީި ނިޒާމުގެ ތެރެއިން މިހާތަނަށް އުފެދުނު ކޮންމެ ވެރިކަމެއްގައިވެސް ޖުމްހޫރީ ޕާޓީން މުހިންމު ދައުރެއް އަދާކުރިކަމަށެެވެ. ކޮންމެ ބަޔަކާއިއެކުވެސް ވެރިކަމަށް އަންނަނީ ބޮޑު ކޯލިޝަނެއް ހަދައި އެގްރީމަންޓުތައްކޮށް އަހުދު ކަށަވަރު ހިފައިގެން ކަމަށެވެ. ނަމަވެސް އެއްވެސް ބަޔަކަށް ވާ އަހުދުތަކަށް އިހުތިރާމް ނުކުރެވޭކަމަށެވެ. މިސަރުކާރުވެސް ހިމެނޭހެން ޤާސިމް ވިދާޅުވީ މިހާތަނަށް ޖޭޕީން ހެދި ކޮންމެ ކޯލިޝަން ވެރިކަމެއްގައި ކަންވީގޮތް ދިވެހި ރައްޔިތުންނަށް ސާފުވާނެކަމަށެވެ.
