ރައީސް ޔާމީން ޑޮލަރު ހޯދަން ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލަށް ގުޅުއްވިއިރު ކައިރީގައި ހުއްޓާ ކަމަށާއި، ރައީސް ޔާމީން ބޭނުންވި އެއްމިލިޔަން ޑޮލަރު ހަމަޖެއްސުމުން ފައިސާއަށްވާ ޑޮލަރު ރައީސް ޔާމީނަށް ދެއްވިކަމަށް ޔޫސުފް ނައީމް ވިދާޅުވިކަމަށް ހުޅުދޫ ދާއިރާގެ ކުރީގެ މެމްބަރު މުހައްމަދު ޝާހިދު (ޝާޑު) ކޯޓުގައި ވިދާޅުވެއްޖެއެވެ.
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކުރައްވައިގެން ކުރީގެ ރައީސްޔާމީން ރިޝްވަތު ނެންގެވިކަމަށް ތުހުމަތުކުރެވޭ މައްސަލައިގެ ދިފާއީ ހެކިންގެ ހެކިބަސް ނެގުމުގެ އަޑުއެހުމެއް ހޮނިހިރު ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ. މި އަޑުއެހުމަށް ދިފާއީ ހެއްކެއްގެ ގޮތުގައި ހާޒިރުކުރީ ރައްޔިތުންގެ މަޖިލީހުގެ ހުޅުދޫ ދާއިރާގެ ކުރީގެ މެމްބަރު މުހައްމަދު ޝާހިދު (ޝާޑު) އެވެ.
މިއަދު ބޭއްވި ޝަރީއަތުގެ މަޖިލީހުގައި ޝާހިދު ވިދާޅުވީ، މުހައްމަދު އިސްމާއިލްއަށް ގުޅުއްވައިގެން ރައީސް ޔާމީން ފައިސާގެ އެކި މުއާމަލާތްތައް ފޯނުކޮށްގެން ކުރައްވާ ކަން އެނގިލައްވާ ކަމަށެވެ. އަދި އެއްމިލިއަން ޑޮލަރު ގަންނަން ބޭނުންވެގެން ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލަށް ރައީސް ޔާމިން ގުޅުއްވި ކަމަށެވެ.
އޭގެ ފަހުން ޔޫސުފް އިސްމާއިލް އޭނާއާ ދިމާވެގެން އެއްމިލިއަން ޑޮލަރުގެ މުއާމަލާތް ހިނގި ކަމަށާއި އަދި ނަގުދު ފައިސާ ލިބުނު ކަމަށް ވިދާޅުވި ކަމަށްވެސް ޝާހިދު ހެކި ބަސްދެމުން ވިދާޅުވިއެވެ. ޑޮލަރު ވިއްކާނެ މީހަކު ހޯދަދޭން ރައީސް މުހައްމަދު އިސްލާމް ގާތު އެދިވަޑައިގެންނެވުމުން އެކި މީސްމީހުނަށް އޭނާ ގުޅި ކަމަށް ވިދާޅުވި ނަމަވެސް ޔޫސުފް ނައީމް ފިޔަވާ މުހައްމަދު އިސްމާއިލް ގުޅި އެހެން މީހެއްގެ ނަމެއް ވިދާޅެއްނުވިއެވެ.
މިމައްސަލާގައި މިއަދު ވަނީ ތިން މީހެއްގެ ހެކިބަސް ނަގާފައެވެ.
