ބޮލީވުޑްގެ ވަރުގަދަ ދެތަރިން ކަމުގައިވާ ރިތިކް ރޯޝަން އާއި ސައިފް އަލީ ޚާން އެކުގައި ފެނިގެންދާ ފިލްމު "ވިކްރަމް ވޭދާ" ގެ ޓްރެއިލާ ދައްކާލައިފިއެވެ.
3 މިނިޓެއްހާ އިރުގެ މި ޓްރެއިލާގައި ރިތިކާއި ސައިފްގެ ވަރުގަދަ ކުރިމަތިލުން ތަކެއް ފެނިގެންދެއެވެ. މި ފިލްމުގައި ރިތިކް ފެނިގެންދާނީ ގޭންގްސްޓާރެއްގެ ގޮތުގައެވެ. އަދި ސައިފް ފެނިގެންދާނީ ފުލުހެއްގެ ރޯލުންނެވެ.
މިއީ މި ދެތަރިން އެކުގައި ކުޅޭ ދެވަނަ ފިލްމެވެ. މީގެ ކުރިން މި ދެތަރިން ވަނީ އެކުގައި 2002 ވަނަ އަހަރު ”ނަ ތުމް ޖާނޯ ނަ ހަމް“އިން ފެނިގެން ގޮސްފައެވެ.
ޓްރެއިލާ އިން ފިލްމާއި މެދުގައި ކުރެވޭ އިންތިޒާރު މިހާރު ވަނީ ވަރަށް ބޮޑުވެފައެވެ. އަދި ހަމަ އެއާއެކުގައި ފިލްމު ބެލުން ތެރިންނަށް ކަމުދާނެ އެއްޗަކަށް ހެދޭތޯ ގިނަ މަސައްކަތް ތަކެއް ވެސް ކުރާނެކަމަށް ޚަބަރުތައް ބުނެއެވެ.
"ވިކްރަމް ވޭދާ" އަކީ ހަމަ މިނަމުގައި 2017 ގައި ގެނެސްދިން ތަމަޅަ ފިލްމު އަސްލަކަށް ބަލައިގެން ހަދާފައިވާ ފިލްމެކެވެ. ހިންދީ ފިލްމުވެސް ޑައިރެކްޓްކުރީ ތަމަޅަ ފިލްމުވެސް ޑައިރެކްޓްކުރި ޕުޝްކަރް-ގަޔަތުރީއެވެ.
ތަމަޅަ ފިލްމުގައި ވޭދާގެ ރޯލު ވިޖޭ ސެތުޕަތީ ކުޅުނުއިރު، ވިކްރަމްގެ ރޯލު ކުޅުނީ އާރް މާދަވަންއެވެ. މި ފިލްމުގައި ދައްކުވައިދެނީ ފުލުހަކާއި ގެންގްސްޓާރެއްގެ މެދުގައި ހިނގާ ކަންތައްތަކެކެވެ.
