އެއް ޖިންސުން ގުޅުން ހިންގުމުގެ ތުހުމަތުގައި ގާނޫނީ ވަކީލު ނާޒިމް ސައްތާރުގެ ވަކީލު ކަމުގެ ހުއްދަ ބާތިލް ކުރަން އެދި ބާ ކައުންސިލަށް ހުށަހަޅާފައިވާ ސުލޫކީ މައްސަލަ ބެލެން ނެތް ކަމަށް އެ ކައުންސިލުން ނިންމައިފިއެވެ.
ނާޒިމްގެ ސުލޫކީ މައްސަލައެއް ބާ ކައުންސިލަށް ހުށަހެޅީ މިދިޔަ ޖުލައި މަހުގެ ހަވަނަ ދުވަހުގައެވެ. އެ މައްސަލައާ މެދު ބާ ކައުންސިލްގެ އެގްޒެކެޓިވް ކޮމިޓީން ގޮތެއް ނިންމީ މީގެ ދެ ދުވަހެއް ކުރިންނެވެ. ނާޒިމްގެ ޝަކުވާ ބާ ކައުންސިލަށް ހުށަހެޅުއްވި ގާނޫނީ ވަކީލު އަހުމަދު ތޯލިބަށް އެ ކައުންސިލުން އިއްޔެ ދިން ޖަވާބުގައި ބުނެފައިވަނީ ގާނޫނީ ފަންނުގެ ގާނޫނުގެ 54 ވަނަ މާއްދާގެ ދަށުން ގާނޫނީ ވަކީލަކާ މެދު ބާ ކައުންސިލަށް ފިޔަވަޅެއް އެޅޭނީ "ގާނޫނީ ވަކީލަކާ ހަވާލުކުރާ މަސައްކަތަކާ ގުޅިގެން" އެ ވަކީލަކު އަމަލުކުރާ ގޮތެއްގެ ސަބަބުން ކަމަށެވެ.
ގާނޫނު ބުނާ ގޮތުން ވަކީލުން އަމަލުކުރަންޖެހޭ ސުލޫކާ ހިލާފުވުމަކީ އެއީ ކަމަށާއި އެހެންވެ ނާޒިމާ މެދު ބާ ކައުންސިލަށް އެޅޭނެ ފިޔަވަޅެއް ނެތް ކަމަށް ވަނީ އަންގައިފައެވެ.
ގާނޫނީ ވަކީލަކާ ހަވާލުކުރާ މަސައްކަތަކާ ގުޅިގެން އެ ގާނޫނީ ވަކީލަކު އަމަލުކުރާ ގޮތެއްގެ ސަބަބުން ވަކީލުން އަމަލުކުރަންޖެހޭ ސުލޫކާ ހިލާފުވެއްޖެ ނަމަ، އެ މައްސަލައަކާ ސީދާގޮތުން ގުޅުންހުރި ކޮންމެ ފަރާތަކަށް ނުވަތަ އެފަދަ އަމަލެއް ހިނގާ ޝަރުއީ ކޯޓެއްގެ ތެރޭގައި ނަމަ އެ ކޯޓަކަށް އެ ގާނޫނީ ވަކީލެއްގެ ޝަކުވާ ބާ ކައުންސިލަށް ހުށަހެޅުމުގެ ހައްގު ލިބިގެންވެއެވެ.
ނާޒިމްގެ މައްޗަށް ދައުވާ ކޮށްފައިވަނީ، އަލަމްގީރް ނަމަކަށް ކިޔާ ބަންގްލަދޭޝް މީހަކާ އެކު އެއް ޖިންސުން ގުޅުން ހިންގަނިކޮށް އާންމުވެފައިވާ ވީޑިއޯއާ ގުޅޭ މައްސަލާގަ އެވެ. ބިދޭސީ މީހާއާއެކު އިތުރު ބަޔެއް ފެންނަ އެހެން ވީޑިއޯތަކެއް ވެސް އާންމުވެފައިވެއެވެ. ސާޅީހަށް ވުރެ ގިނަ މީހުން މީގައި ހިމެނޭއިރު، އޭގެ ތެރޭގައި ރައްޔިތުންގެ މަޖިލީހުގެ ކުރީގެ މެންބަރު މުހައްމަދު "ކާނަލް" ނަޝީދު ވެސް ހިމެނެއެވެ.
ނާޒިމްއަކީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅެވެ. ނަޝީދު ވަނީ ނާޒިމް ހައްޔަރު ކުރުމާ ގުޅިގެން، އެއީ ސިޔާސީ ބޭނުމެއްގައި ވަކި ބަޔެއްގެ މައްސަލަ އެކަނި ބެލުމުގެ ތެރެއިން ކުރާ ކަމެއް ކަމަށް ތުހުމަތު ކުރައްވައިފައެވެ. ނާޒިމް ސަައްތާރު މި ވަގުތު ހުންނެވީ ބަންދުން ދޫކޮށްލައިފައެވެ.
