ވ.އާރަށް ކުރީގެ ފެލިދޫ ދާއިރާގެ މެމްބަރު ޔޫސުފް ނައީމަށް ކުއްޔަށްދިނީ ކުރީގެ ރައީސް ޔާމީން އަންގަވައިގެން ކަމަށް މިމައްސަލާގައި މިއަދު ހެކިބަސް ދެއްވި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރ އަބްދުﷲ ޒިޔަތު ވިދާޅުވެއްޖެއެވެ.
މިއަދުގެ ޝަރީއަތުގެ މަޖިލީހުގައި ދައުލަތުން ވަނީ އާރަށުގެ މުއާމަލާއި ހިނގާދިޔަ ގޮތާއި، މިކަމާއި ގުޅޭ ގިނަ ސުވާލުތަކެއް ޒިޔަތަށް ކުރިމަތިކޮށްފައެވެ. ހެކިބަސް ދެއްވަމުން ޒިޔަތު ވިދާޅުވީ އާރަށުގެ މުއާމަލާތް ކުރިއަށް ގެންދިޔައީ ރައީސް ޔާމީން އަންގަވައިގެންކަމަށެވެ.
މިމުއާމަލާތް ކުރިއަށް ގެންދިއުމަށް އޭނާއަށް އެންގެވީ އޭރުގެ ޓުވަރިޒަމް މިނިސްޓަރ އަހުމަދު އަދީބް މެދުވެރިކޮށް ކަމަށް ޒިޔަތު ވިދާޅުވިއެވެ. ޔޫސުފް ނައީމްގެ ޖޫޓީ ޕްރައިވެޓް ލިމިޑެޓާއިއެކު އެ އެއްބަސްވުމުގައި ސޮއި ކޮށްފައިވަނީ 2015 ވަނަ އަހަރުގެ ސެޕްޓެމްބަރު މަހުގެ 9 ވަނަ ދުވަހުކަމަށެވެ. ސޮއި ކޮށްފައިވަނީ އެމްއެމްޕީއާރުސީގެ މީޓިން ރޫމްގައި އަދީބާއި، ޔޫސުފް ނައީމާއި، އިޓަލީގެ ވިޔަފާރިވެރިޔާގެ އިތުރުން ހެކިވެރިއެއްގެ ހާޒިރުގައެވެ.
އާރަށް ކުއްޔަށް ދިނުމަށް ފުރަތަމަ ކުރެވުނު މަޝްވަރާތަކުގައި ނިންމީ ފަސް މިލިޔަން ޑޮރަލަށް ދޭށެވެ. ނަމަވެސް އެއަގު ބޮޑުވުމުން ސީދާ ރައީސް ޔާމީންގެ އެންގަވައިގެން އެއަގު ތިން މިލިޔަން ޑޮލަރަށް ކުޑަކުރިކަމަށެވެ. ނަމަވެސް އެއްބަސްވުން ސޮއިކޮށްފައިވަނީ އެއަށްވުރެވެސް ކުޑަކޮށް ދެ މިލިޔަން ޑޮލަރަށް ކަމަށެވެ.
އެއްބަސްވުމުގައި ސޮއި ކުރުން ރައީސް ޔާމީން ވަރަށް އުފާވާނެކަމަށާއި، އެމަނިކުފާނަށް އެއްމިލިޔަން ޑޮލަރު ދެއްވިކަމަށް ޔޫސުފް ނައީމް އޭނާގާތުގައި ދެންނެވިކަމަށް ޒިޔަތު ވަނީ މިއަދުގެ ޝަރީއަތުގައި ހެކިބަސް ދެއްވަމުން ވިދާޅުވެފައެވެ.
ދައުލަތުގެ އިތުރުން ދިފާއުން ވަނީ ރަށްތަށް ކުއްޔަށް ދޫކުރަމުންދިޔަ އުސޫލާއި، ރަށްތަކަށް ދޫކުރި އަގުތަކާއި ގުޅޭގޮތުން ޒިޔަތާއި ސުވާލު ކުރިމަތިކޮށްފައެވެ. އެސުވާލުތަކުގެ ޖަވާބުގައި ޒިޔަތު ވިދާޅުވީ ރަށްތައް ކުއްޔަށް ދޭނެ އުސޫތަކާއި ފޯމިއުލަތަކެއް ކަނޑައެޅިފައިވާނެކަމަށެވެ. މިއުސޫލުގެ ތެރެއިން އާރަށް ކުއްޔަށްދޭން ފުރަތަމަ ނިންމި ނަމަވެސް އަގަށް ބަދަލު ގެނެސް ނުއަގުގައި ކުއްޔަށް ދިނީ ރައީސް ޔާމީން އަންގަވައިގެން ކަމަށް ޒިޔަތު ވަނީ ވިދާޅުވެފައެވެ.
ޒިޔަތު ވިދާޅުވީ މިހެކިބަހާއި ގުޅިގެން އޭނާއަށް ދައުލަތުން މިހާރު ތަންފީޒު ކުރަމުންދާ ހުކުމަށް އެއްވެސް ލުޔެ ދީފައި ނުވާކަމަށެވެ. މިހާރު ވެސް ގެންދަނީ އެމްއެމްޕީއާރުސީގެ ޚިޔާނާތުގައި ކޮށްފައިވާ ހުކުމް ތަންފީޒު ކުރަމުން ކަމަށެވެ.
