އިންޑިއާގައި ހަދާ ކޮންމެ ފިލްމަކީ ވެސް ހަމަ އިންޑިއާގެ ސިނަމާގެ ފިލްމެއް ކަމަށާއި އެހެންވެ އެ ގައުމުގެ ފިލްމުތަކުގެ މެދުގައި ފަރަގު އުފެދޭ ގޮތަށް ތަފާތު ނަންތައް ކިޔައިގެން ޚަބަރު ނުގެނެސްދިނުމަށް އިންޑިއާގެ ނުފޫޒު ގަދަ ޑައިރެކްޓަރ/ ޕްރޮޑިއުސަރ ކަރަން ޖޯހަރު ބުނެފިއެވެ.
ފަހަކަށް އައިސް ބޮލީވުޑްގެ ފިލްމު ތަކަށް ވުރެ ސައުތު އިންޑިއަން ނުވަތަ ޓޮލީވުޑްގެ ފިލްމުތައް ހިނގާލެއް ރަނގަޅެއެވެ. އަދި ސައުތުގެ ފިލްމުތައް ހޯދާ ބޮޑު ކާމީޔާބީ މިހާރު ބޮލީވުޑް ފިލްމުތަކަށް ނުލިބެއެވެ.
އަދި ހަމަ އެހެންމެ ބޮލީވުޑްގެ ގިނަ ފިލްމުތަކެއް ފްލޮޕް ވަމުން ދާއިރު ޓޮލީވުޑްގެ ފިލްމުތަކަށް ލިބޭ އާމްދަނީ އަންނަނީ ދުވަހެއް ދުވަހަކަށް އިތުރުވަމުންނެވެ. މިއާއެކު ސައުތުގެ ތަރިންގެ މަޝްހޫރުކަން ވެސް އަންނަނީ އެތައް ގުނައަކަށް ބޮޑުވަމުންނެވެ.
މިކަމުގެ ހެއްކަކަށް މިދިއަ އަހަރު ފަހުކޮޅު ރިލީޒް ކުރި "ޕުޝްޕާ" ފުދެއެވެ. އެ ފިލްމާ އެކުގައި ފިލްމުގެ ލީޑު ދެތަރިންގެ މަޝްހޫރުކަން އެތައް ގުނައަކަށް އުފުލި ދެތަރިންގެ ޑިމާންޑް ވަނީ ވަރަށް ބޮޑުވެފައެވެ. މި ދެތަރިންގެ މަގްބޫލުކަން އިތުރުވެ ބޮލީވުޑުން ވެސް ގިނަ ފުރުސަތުތައް އަންނަނީ އޮހެމުންނެވެ.
ގިނަ ބަޔަކު ގަބޫލުކުރާ ގޮތުގައި މިހާރު ބޮލީވުޑާއި ސައުތު ފިލްމު އިންޑަސްޓްރީ އަޅާކިޔާނަމަ ފެންވަރުގެ ގޮތުން ބޮލީވުޑަކީ ސުމެއްގެ ބައެެކެވެ. ބޮލީވުޑްގެ ފިލްމުތައް ބޮއިކޮޓްކުރަން ގޮވުމަކީ ވެސް މިހާރު ސޯޝަލް މީޑިއާގެ ޓްރެންޑަކަށް ވަނީ ވެފައެވެ. މިކަމާހެދި ބޮލީވުޑްގެ ފަންނާނުންނަށް ހަމަ ނިދިނުލިބެއެވެ.
ނަމަވެސް މީގެ ކުރިން ސައުތުގެ ފިލްމުތަކަށް މާބޮޑު މަގުބޫލުކަމެއް ނުލިބޭ އިރު، ކަރަން ކަހަލަ ނުފޫޒު ގަދަ މީހުންނަށް ޓޮލީވުޑަކީ އަޮންނަ ތަނެއްކަމެއް ވެސް މީގެ ކުރިން ނޭނގެއެވެ. އަދި މިހާރު ކަރަންގެ ވާހަކަ ގޮތްގޮތަށް އަނބުރަމުން އަންނަނީ ބޮލީވުޑް މަޑުމަޑުން އަޑިއަށް ދާތީ ކަމަށް ބެލެވޭކަމަށް މުނިފޫހިފިލުވުމުގެ ޚަބަރުތައް ގެނެސްދޭ ފަރާތްތަކުން ބުނެއެވެ.
