އަތޮޅު ތެރޭގައި މި ސަރުކާރުން ފޯރުކޮށްދޭ ހިޔާވަހިކަމުގެ އެންމެ ބިޔަ މަޝްރޫއު ހދ. ކުޅުދުއްފުށީގައި ފެށުމަށްޓަކައި ބޭނުންވާ ބިން އެ ރަށު ސިޓީ ކައުންސިލުން ކޮންޓްރެކްޓަރުންނާ މިއަދު ހަވާލުކޮށްފިއެވެ.
ކުޅުދުއްފުށި ސިޓީ ކައުންސިލްގައި އޮތް ރަސްމިއްޔާތުގައި ބިން ހަވާލުކުރުމުގެ އެއްބަސްވުމުގައި ކައުންސިލްގެ ފަރާތުން ސޮއި ކުރެއްވީ މުހައްމަދު އާތިފްއެވެ. މިމަޝްރޫއުގެ ކޮންޓްރެކްޓަރުގެ ފަރާތުން ސޮއި ކުރެއްވީ ދޮންބޭޒް ޕްރައިވެޓް ލިމިޓެޑްގެ ހެޑް އޮފް އޮޮޕަރޭޝަންސް އަލީ ހަމްދޫންއެވެ.
އެ ކައުންސިލުން ބުނީ، 439 މިލިއަން ރުފިޔާގެ އެ މަޝްރޫއުގެ ކޮންޓްރެކްޓަރުން ކަމަށްވާ ދޮންބެޒް ޕްރައިވެޓް ލިމިޓެޑާއި ޗައިނާގެ އާރުޑީ23 މެތޮލޮޖިކަލް ކޮންސްޓްރަކްޝަން ގުރޫޕް ކޯ ލިމިޓެޑާ މިހާރު ޕްރޮޖެކްޓް ސައިޓް ހަވާލު ކޮށްފައިވާ ކަމަށެވެ.
އެ މަޝްރޫއުގެ ދަށުން އިމާރާތްކުރާ 11 ބުރީގެ ފަސް ޓަވަރުގައި 1،000 އަކަ ފޫޓުގެ ޖާގައިގައި ތިން ކޮޓަރި އާއި ތިން ފާހާނާ އާއި ސިޓިންރޫމާއި ބަދިގެ އާއި ލޯންޑަރީ އަދި ސްޓޯރު ރޫމު ހިމެނޭނެ ކަމަށް ކައުންސިލުން ބުނެއެވެ. ޖުމުލަ 400 އެޕާޓްމަންޓް ހަދާއިރު، ކޮންމެ އެޕާޓްމަންޓަކަށް ހާއްސަ ސައިކަލް ޕާކިން ޖާގައެއް ވެސް ދޭނެ ކަމަށް ބުންޏެވެ.
ސަރުކާރުގެ PSIP ބަޖެޓުން ކުޅުދުއްފުށީގައި ހިންގުމަށް ހަމަޖެހިފައިވާ 400 ޔުނިޓުގެ ބޯހިޔާވެހިކަމުގެ މަޝްރޫއަށް ބިންކަނޑައަޅައި، ޕްރޮޖެކްޓްގެ ކޮންޓްރެކްޓަރ އަށް ޕްރޮޖެކްޓް ސައިޓް ހަވާލުކުރުން
🔗 https://t.co/KlrOubSaU9 pic.twitter.com/OcTvGMpLlz
— Kulhudhuffushi City Council (@kfcitycouncil) August 31, 2022
މީގެއިތުރުން ހައުސިން ޔުނިޓްތަކުގައި ދިރިއުޅޭ ފަރާތްތަކަށް ހިތްފަސޭހަ މާހައުލެއް ގާއިމުކުރުމަށްޓަކައި ޔުނިޓްތައް ވަށައިގެން އަލި ކުރެވޭނެ ކަމަށާއި އަދި މުނިފޫހިފިލުވާލުމަށް ޕާކެއް ހެދުމަށް ނިންމާފައިވެއެވެ. އެގާރަ ބުރިއަށް ހަދާ ހައުސިން ޔުނިޓްތަކުގެ އެންމެ ތިރީ ބައި ބޭނުންކުރަން ނިންމާފައިވަނީ ކޮމާޝަލް އަދި މެއިންޓަނަންސް އޮފީހަށެވެ.
ދައުލަތުގެ މިއަހަރުގެ ބަޖެޓުގައި އަތޮޅު ތަކުގައި ސަރުކާރުން ކުރިއަށް ގެންދަން ނިންމާފައިވާ ބޯހިޔާވަހިކަމުގެ މަޝްރޫއުތަކަށް 1.5 ބިލިއަން ރުފިޔާ ހާއްސަކޮށްފައިވެއެވެ.
