ޖުމްހޫރީ ޕާޓީގެ ވިސްނުމާއި ފިކުރާކީ ކޮބައިކަން ގިނަ މީހުންނަށް އެނގުން މުހިއްމުކަމުގައި ޖޭޕީގެ ކައުންސިލް މެންބަރު އަދި ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެއެެވެ.

މި ސަރުކާރުގެ ކޯލިޝަންގައި ހިމެނޭ ޖޭޕީ އަށް ބައެއް މީހުން ސޮއިކުރި ހަފުލާގައި އޭނާ ވިދާޅުވީ، އެ ޕާޓީއާ ގުޅޭ މީހުން ކޮށްދޭންވީ ކަމަކީ އެހެން މީހުން ޕާޓީ އަށް ވެއްދުމާއި ޕާޓީގެ ވިސްނުމާއި ފިކުރު އާންމުކުރުމާއި މަގުސަދުތައް ކިޔައިދިނުން ކަމަށެވެ. ގާސިމްގެ އަނބިކަނބަލުން ނަހުލާ ވިދާޅުވީ، ޖޭޕީއަކީ އިސްލާމްދީނާއި ގައުމު ދެކެ ލޯބިވާ ޕާޓީއެއް ކަމަށެވެ.

އަޅުގަނޑުމެން އެދެނީ މި ޕަޓީއަށް ވަންނަ ކޮންމެ މެމްބަރެއްގެ ފަރާތުން މި ޕާޓީއަށް މެމްބަރުން އިތުރުކޮށްދީ މި ޕާޓީގެ މަގްސަދަކީ ކޮބައިކަން ކިޔައިދިނުން. ފޮޓޯއެއް ނަގަފައި ބޯ އިތުރުކުރުމަކީއެއް ނޫން އަޅުގަނޑުމެންގެ މަގްސަދަކީ. ގާސިމް އިބްރާހީމްގެ ފިކުރަކީ، ޖުމްހޫރީ ޕާޓީގެ ފިކުރަކީ ކޮބައިކަން ރާއްޖޭގެ ކަންކޮޅުތަކަށް ގެންދިޔުން މަގްސަދަކީ. ކޮށްދެއްވާފައިހުރި ކަންތައްތަކާއި، ގާސިމް އިބްރާހީމް ގައުމަށް ހުރި ލޯތްބާއި، މި ޕާޓީގެ ކައުންސިލްގެ މެމްބަރުންގެ ވިސްނުމާއި ފިކުރު ހުރިހާ ދިމާލަކަށް ފޯރުކޮށްދިނުން މަގްސަދަކީ.

– ނަހުލާ ވިދާޅުވިއެވެ.

ނަހުލާ ވިދާޅުވީ، ޖޭޕީއަކީ ގައުމާއި އިސްލާމްދީނަށް ލޯބިކުރާ ޕާޓީއެއް ކަމަށާއި އަދި ހާއްސަކޮށް ޒުވާނުންނަށް ގިނަ ފުރުސަތުތަކެއް ފަހިވެފަވާ ޕާޓީއެއްކަމަށެވެ. އެހެންކަމުން ޕާޓީގެ ވިސްނުމާއި ފިކުރާކީ ކޮބައިކަން ގިނަ މީހުންނަށް އެނގުން މުހިއްމު ކަމުގައެވެ.

ނަހުލާ ވިދާޅުވީ، ގާސިމްގެ ހިތުގައި ދީނާއި ގައުމާއި ވަތަނަށް އޮތް ލޯބި އާންމުންނަށް ކިޔައިދޭން އެދިވަޑައިގަންނަވާ ކަމަށެވެ. ޖޭޕީއާއި ގުޅޭ އަންހެެނުންގެ އަދަދު އިތުރުކަން ފާހަކަކުރައްވާ ނަހުލާ ވިދާޅުވީ، ކޮންމެ ކަމެއްގައިވެސް އަންހެނުންގެ މަސައްކަތަކާއި އަންހެނުންގެ ރޫހަކީ ވަަށް މުހިންމު ކަމެއްކަމަށެވެ. އަދި ހާއްސަކޮށް މިކަހަލަ ކަންކަމުގައި އަންހެނުންގެ ދައުރު ވަރަށް ބޮޑުކަމަށެވެ.

ނަހުލާ ވިދާޅުވީ، އަންހެނުންގެ ކުރިއެރުމަށްޓަކައި އަންހެނުން ނުކުރި މަސައްކަތެއް އެހެން ބަޔަކު ނުކުރާނެކަމަަށެވެ. ގިނަ އަދަދެއްގެ ޒުވާނުން ރޭ ޖޭޕީއަށް ސޮއިކޮށްފައިވާއިރު، އަލަށް ގުޅުނު މެމްބަރުންގެ ފޯމުތަކާއި ހަވާލުވެވަޑައިގެންނެވީ މިިނިސްޓަރ ނަހުލާއެވެ.