ބަރުލަމާނީ ނިޒާމަކީ މިރާއްޖެއަށް އެކަށީގެންވާ ނިޒާމެއް ނޫންކަމަށާއި، ރާއްޖޭގެ މިއަދުގެ ހާލަތަށް ބަލާއިރު، ބަރުލަމާނީ ނިޒާމު ގެނެސްފިނަމަ، ރާއްޖޭގެ ސިޔާސީ ހަމަޖެހުން ގެއްލިގެންދާނެ ކަމުގައި އަދާލަތު ޕާޓީގެ ރައީސް، އަދި ހޯމް މިނިސްޓަރ ޝެއިޚް އިމްރާން ވިދާޅު ވެއްޖެއެވެ.
ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލުކޮށް، ބޮޑުވަޒީރު ސަރުކާރު ހިންގައި، ރައީސުލްޖުމްހޫރިއްޔާ ދައުލަތުގެ އެންމެ އިސް ވެރިއެއްގެ ގޮތުގައި ހުންނެވުމަށް އެމްޑީޕީގެ ރައީސް މުހައްމަދު ނަޝީދު ބޭނުންފުޅުވާ އިސްލާހު މިއަދު އާންމު ކުރައްވާފައި ވަނިކޮށް، މިރޭ ޝޭޚް އިމްރާން ކުރެއްވި ޓުވީޓެއްގައި ވިދާޅުވެފައިވަނީ، ރާއްޖެއަށް ބަރުލަމާނީ ނިޒާމެއް ގެނެސްފިނަމަ އަވަސް އަވަހަށް ސަރުކާރު ބަދަލުވެ، ރައްޔިތުން ބައިބައިވެ، ރައްޔިތުން ހާލުގައި ޖެހުން ފިޔަވަައި ލިބޭނެ އިތުރު މޮޅުކަމެއް ނޯންނާނެ ކަމުގައެވެ.
Barulamanee nizaamakee MI Raajjea ekasheyna nizaameh noon.Raajjeyge miadhuge haalathugai barulamaanee nizaam genesfinama siyasee hamajehun gelli avas avahah sarukaaru badhalauve Rayyithun bai baive,rayyithun haalugaijehun fiyavai ithuru molhukameh nuvaane.
— Imran Abdulla (@ShimranAb) August 15, 2022
ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލު ކުރުމަށް ނަޝީދު ކުރައްވަމުން ގެންދަވާ މަސައްކަތްތަކަށް ތާއީދު ނުކުރާކަނޭކަން ޝޭޚް އިމްރާން ހާމަ ކުރައްވާފައިވާއިރު، ރައީސް ސާލިހުގެ އިކޮނޮމިކް މިނިސްޓަރު ފައްޔާޒު އިސްމާއިލްވެސް ވަނީ، ބަރުލަމާނީ ނިޒާމަކަށް ތާއީދު ނުކުރައްވާނޭކަން ހާމަކޮށް ނަޝީދަށް މިރޭ ރައްދު ދެއްވާފައެވެ.
ފައްޔާޒު ނަޝީދަށް ރައްދު ދެއްވާފައިވަނީ، ބަރުލަމާނީ ނިޒާމަކަށް ފައްޔާޒު އިސްމާއިލްގެ ތާއީދު ބޭނުންވާކަމަށް ނަޝީދު މިއަދު ވިދާޅުވެފައި ވަނިކޮށެވެ.
މީގެ ކުރިން ފައްޔާޒް އިސްމާއީލަށް ވަރަށް ބޮޑަށް ފާޑު ވިދާޅުވެ، ފާއިތުވެދިޔަ އެމްޑީޕީގެ ޗެއަރޕާސަން އިންތިޚާބުގައިވެސް ފައްޔާޒާއި ދެކޮޅަށް ކެމްޕޭން ކުރެއްވި ނަޝީދު ވަނީ ރާގު ބަދަލު ކުރައްވާ، ފައްޔާޒުއާއި ދެކޮޅަށް ނިކުންނެވުމަކީ ހެއްދެވުނު ގޯހެއްކަމުގައި ވިދާޅުވެފައެވެ.
އެއާއެކު ނަޝީދުވަނީ ވެރިކަމުގެ ނިޒާމު ބަދަލު ކުރުމަށް ބޭނުންވާ ގަރާރު ގާނޫނުހަދާ މަޖިލިހަށް ހުށަހަޅުއްވާ، އަދި މި ގަރާރު ތަފްސީލު ކޮށްދިނުމަށް މިއަދު ނޫސްވެރިންގެ ބައްދަލުވުމެއްވެސް ބާއްވަވާފައެވެ.
މި ނޫސްވެރިންގެ ބައްދަލުވުމުގައި ނަޝީދުވަނީ، ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލުކޮށް، ބޮޑުވަޒީރު ސަރުކާރު ހިންގައި، ރައީސުލްޖުމްހޫރިއްޔާ ދައުލަތުގެ އެންމެ އިސް ވެރިއެއްގެ ގޮތުގައި ހުންނެވުމަށް ގައުމީ މަޖިލިހަށް ހުށަހެޅެއްވި ގަރާރުގެ ތަފްސީލްތައް އާންމު ކުރައްވާފައެވެ.
ނަޝީދު އާންމު ކުރެއްވި އެ އިސްލާހުގައި ވަނީ ރައީސުލްޖުމްހޫރިއްޔާގެ މަޤާމުގައި ހުންނަވާ ބޭފުޅަކަށް ލިބިވަޑައިގަންނަވާނެ ބާރުތައް ތަފްސީލްކޮށްދެއްވާފައެވެ. އެގޮތުން ރައީސްއަށް ލިބިވަޑައިގަންނަވާ ބާރުތަކުގެ ތެރޭގައި މިނިވަން މުއައްސަސާތަކަށް ބޭފުޅުން އައްޔަން ކުރެއްވުމާއި، އަސްކަރިއްޔާގެ އެންމެ އިސްވެރިޔާގެ މަޤާމު ރައީސްއަށް ދެއްވުން ހިމެނެއެވެ.
ބައެއް ފަރާތްތަކުން ދެކޭ ގޮތުގައި ނަޝީދުގެ މަގުސަދަކީ މިވަގުތަށް، ރައީސަކަށް ހުންނަވާ ބޭފުޅަކަށް ބާރުތައް ލިބިދޭ ގޮތަށް ރުހުންދީގެން، ވެރިކަމުގެ ނިޒާމު ބަދަލު ކުރުމަށް ރަައީސް ސާލިހުގެ ތާއީދު ހޯއްދެވުމެވެ.
ބަރުލަމާނީ ނިޒާމު ގެނައުމަށް ނަޝީދު ކުރައްވަމުން ގެންދަވާ މަސައްކަތްތަކަށް ރާއްޖޭގެ އެއްވެސް ސިޔާސީ ޕާޓީއަކުން އަދި ތާއީދު ކުރައްވާފައެއް ނުވެއެވެ.
