މިޔަންމާގެ އަސްކަރީ ސަރުކާރުން ހައްޔަރު ކޮށްފައިވާ އެގައުމުގެ އިދިކޮޅު ލީޑަރު، އަންގސަން ސޫކީ އިތުރު 6 އަހަރަށް ޖަލަށްލާން އެގައުމުގެ ކޯޓަކުން ހުކުމް ކޮށްފިއެވެ.

ރައްޔިތުން އިންތިޚާބުކުރި އަންގސަން ސޫކީގެ ސަރުކާރު ވައްޓާލާ، 2021 ވަނަ އަހަރުގެ ފެބްރުއަރީމަހު އޭނާ ހައްޔަރު ކުރުމަށްފަހު، ދައުލަތާއި ދެކޮޅަށް ހަތިޔާރު އުފުލުމާއި، ކޮރަޕްޝަނާއި އަދިވެސް އިތުރު ތުހުމަތުތަކުގައި މިހާރުވެސް 11 އަހަރުގެ ޖަލު ހުކުމެއް ތަންފީޒު ކުރަމުންދާ އަންގސަން ސޫކީ އިތުރު 6 އަހަރަށް ޖަލަށް ލާން ހުކުމް ކޮށްފައިވަނީ ކޮރަޕްޝަންގެ އިތުރު ތުހުމަތު ތަކެއްގައެވެ.

އުމުން މިހާރު 77 އަަހަރުގެ ސޫކީގެ މައްޗަށް ސާބިތު ވެފައިވަނީ، ޑޮވް ޚިން ކީޔި ފައުންޑޭޝަންގެ ފަންޑުގެ ބޭނުން ނަހަމަ ގޮތުގައި ބޭނުން ކޮށްފައިވާ ކަމުގެ ތުހުމަތުތަކެވެ. ޑޮވް ޚިން ކީޔި އަކީ، ސިއްޙަތާއި ތައުލީމު ފުޅާކުރުމަށް އޭނާ އުފެއްދި ޖަމިއްޔާއެކެވެ. އޭނާގެ މައްޗަށް ސާބިތު ވެފައިވަނީ މި ފަންޑުގެ ބޭނުން ކޮށްގެން ގެއެއް އެޅުމާއި، ސަރުކާރުގެ ބިންތައް ނުއަގުގައި ކުއްޔަށް ދޫކުރުމުގެ ތުހުމަތުތަކެވެ.

އަންގސަން ސޫކީގެ ޝަރީއަތް ކުރެވެމުންދަނީ ނޫސްވެރިނަށްވެސް އާންމުންނަށްވެސް ސިއްރުންނެވެ. އަދި ޝަރީއަތާއި ގުޅުންހުރި އެއްވެސް މައުލުމާތެއް އާންމު ކުރުން ކޯޓުންވަނީ އޭނާގެ ލޯޔަރުންނަށް މަނާ ކޮށްފައެވެ.

މިހަފްތާގެ ހޯމަ ދުވަހު ހުކުމް ކޮށްފައިވާ ސޫކީގެ 4 ކޮރަޕްޝަން ކޭސްގައިވާގޮތުން، ސޫކީވަނީ މާރކެޓްގެ އަގަށްވުރެ ހެޔޮކޮށް ކުއްޔަށް ހިފުމަށް އޭނާގެ މަގާމްގެ ބޭނުން ނުރަގަޅު ގޮތުގައި ކޮށް، އަދި ހިލާސާބަހަށް މަސައްކަތް ކުރުމުގެ ނަލުގައި އެއްކުރި ފައިސާތަކުން ގެއްވެސް ބިނާ ކޮށްފައެވެ.

މިއިން ކޮންމެ ތުހުމަތަކަށްވެސް 3 އަހަރުގެ ޖަލު ހުކުމެއް ސޫކީގެ މައްޗަށް އިއްވާފައިވިނަމަވެސް، މީގެއިން ފުށުއަރާ އަހަރުތައް ކަނޑާލުމުން ޖަލުގައި މި ހުކުމްތަކަށް އޭނާ ހޭދަކުރަންޖެހެނީ 6 އަހަރު ދުވަހުގެ މުއްދަތެކެވެ.

ސޫކީވަނީ މިހުރިހާ ތުހުމަތުތަކަށްވެސް ދެކޮޅު ހައްދަވާފައެވެ. އަދި ބެލެވޭ ގޮތުގައި އޭނާގެ ގާނޫނީ ވަކީލުން މި ހުކުމްތައް އިސްތިއުނާފް ކުރާނެއެވެ.