ރާއްޖޭގައި މިވަގުތިބި އެންމެ ތަޖުރިބާކާރު ނޫސްވެރިން ކިޔަވައިދުނުމަށް ހަމަޖެހިފައިވާ ނޫސްވެރިކަމުގެ ކުރު ކޯހެއް ބޭއްވުމަށް ހަމަޖެހިއްޖެއެވެ.
އަންނަ ހަފްތާގައި ފެށުމަށް ހަމަޖެހިފައިވާ މި ކޯސް ކުރިޔަށް ގެންދިއުމަށް ހަމަޖެހިފައިވަނީ، "ނޫސްވެރިކަމުގެ އަސާސީ ހުނަ ދަސްކޮށްދޭ ކޯސް" މި ނަމުގައި ދެހަފްތާގެ މުއްދަތަށް، މިމަހުގެ 21 އިން ސެޕްޓެމްބަރު 6 އަށް، ރޭގަނޑު 8 އިން 10:30 އަށް، އަހުމަދިއްޔާ އިންޓަރނޭޝަނަލް ސްކޫލުގައެވެ.
މި ކޯހަކީ ރާއްޖޭގެ ނޫސްވެރިކަމުގެ ދާއިރާގައި މިހާރުވެސް މަސައްކަތް ކުރަމުންދާ ޒުވާނުންނާއި ނޫސްވެރިކަމުގެ ދާއިރާއަށް އަލަށް ވަނުމަށް ޝައުގުވެރިވާ ޒުވާނުންނަށް، އޮށްޓަރުހުރި ފޭރާން ހެޔޮ ޚަބަރު ލިޔާނޭ ގޮތް ދަސްދިނުމުގެ އިތުރުން ނޫސްވެރިކަމުގެ އަސާސީ ހުނަރުތައް ދަސްކޮށްދޭ ތަމްރީން ޕްރޮގްރާމެއް ހިންގުމަށް މޯލްޑިވްސް މީޑިއާ ކައުންސިލާއި، ބްރޯޑްކާސްޓިންގ ކޮމިޝަނާއެކު ފާއިތުވެދިޔަ އާދީއްތަ ދުވަހު ސޮއި ކޮށްފައިވާ ފަހުމުނާމާގެ ދަށުން ޝަހީބު މީޑިއާއިން ހިލޭ ހިންގުމަށް ހަމަޖެހިފައިވާ ކޯހެކެވެ.
މި ކޯހުގައި ބައިވެރިވުމަށް ހުޅުވާލެވިފައިވަނީ 30 ޖާގައެވެ. އޭގެ ތެރެއިން 20 ޖާގައެއް މީޑީއާތަކުގައި މަސައްކަތް ކުރަމުންދާ ފަރާތްތަކަށް ހުޅުވާލެވިފައި ވާއިރު، އަނެއް 10 ޖާގައަށް މީހުން ހޮވުމަށް ހަމަޖެހިފައިވަނީ، އާންމުކޮށް ހުޅުވާލައިގެން، ކުރިމަތިލާ ފަރާތްތަކާއި އިންޓަރވިއު ކޮށްގެންނެވެ. މީޑިއާތަކަށް ޚާއްސަ ކުރެވޭ ޖާގަތަކަށް މީހުން ކަނޑައެޅުމަށް ހަމަޖެހިފައިވަނީ މޯލްޑިވްސް މީޑިއާ ކައުންސިލާއި ބްރޯޑްކާސްޓިންގ ކޮމިޝަން ގުޅިގެންނެވެ.
މި ކޯހުގައި ބައިވެރިވުމުގެ އެންމެ ފަހުގެ ތާރީޚަކީ މިމަހުގެ 17ވާ ބުދަ ދުވަހުގެ މެދުރު 2:00 އެވެ.
