ރާއްޖޭގައި ހުންނަ އިންޑިއާގެ ހައިކޮޝަން ހުޅުމާލެއަށް ބަދަލުކޮށްފިއެވެ.
އެ ކޮމިޝަންގެ އޮފިޝަލަކު މިއަދު ވިދާޅުވީ އެ އިދާރާގެ ހިދުމަތްތައް ދެން ލިބޭނީ ހުޅުމާލެ ފުރަތަމަ ފިޔަވަހީގެ ހިތިގަސްމަގުގެ ގޯޅި ހަތަރެއްގައި ހުންނަ ލޮޓް ނަންބަރު 11499، އިމާރާތުން ކަމަށެވެ. އެއީ ހުޅުމާލެ އިންޑޯ ސުވިމިން ޕޫލް ކުރިމައްޗަށް އޮންނަ ގޯޅިއެވެ.
އިންޑިއާ ހައިކޮމިޝަން މިހާތަނަށް ހިންގަމުން އައީ އަމީރު އަހުމަދު މަގުގައި ހުންނަ ހ. އަތިރީގެ އާގޭގައެވެ. އެ އިމާރާތް ބާވުމައި އަދި ޖާގައިގެ ދަތިކަން ހުރުމުގެ ސަބަބުން ހިދުމަތް ދިނުމަށް ދަތިވާ ކަމަށް އެ ކޮމިޝަނުން ކުރިން ބުނެފައިވެއެވެ.
އިންޑިއާ ހައި ކޮމިޝަނުން އާންމުކޮށް ދެމުން އަންނަނީ ވިސާގެ ހިދުމަތްތަކެވެ. އެތަނުން އެކިއެކި ހިދުމަތްތައް ދޭނީ ކުރިން ވެސް ހިދުމަތްތައް ދެމުން އައި ގަޑިތަކުގައި ކަމަށް ހައި ކޮމިޝަނުން ބުނެއެވެ. މާލޭގައި ހުންނަ އިންޑިއާ ހައި ކޮމިޝަނަކީ ވަރަށް ވަރުގަދަ އަށް ސެކިއުރިޓީ ބަލަހައްޓަމުން ދިޔަ ތަނެކެވެ. އެތަނުގައި ދޭތެރެ ދޭތެރެއިން އެސްއޯ ފުލުހުންނާއި ސިފައިން ވެސް ފޯރިމަރަމުން ދިޔައެވެ.
އިންޑިއާގެ އެމްބަސީ އަޅަން ހުޅުމާލޭގެ ދެވަނަ ފިޔަވަހިން ދިން ބިމުގައި ސެޕްޓެމްބަރު 4، 2019 ގައި ވަނީ ބިންގާ ވެސް އަޅައިފައެވެ. އިންޑިއާ އެމްބަސީގެ އާ އިމާރާތުގެ ބިންގާ އަޅުއްވައިދެއްވީ އެ ގައުމުގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރާއި ރާއްޖޭގެ ފޮރިން މިނިސްޓަރު ޝާހިދެވެ.
