މިދިޔަ ހޮނިހިރު ދުވަހު އަނިޔާވެރިގޮތަކަށް މަރާލާފައި އޮއްވާ ފެނުނު ޝިއާއު މުހައްމަދު ސައީދުގެ ހަށިގަނޑު ޕޯސްޓްމޮޓަމް ހެދުމަށް ރާއްޖެއިން ބޭރަށް ފޮނުވައިފިއެވެ.
އުމުރުން 22 އަހަރުގެ ޝިއާއު މުހައްމަދު ސައީދު (ޝިއާ) މަރާލާފައި އޮތްވާ ފެނުނީ ހ. ޝީރީންވިލާގައި ހުރި އެޕާޓްމަންޓަކުންނެވެ. މިއީ ރާއްޖޭގައި ފަހުގެ ތާރީޚެއްގައި ހިންގި އެންމެ ރަހުމުކުޑަ ގަތުލުކަމަށް މަންޒަރު ދުށް ބައެއް ފަރާތްތަކުން ބުނެފައިވެއެވެ. ފުލުހުން ބުނީ ޝިއާއުގެ ހަށިގަނޑު ޕޯސްޓްމޯޓަމް ހަދަން މިއަދު ރާއްޖެއިން ބޭރަށް ފޮނުވާފައިވާކަމަށެވެ. ޚަބަރު އޮންލައިނަށް އެނގިފައިވާގޮތުގައި ޝިއާއުގެ ހަށިގަނޑު ޕޯސްޓްމޯޓަމް ހެދުމަށް ފޮނުވާފައިވަނީ އިންޑިއާއަށެވެ.
ޝިއާއުގެ މަރުގެ މައްސަލާގައި ހައްޔަރުކޮށްފައިވަނީ ފ. ނިލަންދޫ، ފިނިފެންމާގޭ މުރުން 23 އަލީ ޝާހިލްއެވެ. ޝިއާއުގެ މަރުގެ މައްސަލައިގައި އަލީ ޝާހިލް ވަނީ ޝަރީއަތް ނިމެންދެން ބަންދުކުރަން ކްރިމިނަލް ކޯޓުން ޢަމުރުކޮށްފައެވެ.
ޚަބަރު އޮންލައިނަށް މައުލޫމާތުދިން ބައެއް ފަރާތްތަކުން ކިޔައިދިން ގޮތުގައި، ހ. ޝީރީންވިލާގެ 9ވަނަ ފަންގިފިލާގައި އާންމު ގޮތެއްގައި ދިރިއުޅޭކަމަށް ބެލެވެނީ ޒުވާން ދެމަފިރިއެވެ. އަދި ޝިއާ މަރާލި ޝާހިލް އެ ފްލޯގައި ދިރިއުޅޭން ފެށިތާ މާގިނަ ދުވަހެއް ނުވާނެ ކަމަށާއި، އަދި ޝިއާ އެ އިމާރާތުން ފެންނަން ފެށިތާވެސް މާގިނަ ދުވަހެއް ނުވާނެ ކަމުގައެވެ. އަދި ޝިއާއާއި ޝާހިލްއަކީ ދެމަފިރިން ކަމަށް ނުބެލެވޭކަމަށްވެސް މައުލޫމާތު ދިން ފަރާތުން ކިޔައިދީފައި ވެއެވެ.
ބައެއް މީޑިއާތަކުގައި މަރުވި ޝިއާއާއި އޭނާގެ ގާތިން ޝާހިލްއަކީ ދެމަފިރިންކަމަށް ރިޕޯޓު ކޮށްފައިވި ނަމަވެސް، އެކަން އަދި ޔަގީން ކުރެވިފައެއް ނުވެއެވެ.
ޚަބަރު އޮންލައިންއާއި މައުލޫމާތު ހިއްސާކުރި ފަރާތްތަކުން ކިޔައި ދީފައިވާ ގޮތުގައި، ހ. ޝީރީން ވިލާގެ 9 ވަނަ ފަންގިފިލާއަކީ އާންމުކޮށް ހަފްތާ ބަންދުގައި ގިނަ ޒުވާނުންތަކެއް އެއްވެ އަޑުބާރުކޮށް ލަވައާއި މިޒުޒިކު ކުޅޭ ތަނެއް ކަމުގައެވެ. އަދި އާންމު ގޮތެއްގައި ކޮންމެ ހަފްތާއަކުވެސް ބުރާސްފަތި ދުވަހުގެރެއަކީ، ގިނަ ޒުވާނުންތަކެއް އެއްވެ، ދަންވަންދެން މި ފަންގިފިލާގައި ބާރަށް ލަވަޖަހާ މިއުޒިކް ކުޅޭ ރެއެއް ކަމުގައެވެ.
ރޭ ހިނގި މިއަނިޔާވެރި މަރުގެ ހާދިސާ ހިންގިކަމަށް ބެލެވެނީ ރޭގެ މެންދަމުގެ ކުރީގެ ވަގުތެއްގައެވެ. މިމައުލޫމާތު ލިބި ފުލުހުން މިހާދިސާ އެ ފަންގިފލާއަށް ގޮސްފައިވަނީ ރޭގެ 11:30 ހާއިރުއެވެ. މައުލޫމާތު ލިބިފައިވާ ގޮތުގައި ޝާހިލްއާއި ޝިއާ ހ. ޝީރީންވިލާގެ 9 ވަނަ ފަންގިފިލާގައި ދިއިރުޅެއްމުން ގޮސްފައިވަނީ އެ ފްލޯއިން ކޮޓަރިއެއް ކުއްޔަށް ހިފައިގެންނެވެ.
ފައިތުވެދިޔަ އަހަރުވެސް ގޮތް ނޭގޭގޮތަށް އެ އިމާރާތުގެ 10 ވަނަ ފަންގިފިލާގައި އުޅުނު ބިދޭސީއަކުވެސް ވަނީ މަރުވެފައެވެ. އަދި އެއަށްފަހު އެ ފަންގިފިލާގައި އުޅުނު އެހެން ބިދޭސީއަކު ފެނިފައިވަނީ ދަންޖެހިފައި ހުއްޓައެވެ.
