ރޭ މާލޭގައި އަނިޔާވެރިކޮށް މަރާލި ޝިއާއު މުހައްމަދުގެ މަރުގެ މައްސަލާގައި ހައްޔަރުކުރި އަލީ ޝާހިލް ޝަރީއަތް ނިމެންދެން ބަންދުކުރަން ކްރިމިނަލް ކޯޓުން ދެންމެ އަމުރުކޮށްފިއެވެ.
ހ. ޝީރީންވިލާގެ އެޕާޓްމެންޓެއްގެ ތެރޭގައި ކަރާއި އަތާއި ފައި ބުރިކޮށް، މަރާލާފައި އޮއްވާ ފެނުނު ޏ. ފުވައްމުލަކަށް ނިސްބަތްވާ ޝިއާއުގެ މަރުގެ މައްސަލާގައި ޝާހިލް ހައްޔަރުކުރީ އެގެއިންނެވެ. ޝާހިލް ޝަރީއަތް ނިމެންދެން ބަންދުކުރަން ކްރިމިނަލް ކޯޓުން އަމުރުކުރީ އޭނާގެ ބަންދާ މެދު ގޮތެއް ނިންމަން ސިއްރުކޮށްގެން ކުރިއަށް ގެންދިޔަ އަޑުއެހުމުގަ އެވެ. އެ އަޑުއެހުން ސިއްރުކުރީ ފުލުހުން އެދިގެންނެވެ.
އޭނާގެ ބަންދާމެދު ގޮތެއް ނިންމަން މިއަދު ކޯޓަށް ގެންދިއުމުން ކޯޓުން ވަނީ ޝަރީއަތް ނިމެންދެން އޭނާ ބަންދުކޮށްފައި ބެހެއްޓުމަށް އަމުރުކޮށްފަ އެވެ. އެ މަޖިލީސް ކުރިއަށް ގެންގޮސްފައި ވަނީ ސިއްރުކޮށްގެންނެވެ.
އަޑުއެހުން ސިއްރު ކުރީ ފުލުހުން އެދިގެންނެވެ. އެކަމަކު ސިއްރު ކުރި ސަބަބު ހާމަކޮށްފައެއް ނުވެއެވެ. އުމުރުން 23 އަހަރުގެ ޝާހިލް އަކީ ގައުމީ ފެންވަރުގެ ސްކޭޓަރެކެވެ. އޭނާ ވަނީ 2017 ވަނަ އަހަރު އިންޑިއާގައި ބޭއްވި އިންޓަނޭޝަނަލް ސްކޭޓިން ކޮމްޕެޓިޝަނުގައި އެއްވަނަ ވެސް ހޯދާފައެވެ.
ޝާހިލް ރޭ ހައްޔަރުކޮށް، ގެންދިޔައީ ވެސް ހެޒްމެތު ސޫޓް ލައްވައިގެންނެވެ. ބެލެވޭ ގޮތުގައި އެއީ އޭނާގެ ގައިގައި ލޭ ހުރުމުން ހެކި ރައްކާތެރި ކުރުމަށެވެ.
