ރޭގެ ދަންވަރުގެ ވަގުތެއްގައި ހެންވޭރު ޝީރީން ވިލާގެ 9ވަނަ ފަންގި ފިލާގައި އަނިޔާވެރިގޮތަކަށް އަންހެނަކު މަރާލުމުގެ ތުހުމަތުގައި ފުލުހުން ހައްޔަރު ކޮށްފައިވަނީ ރައްޖޭގައި ސްކޭޓް ކުރުމަށް މަޝްހޫރު ފ.ނިލަންދޫ، ފިނިފެންމާގޭ އަލީ ޝާހިލް، 22، ކަމަށް މައުލޫމާތު ލިބިއްޖެއެވެ. މަރާލާފައިވާ އަންހެން މީހާއަކީ މީހާއަކީ ޏ. ފުވައްމުލަކު 23 އަހަރު އަންހެން ކުއްޖެއްކަމަށްވެސް ވަނީ މައުލޫމާތު ލިބިފައެވެ.

ފުލުހުން އޭނާ ކުށުގެ ވެށިން ހައްޔަރު ކޮށްފައިވާއިރު، އޭނާ ފުލުހުންގެ ބެލުމުގެ ދަށަށް ގެންދެވިފައިވަނީ ޕީޕީއީ ކިޓުގައެވެ.

މަރުގެ ހާދިސާ ހިންގިކަމަށް ބެލެވެނީ ރޭގެ މެންދަމުގެ ކުރީގެ ވަގުތެއްގައިކަމަށް ބެލެވެއެވެ. އެހެންނަމުން ހާދިސާގެ މައުލޫމާތު ފުލުހުންނަށް ލިބި، ކްރައިމް ސީންއަށް ފުލުހުން ގޮސްފައިވަނީ މެންދަމުގެ ވަގުތެއްގައެވެ. މައުލޫމާތު ލިބިފައިވާ ގޮތުގައި ޝާހިލްއާއި އޭނާގެ އަންހެނުން ހ. ޝީރީންވިލާގެ 9 ވަނަ ފަންގިފިލާގައި ދިއިރުޅެއްމުން ގޮސްފައިވަނީ އެ ފްލޯއިން ކޮޓަރިއެއް ކުއްޔަށް ހިފައިގެންނެވެ.

ހާދިސާގެ މައުލޫމާތު އެނގިތިބި ބައެއް ފަރާތްތަކުން ޚަބަރު އޮންލައިނަށް މައުލޫމާތު ދީފައިވާ ގޮތުގައި، އަންހެން ކުއްޖާ މަރާލާފައިވަނީ ކަރު ބުރި ކޮށްލައިގެންނެވެ.

މަރާލި އަންހެން ކުއްޖާގެ ހަށިގަޑު ކަޅު ކޮތަޅުތަކެއްގައި އެމްބިއުލާންސަށް އަރުވަން ގެންދިޔައިރު، ހަށިގަޑުގެ ބައިތައް ވަކިކޮތަޅުތަކަށް ލާފައިކަމަށް ބެލެވޭ ކަޅު ކޮތަޅުތައް އެމްބިއުލާންސަަށް އެރުވިތަން ވަނީ ފެނިފައެވެ.