ޔުނައިޓެޑް ސްޓޭޓްސް އޭޖެންސީ ފޯ އިންޓަރނޭޝަނަލް ޑިވެލޮޕްމަންޓް (ޔޫއެސްއޭއައިޑީ) އިން ރާއްޖެއަށް 3 ލައްކަ އެމެރިކާ ޑޮލަރުގެ އެހީއެއް ދީފިއެވެ.
އެމެރިކާ ސަރުކާރުގެ ބެލުމުގެ ދަށުން ކުރިއަށް ގެންދާ އެޖެންސީއެއް ކަމަށްވާ ޔޫއެސްއެއިޑްގެ ފަރާތުން ރާއްޖެއަށް ފައިސާގެ އެހީތެރިކަން ފޯރު ކޮށްދީފައިވަނީ ކުދި އަދި މެދު ފަންތީގެ ވިޔަރާރިތަކަށް އެހީތެރިވެދޭ މާލީ އިދާރާއެއް ކަމަށްވާ ސްމޯލް އެންޑް މީޑިއަމް އެންޓަރޕްރައިޒް ޑިވެލޮޕްމަންޓް ކޯޕަރޭޝަން (އެސްޑީއެފްސީ)އަށާއި، ވިޔަފާރި ކުރިއެރުވުމަށް އެހީތެރެވެދޭ ކޮމްޕެނީއެއް ކަމުގައިވާ އެފްޖޭއެސް ކޮންސަލްޓިންއަށެވެ.
މިގޮތުން ޔޫއެސްއެއިޑުން އެސްޑީއެފްސީއަށް ފޯރުކޮށް ދީފައިވަނީ 86،000 އެމެރިކާ ޑޮލަރެވެ. މި އެހީތެރިކަމާއެކު، ގްރީން ކްލައިމެޓް ފަންޑްއަށް އެކްރެޑިކްވާ ރާއްޖޭގެ ފުރަތަމަ ކުންފުންޏަށް އެސްޑިއެފްސީ ވުމަށް އެހީތެރި ވެދޭނެއެވެ. ގްރީން ކްލައިމެޓް ފަންޑަށް އެކްރެޑިޓް ވުމާއެކު، ގްރީން ކްލައިމެޓް ފަންޑުގެ ސީދާ އެހީތެރިކަން އެދުމުގެ މަގު މި ކުންފުންޏަށް ފަހިވެގެން ދާނެއެވެ.
ޔޫއެސްއިންޑްއިން ބުނެފައިވާ ގޮތުގައި، މިއެހީގެ ދަށުން، އެންޓަރޕްރައިސް ޑިވެލޮޕްމަންޓް ޕްރޮގްރާމް ޑިޒައިންކޮށް ޑިވެލޮޕްމަންޓް ކްލައިމެޓް ސްމާރޓް ސޮލިއުޝަންތައް ދެނެގަނެ، މޫސުމަށް އަންނަ ބަދަލުތަކުން ފަތުރުވެރިކަމަށް ކުރިމަތިވާ ރިސްކުތައް ކުޑަކުރުމަށް އެހީތެރިކަން ފޯރުކޮށް ދެވޭނެ ކަމަށެވެ.
