ކުރީގެ ރައީސް ޔާމީންގެ ވެރިކަމުގައި ފޮރިން މިނިސްޓަރުގެ މަޤާމުން އަދާކުރެއްވި ދުންޔާ މައުމޫން، ރައީސް ޔާމީނާއި، ޕީޕީއެމްއަށް ފާޑު ކިޔަމުންދަނީ އާދޭސް ކޮށްކޮށްވެސް ޕީީޕީއެމްއިން ދުންޔާ ބަލައި ނުގަތުނުންކަމުގައި ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.

އަދުރޭ މިހެން ވިދާޅުވީ ރައީސް ޔާމީންގެ ވެރިކަމުގައި ފޮރިން މިނިސްޓަރުކަންވެސް ކުރެއްވި އެމަނިކުފާނަށް ބޮޑުބޭބެ ވިދާޅުވީ ދުންޔާ މައުމޫން ރައީސް ޔާމީނާއި ގުޅޭގޮތުން ދެއްކެވި ވާހަތަކަށް ރައްދު ދެއްވައި ކުރެއްވި ޓުވީޓެއްގައެވެ. ރައީސް ޔާމީނަށް ރައްދު ދެއްވާ ދުންޔާ އާންމު ކުރެއްވި ވިީޑިއޯ މެސެޖުގައި ވިދާޅުވީ ގައުމުގައި އެންމެ ބޮޑެތި ވައްކަމުގެ މައްސަލަތައް ހިންގާފައިވާ ރައީސް ޔާމީންގެ ވެރިކަމުގައި ކަމަށެވެ.

ދުންޔާގެ ވާހަތަކާއި ގުޅިގެން އަދުރޭ ވިދާޅުވީ، ޕީޕީއެމްއިން ދުންޔާ ބަލައި ނުގަތުުމުން ޤައުމަށް ޣައްދާރުވެފައިވާ މީހުންގެ ފަހަތަށް އަރައި ރައީސް ޔާމީންގެ ނަންފުޅު ބޭނުން ކުރައްވައިގެން އެކި ވާހަކަ ދައްކަވަމުންދަނީ އަމިއްލަ މަޝްހޫރުކަން ހޯދުމަށް ކަމަށެވެ. ދުންޔާއަކީ ރައީސް ޔާމީންގެ ވެރިކަމުގައި ފޮރިން މިނިސްޓަރުކަމުގައި ހުންނަވައި އިސްތިއުފާ ދެއްވުމަށްފަހު، އާދޭސްކޮށްގެން ސްޓޭޓް މިނިސްޓަރަކަށް ވަޑައިގެންނެވި ބޭފުޅެއްކަމަށްވެސް އަދުރޭ ވިދާޅުވިއެވެ.

ދުންޔާއަށް: އާދޭސްކޮށްކޮށް ވެސް ޕީ.ޕީ.އެމްއިން ބަލައި ނުގަތުމުން ގައުމުގެ ޣައްދާރުންނާ އެއްސަފަށް އަރާހުރެ ރައީސް ޔާމީންގެ ނަންފުޅު ބޭނުންކޮށްގެން މަޝްހޫރުވާން އުޅުނަސް އެކަމެއްނުވާނެ. ވަޒީރުކަމުން އިސްތިޢުފާދީފަ އާދޭސްކޮށްގެން ސްޓޭޓް މިނިސްޓަރަކަމަށް އައީ އެ ސަރުކާރު އަނިޔާވެރިވީމަތޯ؟

– އަދުރޭ ވިދާޅުވިއެވެ.

ދުންޔާ ރައީސް ޔާމީންގެ ވެރިކަމުގެ ފޮރިން މިނިސްޓަރުކަމުގެ މަޤާމުން އިސްތިއުފާ ދެއްވުމަށްފަހު 2017 ވަނަ އަހަރު ވަނީ ހެލްތު މިނިސްޓްރީގެ ސްޓޭޓް މިނިސްޓަރުކަމާއި ހަވާކުވެ ވަޑައިގެންފައެވެ.

ޕީޕީއެމްއާއި އެމްއެންޕީ އަކީ ކުރިއަށް އޮތް ރިޔާސީ އިންތިހާބުގައި ރިޔާސީ ކެންޑިޑޭޓުން ނެރެން ނިންމާފައިވާ ދެ ޕާޓީއެވެ. ޕީޕީއެމްގެ ރިޔާސީ ޓިކެޓް ރައީސް ޔާމީނަށް ދިނުމަށް ނިންމުމުން ރައީސް ޔާމީން ވަނީ އެކަން ގަބޫލުކުރައްވާފައި ކަމަށްވެސް ޕީޕީއެމުން ބުނެފައިވެއެވެ. އެމްއެންޕީގެ ރިޔާސީ ޓިކެޓް ދޭނެ ބޭފުޅެއް ކަނޑައެޅުމަށް ބާއްވާ ރިޔާސީ ޕްރައިމަރީގައި ވާދަކުރައްވާނެ ކަމަށް ނާޒިމު ވެސް ވަނީ ވިދާޅުވެފައެވެ.