މޯލްޑިވްސް ނޭޝަނަލް ޕާޓީއާއި، އެޕާޓީގެ ލީޑަރު ޕްރޮމޯޓްވާން އޮތް ހަމައެކަނި ގޮތަކީ ރައީސް ޔާމީންގެ ނަންފުޅު ބޭނުން ކުރުންކަމަށް ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ ރައީސް ޔާމީންގެ ވެރިކަމުގައި ފޮރިން މިނިސްޓަރުކަންވެސް ކުރެއްވި އެމަނިކުފާނަށް ބޮޑުބޭބެ ވިދާޅުވީ ދުންޔާ މައުމޫން ރައީސް ޔާމީނާއި ގުޅޭގޮތުން ދެއްކެވި ވާހަތަކަށް ރައްދު ދެއްވައި ކުރެއްވި ޓުވީޓެއްގައެވެ. ރައީސް ޔާމީނަށް ރައްދު ދެއްވާ ދުންޔާ އާންމު ކުރެއްވި ވިީޑިއޯ މެސެޖުގައި ވިދާޅުވީ ގައުމުގައި އެންމެ ބޮޑެތި ވައްކަމުގެ މައްސަލަތައް ހިންގާފައިވާ ރައީސް ޔާމީންގެ ވެރިކަމުގައި ކަމަށެވެ.
ދުންޔާގެ ވާހަކަތަކަށް ރައްދު ދެއްވަމުން ޝިޔާމް ވިދާޅުވީ ރައްޔިތުން ތަހައްމަލުކުރި އަދި ތަހައްމަލްކުރާ ބިރުވެރި ޒަމާނެއްވާނަމަ އެޒިންމާ އެންމެ ބޮޑަށް ނަންގަވަންޖެހޭ ބޭފުޅުން މިފަދަ ވާހަކަ ދެއްކެވުން ލަދުވެތި ކަމަށެވެ. އަދި މިއަދު މިފަދަ ވާހަތައް ދައްކާ އެންމެ ބޮޑު ސަބަބަކީ ދުންޔާ ހަރަކާތްތެރިވާ ޕާޓީއާއި، އެޕާޓީގެ ލީޑަރަކަށް ހުންނެވި ބޭފުޅާ ޕްރޮމޯޓްވާން އޮތް ހަމައެކަނި ގޮތަކީ ރައީސް ޔާމީންގެ ނަންފުޅު ބޭނުން ކުރުންކަމަށް ޝިޔާމް ވިދާޅުވިއެވެ.
ރައްޔިތުން ތަހައްމަލުކުރި އަދި ތަހައްމަލްކުރާ ބިރުވެރި ޒަމާނެއްވާނަމަ އެޒިންމާ އެންމެ ބޮޑަށް ނަންގަވަންޖެހޭ ބޭފުޅުން މިފަދަ ވާހަކަ ދެއްކެވުން ލަދުވެތި. މިވަގުތު ތިހުންނެވި ޕާޓީ އަދި އެޕާޓީގެ ލީޑަރު ޕްރޮމޯޓު ކުރަން އޮތް ހަމައެކަނި ގޮތަކީ ރައީސް ޔާމިންގެ ނަންފުޅަށް ތިއޮތީވެފައި.
– ޝިޔާމް ވިދާޅުވިއެވެ.
ޕީޕީއެމްއާއި އެމްއެންޕީ އަކީ ކުރިއަށް އޮތް ރިޔާސީ އިންތިހާބުގައި ރިޔާސީ ކެންޑިޑޭޓުން ނެރެން ނިންމާފައިވާ ދެ ޕާޓީއެވެ. ޕީޕީއެމްގެ ރިޔާސީ ޓިކެޓް ރައީސް ޔާމީނަށް ދިނުމަށް ނިންމުމުން ރައީސް ޔާމީން ވަނީ އެކަން ގަބޫލުކުރައްވާފައި ކަމަށްވެސް ޕީޕީއެމުން ބުނެފައިވެއެވެ. އެމްއެންޕީގެ ރިޔާސީ ޓިކެޓް ދޭނެ ބޭފުޅެއް ކަނޑައެޅުމަށް ބާއްވާ ރިޔާސީ ޕްރައިމަރީގައި ވާދަކުރައްވާނެ ކަމަށް ނާޒިމު ވެސް ވަނީ ވިދާޅުވެފައެވެ.
