ރައީސް އިބުރާހިމް މުހައްމަދު ސާލިހު ވެރިކަމަށް ވަޑައިގަތުމާއެކު، މިސަރުކާރުގެ ޚާރިޖީ ސިޔާސަތުގެ ތެރެއިން ފެނިގެންދިޔަ އެންމެ ބޮޑު އެއް ބަދަލަކަށް ވެގެން ދިޔައީ ޒަމާނުއްސުރެ އިންޑިއާއަށް ޚާއްސަ ކުރެވިފައި އޮތް މަގާމް އަލުން ރުޖޫޢަ ކުރެވިގެން ދިޔަ ދިއުމެވެ.

އެއީ ރާއްޖެއާއި އެންމެ އަވައްޓެރި ގައުމެއްގެ ގޮތުގައި އިންޑިއާ އޮވެފައި، އަދި ވަކީން ޚާއްސަ ސިޔާސަތެއްގެ ގޮތުގައި "އިންޑިއާ ފަސްޓް ޕޮލިސީ" އަލުން ވަރުގަދަކޮށް ދެމެހެއްޓުމެވެ.

މިގޮތުން ރައީސް ޔާމިންގެ ވެރިކަމުގައި ރާއްޖޭގެ ތަރައްގީގައި ޗައިނާއިން އަދާކޮށްފައިވާ މުހިންމުން ދައުރު އެއަށްވެސް ވަރުގަދަކަމާއެކު އިންޑިއާއިން މިހާރު ގެންދަނީ އަދާކުރަމުންނެވެ. އަދި ރައީސް ޔާމިންގެ ވެރިކަމުގައި ހީނަރުވެފައި އޮތް އިންޑިއާ ދިވެހިރާއްޖޭގެ ގުޅުން އަލުން "ހަމަ މަގަށް" އަޅުވާ، މީޒާންކޮށް، އިންޑިއާ މިހާރު އޮތީ ހުރިހާ މައިދާނެއްގައިވެސް ދިވެހިރާއްޖޭގެ އެންމެ ގާތް މިތުރުގެ ގޮތުގައެވެ. އެފަދަ ދެވަނައެއް ނުވާ ރަހުމަތްތެރިއެއްގެ މަގާމުގައެވެ.

އޭގެ ނަތިޖާވެސް، ރައީސް ސާލިހުގެ ސަރުކާރުގައި ހިންގަމުންދާ ތަރައްގީގެ މަޝްރޫޢުތަކުންނާއި، ކޯވިޑްގެ ހާލަތުން އަރައިގަތުމަށް އިންޑިއާއިން ވެދީފައިވާ އެހީތެރިކަމުންނާއި އަދި އޭގެ ފަހުން އިންޑިއާއިން ރާއްޖެއަށް ފޯރުކޮށްދެމުންދާ މާލީ އެހީތެރިކަމުން ވަރަށްވެސް ސާފުކޮށް ފެންނާން އޮތް ކަމުގައި ދަންނަވާން ޖެހެއެވެ.

ހަމަ އެއާއެކު ފާހަގަ ކޮށްލާންޖެހޭ އަނެއް ނުކުތާއަކީ، ރައީސް ސާލިހު އިންޑިއާއަށް ރަސްމީ ދަތުރުފުޅު ކުރެއްވި މިހުންމު ދަނޑިވަޅެވެ.  މިދަނޑިވަޅަކީ ވެރިކަން ކުރާ އެމްޑީޕީގެ އެތެރޭގެ ކޯޅުންތައް ހައްދުން ނެއްޓި، އެޕާޓީގެ 2023ގެ ރިޔާސީ ޓިކެޓް ވަކިފަރާތަކާއި ހަވާލުކުރުމުގެ އެންމެ ފަހުގެ މަރުހަލާއާއި ހަމައަށް ދަތުރުކޮށްފައި އޮތް ދަނޑިވަޅުވެސް މެއެވެ.

އަދި އޭގެ އިތުރުން އިދިކޮޅު ޕީޕީއެމްއިން ކުރިޔަށް ގެންގޮސްފައިވާ އިންޑިއާ އައުޓު ކެމްޕޭންގެ އަޑު ފަނޑުވެ، އެޕާޓީގެ ރިޔާސީ ޓިކެޓް ރައީސް ޔާމިންއާއި ހަވާލު ކުރުމާއިއެކު، މިވަގުތަކީ ޕީޕީއެމްގެ ސިޔާސީ ކުރިމަގުވެސް ވަރަށްވެސް ބޮޑަށް ސާފުވެގެން ގޮސްފައިވާ ދަނޑިވަޅެއްކަންވެސް މިފުރުސަތުގައި ފާހަގަ ކޮށްލާން ޖެހެއެވެ.

އެހެންކަމުން، ރައީސް ސާލިހު އިންޑިއާއަށް ރަސްމީ ދަތުރުފުޅެއް ކުރެއްވި މި ދަނޑިވަޅުގައި އިންޑިއާއިން ރާއްޖެއަށް މާލީ ގިނަގުނަ އެހީތެރިކަމެއް ފޯރު ކޮށްދީފައި ވިނަމަވެސް، ރައީސް ސާލިހުގެ މި ދަތުރުފުޅުގެ ފަހަތުގައި ސިޔާސީ ގިނަގުނަ ސަބަބަތައް ހުރިކަމުގައި ގަބޫލުކުރާން ޖެހެއެވެ. މިގޮތުން ބަލާއިރު، މިދަތުރުފުޅަކީ 2023ގެ ރިޔާސީ އިންތިޚާބާ އެއްގޮތަށްވުރެ ގިނަ ގޮތްގޮތުން ގުޅި ލާމެހިފައިވާ ދަތުރުފުޅެއްކަމީވެސް ކަށަވަރުވެ ޔަގީންވާން އޮތް ކަމެކެވެ.

ބުރިޖް އިފްތިތާހުކޮށް، މާލީ ބޮޑެތި އެހީއެއް!

ރައީސް ސާލިހު އިންޑިއާށް ރަސްމީ ދަތުރުފުޅެއް ކުރައްވާފައިވަނީ، މުޅި ދުނިޔެ އިގްތިސާދީ ބޮޑު ކާރިސާއަކާއި ކުރިމަތިލާން ޖެހިފައިވާ ދަނޑިވަޅެއްގައެވެ.

އަދި ކުރިޔަށް އޮތް ރިޔާސީ އިންތިޚާބު އަހަރެއްހާ ދުވަހަށް ގާތްވެފައިވާއިރު، ކުރިމަތިވެފައިވާ މާލީ ގޮންޖެހުންތަކާއެކުވެސް، ސަރުކާރުން ކުރިޔަށް ގެންދާ ތަރައްގީގެ ޕްރޮޖެކްޓްތަކަށް ހުއްޓުމެއް ނުގެނެސް ކުރިޔަށް ގެންދާން ސަރުކާރަށް މަޖުބުރުވެފައިވާ މިދަނޑިވަޅުގައި ރައީސް ސާލިހު އިންޑިއާއަށް ކުރެއްވި މުހިންމު ދަތުރުފުޅުގައި އިންޑިއާއިން ވަނީ ތަރައްގީގެ މަޝްރޫއުތައް ހަލުއިކުރުމަށް ބޭނުންވާ މާލީ އެހީތެރިކަން ރާއްޖެއަށް ފޯރުކޮށްދޭނެކަން އިއުލާން ކޮށްފައެވެ.

މީގެތެރެއިން އެންމެ ބޮޑަށް ފާހަގަ ކޮށްލެވެނީ، އިންޑިއާގެ އެހީގައި ރާއްޖޭގައި ކުރިޔަށްގެންދާ ތަރައްގީގެ މަޝްރޫއުތައް އިތުރަށް ހަލުއިކޮށް މަޝްރޫޢުތައް އަވަހަށް ނިމުމަށްޓަކާ ބޭނުންވާ އިތުރު 100 މިލިއަން ޑޮލަރުގެ ކްރެޑިޓް ލައިނެއް ހަމަޖެއްސުމަށް ނިންމާފައިވާކަން އިންޑިއާގެ ބޮޑުވަޒީރު ނަރެންދުރަ މޯޑީ އިއްޔެ އިއުލާން ކުރެއްވި ކުރެއްވުމެވެ.

އިންޑިއާއިން މި ހަމަޖެއްސި ކްރެޑިޓްލައިންއާއެކީ، މިހާތަނަށް އެގައުމުން ރާއްޖެއަށް ދޫކޮށްފައިވާ ކްރެޑިޓް ފެސިލިޓިގެ އަދަދު 900 މިލިއަނަށް ޑޮލަރަށް އަރާނެއެވެ. އެއީ މީގެ ކުރިން ހަމަޖައްސާ ދީފައިވާ 800 މިލިއަން ޑޮލަރުގެ ފެސިލިޓީ ހިމަނައިގެންނެވެ.

މީގެ އިތުރުންވެސް ރައީސް ސާލިހުގެ ސަރުކާރުން ކުރިޔަށް ގެންދާ ހައުސިންގ މަޝްރޫޢުތަކުގެ ތެރެއަށް އިންޑިއާއިން އެހީތެރިކަން ފޯރުކޮށްދީގެން މިހާރުވަނީ އިތުރު 2،000 ހައުސިންގ ޔުނިޓް މާލޭ ސަރަހައްދުގައި އަޅާގޮތަށް ހަމަޖެހިފައެވެ.

އިންޑިއާގެ ބޮޑުވަޒީރު ނަރެންދުރަ މޯޑީއާއެކު ރައީސް ސާލިހު އިއްޔެ ބޭއްވެވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ސާލިހު ވިދާޅުވެފައިވަނީ، މި ހައުސިންގ ޔުނިޓްތައް އެޅުމަށް ނިންމާފައިވަނީ އިންޑިއާގެ އެގްޒިމް ބޭންކުން ދޫކުރާ 119 މިލިއަން ޑޮލަރުގެ ލޯން އެހީގައި ކަމުގައެވެ.

އިންޑިއާގެ އެހީގައި ހުޅުމާލޭގައި މިހާރުވެސް ދަނީ 4،000 ހައުސިންގ ޔުނިޓް އެޅުމުގެ މަސައްކަތް ކުރަމުންނެވެ.

މީގެ އިތުރުންވެސް، އިންޑިއާގެ ބޮޑުވަޒީރު މޯޑީގެ ދައުވަތަކަށް ރައީސް ސާލިހުން އިންޑިއާއަށް ކުރައްވަމުން ގެންދަވާ ދަތުރުފުޅުގައި މިހާރުވަނީ ތިލަމާލެ ބުރިޖްގެ ބިންގާ އަޅުއްވާ، އޭގެ އިތުރުން 6 އެމްއޯޔޫއެއްގައި ސޮއިކުރައްވާފައެވެ.

އިންޑިއާއާއި ރާއްޖެއިން ސޮއި ކޮށްފައިވާ އެމްއޯޔޫތަކުގެ ތެރޭގައި، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާއި ކައުންސިލްތަކަށް ތަމްރީނުދިނުމުގެ އެއްބަސްވުމާއި، ސައިބާ ސެކިއުރިޓީއާ ގުޅޭ މައުލޫމާތު ދެ ގައުމުގެ ދެމެދު ބަދަލުކުރުމަށް އެއްބަސްވުމާއި، މަސްވެރިކަން ކުރެވޭނެ ސަރަހައްދުތައް ދެނެގަތުމުގެ ގާބިލުކަން އިތުރުކުރުމުގެ އެއްބަސްވުމާއި، ކާރިސާތަކުގައި ދިމާވާ ކަންކަން މެނޭޖުކުރުމުގެ ދާއިރާއިން ދެ ގައުމު ގުޅިގެން މަސައްކަތް ކުރުމަށް އެއްބަސް ވުމުގެ އިތުރުން، ފުލުހުންގެ ހިދުމަތް ހަރުދަނާ ކުރުމުގެ ގޮތުން 41 މިލިއަން ޑޮލަރުގެ ލޯނެއްގެ ދަށުން ހިންގާ އުމްރާނީ ތަރައްގީގެ މަޝްރޫއުގެ އެއްބަސްވުން ވެސް ހިމެނެއެވެ.

ނަތިޖާއަކީ ކޮބާ؟

ކުރިޔަށް އޮތް ރިޔާސީ އިންތިޚާބު އަހަރެއްހާ ދުވަހަށް ގާތްވެފައި ވަނިކޮށް ރައީސް ސާލިހު އިންޑިއާއަށް ކުރެއްވި ރަސްމީ ދަތުރުފުޅުގައި މާލީ ގިނަގުނަ އެހީތަކެއް ސަރުކާރަށް ފޯރުކޮށްދިނުމުގެ ނަތިޖާއެއްގެ ގޮތުން ސަރުކާރުން ކުރިޔަށް ގެންދާ މުހިންމު ބޮޑެތި ބައެއް މަޝްރޫއުތަކަށް ހަލުއިކަން އައިސް، އަދި މިސަރުކާރުންވެސް އެޅުމަށް އަމާޒު ހިފާފައިވާ ބްރިޖް މަޝްރޫއު ހަގީގަތަކަށް ވެގެން ދާނޭކަމުގެ ޔަގީކަން މިވަނީ ވަރަށްވެސް ބޮޑު ތަނުން އިތުރުވެފައެވެ.

މިގޮތުން އިންޑިއާގެ އެފްކޮންސްއިން ހާމަ ކޮށްފައިވާ ގޮތުގައި، އިއްޔެ ބިންގާ އެޅިގެންދިޔަ ތިލަމާލެ ބުރިޖްގެ މާލެއާއި ކައިރީގައި އޮތް ވިލިގިލި ގުޅުވާލާ ސެގްމެޓް އަންނަ އަހަރުގެ ޖުލައި 23 އަށް ނިންމައި، މާލެ އާއި ވިލިމާލެއާ ދެމެދުގައި އާންމު ދަތުރުތައް ކުރަން އަންނަ އަހަރު އޮގަސްޓް 15 ގައި ފަށިގެން ދާނެއެވެ.

އެހެންނަމަވެސް، މިހުރިހާ ތަރައްގީގެ މަޝްރޫއުތަކަށް އިންޑިއާގެ އެހީތެރިކަން ލިބިގެން ދިޔަ ނަމަވެސް، ގަބޫލުކުރެވޭ ގޮތުގައި، ރައީސް ސާލިހުގެ މި ދަތުރުފުޅުގެ ފަހަތުގައި ތަރައްގީގެ މަޝްރޫއުތަކާ އެއްވަރަށް ނުވަތަ އެއަށްވުރެއްވެސް މުހިންމުކަން ބޮޑު ގޮތެއްގައި ހިމެނިގެންދާނީ ސިޔާސީ މަގުސަދުތަކެވެ.

ސަބަބަކީ މި މުހިންމު ދަނޑިވަޅަކީ، ކުރިޔަށް އޮތް 2023ގެ އެމްޑީޕީގެ ރިޔާސީ ޓިކެޓް ކަށަވަރު ކުރުމަށް ރައީސް ސާލިހު ކުރައްވަމުން ގެންދަވާފައިވާ މަސައްކަތްތަކަށް އަމަލީސިފަ އަންނާން ޖެހިފައިއޮތް ވަގުތަށްވެފައި، ރިޔާސީ އިންތިޚާބަށް އެމްޑީޕީގެ ޓިކެޓްގައި ނިކުންނެވުމުގައި އިންޑިއާގެ ތާއީދާ އިންތިހާއަށް މުހިންމުވާނެތީއެވެ.

އަދި މީގެ އިތުރުން ރައްޔިތުންގެ މަޖިލިހުގެ ރައީސް މުހައްމަދު ނަޝީދާއި ރައީސް ސާލިހާއި ދެބޭފުޅުންގެ މެދުގައިއޮތް ކޯޅުން ފަތަހަކޮށް، މިހަގުރާމަ ކާމިޔާބު ކުރުމުގައިވެސް ރައީސް ސާލިހަށް އިންޑިއާގެ "ބެކިން" ނުހަނު މުހިންމު ކަމުގައިވެސް ގަބޫލުކުރަން ޖެހެއެވެ.

އެހެންކަމުން މާލީ ގިނަގުނަ އެހީތެރިކަމެއް އިންޑިއާގެ ފަރާތުން ކަށަވަރު ކުރެވިގެންދިޔަ ރައީސް ސާލިހުގެ އިންޑިއާ ދަތުރުފުޅުގެ ހަގީގީ ކާމިޔާބީ ވަޒަން ކުރެވިގެންދާނީ، ކުރިޔަށް އޮތް މަދު ދުވަސް ކޮޅެއްގެ ތެރޭގައި، ސިޔާސީގޮތުން ރައީސް ސާލިހު ކުޅިފަސް ހޯއްދަވާ މިންވަރެއްގެ މައްޗަށް ކަމުގައި ދަންނަވާން ޖެހެއެވެ.