އެމެރިކާގެ ގާނޫނުހަދާ މަޖިލިހުގެ ރައީސާ ނާންސީ ޕެލޮސީ ޓައިވާނަށް ވަޑައި ނުގަތުމަށް ޗައިނާއިން އިންޒާރު ދީފައިވަނިކޮށް، މިއަދުގެ ވަގުތެއްގައި ޕެލޯސީ ޓައިވާނުގައި ލޭންޑު ކުރާނެކަމުގައި މީޑިއާތަކުން ރިޕޯޓު ކޮށްފިއެވެ.
ޕެލޯސީ ޓައިވާނަށް ކުރެއްވުމަށް ހަމަޖެހިފައިވާ މިދަތުރުފުޅާއި ގުޅިގެން ޗައިނާއިން މީގެ ކުރިން އެމެރިކާއަށް އިންޒާރު ދީފައިވަނީ، އަލިފާނާއި ނުކުޅުމަށް ބުނެއެވެ.
މިދަތުރުފުޅާއި ގުޅިގެން ޗައިނާއިން ބުނެފައިވަނީ، ޕެލޯސީ މިދަތުރުފުޅު ކުރައްވައިފިނަމަ، ބަދަލުގައި ޗައިނާއިން ވަރަށް ވަރުގަދަ ރައްދެއް ދޭނެކަމުގައެވެ. އަދި ޗައިނާއިން ބުނެފައިވަނީ މިފަދަ ދަތުރުފުޅެއް ޗައިނާއިން ދެކޭނީ ޗައިނާ ޓައިވާންގެ މައްސަލަ ގަސްތުގައި ގޯސްކުރުމުގެ މަގުސަދުގައި ކުރައްވާ ދަތުރުފުޅަކަށް ކަމުގައެވެ.
ޗައިނާގެ ވަރުގަދަ އިންޒާރުތަކާއެކުވެސް، ބައިނަލްއަގުވާމީ މީޑިއާތަކުން މިހާރު ރިޕޯޓު ކުރަމުންދާ ގޮތުގައި އެމެރިކާގެ ގާނޫނުހަދާ މަޖިލިހުގެ ރައީސް ނާންސީ ޕެލޯސީ މިއަދުގެ ވަގުތެއްގައި ޓައިވާނަށް ޒިޔާރަތް ކުރައްވާނޭ ކަމުގައެވެ. އަދި ޕެލޯސީގެ ދަތުރުފުޅާއި ގުޅިގެން އާދަޔާއި ޚިލާފު ރައްދެއް ނުދިނުމަށް ޗައިނާއަށް އިންޒާރު ކުރަމުން އެމެރިކާއިންވަނީ ޓައިވާނުގެ އިރުން އެގައުމަށް ދަތުރު ކުރަން އޮންނަ މަގުގައި ހަނގުރާމަމަތީ 4 މަނަވަރެއް ބާއްވާފައެވެ.
އޭޝިއާއަށް ކުރައްވާ ދަތުރުފުޅެއްގައި ފުރާވަޑައިގަންނަވަމުން ޓައިވާނަށް ވަޑައިގަންނަވާނޭކަމަށް ޕެލޯސީ ވިދާޅުވެފައެއް ނުވެއެވެ. އެހެންނަމަވެސް އެމެރިކާ އަދި ޓައިވާންގެ މީޑިއާތަކުން މިހާރު ރިޕޯޓު ކުރަމުންދާ ގޮތުގައި ޕެލޯސީ ޓައިވާނަށް ވަޑައިގަންނަވާނެއެވެ.
ނާންސީ ޕެލޯސީގެ ދަތުރުފުޅާއި ގުޅިގެން އެމެރިކާ އަދި ޗައިނާގެ ގުޅުން އިތުރަށް ގޯސްވެފައިވާއިރު، ޗައިނާއިން ބުނަމުންދަނީ ޕެލޯސީ ޓައިވާނަށް ވަޑައިގެންފިނަމަ، އެމެރިކާއިން އޭގެ އަގު ދައްކަން ޖެހޭނެކަމުގައެވެ.
މިނިވަންކަން އިއުލާން ކޮށްފައި ނުވިނަމަވެސް ޓައިވާންއަކީ އަމިއްލަ ވެރިކަމެއް ކުރަމުން އަންނަ، ޗައިނާއިން އެގައުމުގެ ބައެއްގެ ގޮތުގައި ދައުވާ ކުރަމުންދާ ގައުމެކެވެ. އަދި އެމެރިކާއިން ދަނީ ނުރަސްމީ ސިފައެއްގައި އަބަދުވެސް ޓައިވާނަށް އަސްކަރީ އެހީތެރިކަން ފޯރުކޮށްދެމުންނެވެ.
ޗައިނާއިން އަބަދުވެސް ބުނަމުން އަންނަނީ ޓައިވާންއިން އެގައުމުގެ މިނިވަންކަން އިއުލާން ކޮށްފިނަމަ އަސްކަރީ ބާރުގެ ބޭނުން ބޭނުންކޮށްގެ ޓައިވާން ހިފާނެކަމުގައެވެ.
