އެމްޑީޕީގެ ރައީސް މުހައްމަދު ނަޝީދަކީ ދޮގު ހެދުމަށް އަރާހުންނެވި ބޭފުޅެއްކަން ނޭގޭ ރައްޔިތަކު މިޤައުމުގައި މަދުވާނެކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ވިދާޅުވެއްޖެއެވެ.

ރޮޒޭނާ މިހެން ވިދާޅުވީ، ރޮޒޭނާގެ ފިރިކަލުން ނާޝިޒު އެއްޖިއްސުން ގުޅުން ހިންގާ ފޮޓޯތަކެއް ހުރިކަމަށް ބުނެ ދައުރުވި ވާހަތަކާއި ގުޅިގެން ރައީސް ނަޝީދު އެމްޑީޕީގެ ވަޓްސް އަޕް ގްރޫޕެއްގައި ނާޝިޒުއާއި، ރޮޒޭނާ ޓެގްކޮށް ކުރެއްވި ސުވާލާއި ގުޅިގެންނެވެ.

އެއް ޖިންސުން ގުޅުން ހިންގި މައްސަލައިގެ ތުހުމަތުގައި އެމަނިކުފާނުގެ ކޮއްކޮ، ނާޒިމް ސައްތާރު ހައްޔަރު ކޮށްފައިވާ ދަނޑިވަޅެއްގައި ނަޝީދު ގެންދަނީ ރައީސް ޞާލިހާއި، އަދި އެމަނިކުފާނަށް ތާއީދު ކުރައްވާ ބޭފުޅުންނަށް އަމާޒުކޮށް ބޮޑެތި ތުހުމަތުރައް ކުރަމުންނެވެ.

ނަޝީދުގެ މިތުހުމަތާއި ގުޅިގެން ރޮޒޭނާ ވިދާޅުވީ ފޮޓޯތައް ހުރި ކަމުގައިވާނަމަ އެފޮޓޯއެއް ލީކު ނުވެގެން އުޅެނީ ކީއްވެތޯ ސުވާލު ކުރައްވާފައެވެ. ނަޝީދުގެ ކޮއްކޮ މިމައްސަލާގައި ހައްޔަރު ކުރުމަކީ އެކަމުގެ ރުޅިވެރިކަން އެހެން މީހުންނަށް ބާލަންޖެހޭ ސަބަބެއް ނޫންކަމަށް ރޮޒޭނާ ވިދާޅުވިއެވެ. އަދި އެހެން ނޫނަސް ނަޝީދަކީ ރައްޔިތުންނަށް އޮޅުވާލަން ކިހާ ބޮޑެތި ދޮގު ތަކެއް ހަދާނެ ބޭފުޅެއްކަން ރައްޔިތުންނަށް އޮޅިފައި ނުވާކަމަށް ރޮޒޭނާ ވިދާޅުވިއެވެ.

ބަލަ ފޮޓޯތައް ލާށޭ ބުނީމަ ކީއްވެތަ މުހައްމަދު ނަޝީދަށް ލާން ނުކެރިގެން އުޅެނީ. އެއީ ނެތީމަ. ތި އިންސާނާ ހަދާ ދޮގު ނޭގޭ މީހެއް މި ޤައުމަކުނެތް. ލިވާތުކޮށްގެން ކޮއްކޮ ހައްޔަރު ކުރީމާ އެހެން މީހުންނަށް ކޮން ވަރެއް ބާލަނީ! ހުރިއްޔާ ހުރި ވީޑިއޯއަކާއި ފޮޓޯއެއް ލާބަލަ.

– ރޮޒޭނާ ވިދާޅުވިއެވެ.

އއ. އަތޮޅުގެ ރިސޯޓެއްގައި ހުންނަވަނިކޮށް ނާޒިމް ހައްޔަރު ކުރުމާއެކު، ނަޝީދު ޓްވީޓެއް ވެސް ކުރެއްވިއެވެ. އަދި ނާޒިމް ހައްޔަރުކުރީ ސިޔާސީ މަގުސަދެއްގައި ސަރުކާރު ކޯލިޝަންގައި ތިބި ހަރުކަށި ފިކުރުގެ ބަޔަކު ރުއްސަން ކަމަށް ވެސް ނަޝީދު އެ ޓްވީޓްގައި ލިޔުއްވާފައިވެއެވެ.

ނާޒިމް ސައްތާރު މިއަދު ވަނީ އއ. ރަސްދޫ މެޖިސްޓްރޭޓް ކޯޓަށް ވެސް ހާޒިރުކޮށްފައެވެ. އަދި އެ ކޯޓުން ވަނީ ނާޒިމްގެ ބަންދަށް ހަތް ދުވަހުގެ މުއްދަތެއް ޖަހައިފައެވެ. ބަންގްލަދޭޝްގެ ރައްޔިތެއް ކަމަށްވާ އަލަމްގީރްއާ އެކު ދިވެހި ފިރިހެނުންތަކެއް އެއް ޖިންސުން ގުޅުން ހިންގާ މަންޒަރު ފެންނަ ވީޑިއޯތަކެއް ސޯޝަލް މީޑިއާއަށް ވަނީ ލީކުކޮށްފައެވެ.

އެ މައްސަލާގައި ނާޒިމްއާއި އަލަމްގީރްގެ އިތުރަށް، ކުރީގެ މަޖިލިސް މެންބަރު މުހައްމަދު ނަޝީދު (ކާނަލް) އާއި ފުލުހުންގެ ޑްރަގް އެނމަސައްކަތް ކުރާ އަބްދުއްރަހްމާން ރަފީއު ވެސް ވަނީ ހައްޔަރުކޮށްފައެވެ.